00:00:00 IGIHE NETWORK KN KINYARWANDA EN ENGLISH FR FRANCAIS

Rwemalika yanze kuyobora, amatora ya Komite Olempike y’u Rwanda ashyirwa mbere y’Imikino Olempike ya Tokyo

Yanditswe na Eric Tony Ukurikiyimfura
Kuya 17 Mata 2021 saa 10:13
Yasuwe :
0 0

Inama y’Inteko Rusange idasanzwe ya Komite Olempike y’u Rwanda yabaye kuri uyu wa Gatandatu tariki ya 17 Mata 2021, yemeje ubwegure bwa Amb. Munyabagisha Valens wari umaze imyaka ine ayiyobora, yemeza kandi ko amatora ya Komite Nyobozi nshya azaba mbere y’Imikino Olempike ya Tokyo 2020, tariki ya 8 Gicurasi.

Mu nama y’Inteko Rusange isanzwe yari yabaye ku wa 3 Mata, abanyamuryango ba Komite Olempike y’u Rwanda bari batoye k’ubwiganze ko amatora azaba nyuma y’Imikino Olempike ya Tokyo 2020 izaba mu mpeshyi, tariki ya 9 Ukwakira.

Nyuma y’uko Amb. Munyabagisha Valens wari umaze imyaka ine ayiyobora yeguye ku wa 6 Mata 2021, Visi Perezida wa Mbere akaba n’Umunyamuryango wa Komite Olempike Mpuzamahanga, Rwemalika Félicité, yatumije inama y’Inteko Rusange idasanzwe, yabaye kuri uyu wa Gatandatu mu cyumba cy’inama cya Lemigo Hotel.

Ku murongo w’ibyigwa hari ukwiga ku bwegure bwa Amb. Munyabagisha ndetse no kurebera hamwe icyakorwa kugira ngo hakomeze kuba imyiteguro y’Imikino Olempike ya Tokyo izaba hagati ya tariki ya 23 Nyakanga n’iya 5 Kanama 2021.

Minisiteri ya Siporo yavuzweho kudacana uwaka n’abayoboraga Komite Olempike y’u Rwanda, yari guhagararirwa n’Umunyamabanga Uhoraho muri Minisiteri ya Siporo, Shema Maboko Didier, ariko ntiyigeze yitabira.

Abanyamuryango ba Komite Olempike y’u Rwanda bemeje ubwegure bwa Amb. Munyabagisha Valens ndetse kuba byari bigenze gutyo, byari bisobanuye ko Visi Perezida wa mbere, Rwemarika Félicité, ari we muyobozi wayo by’agateganyo.

Rwemarika yahise afata umwanya asaba abanyamuryango ko bamugira inama kuko bitewe n’umwuka uri mu banyamuryango kuko basa n’abacitsemo ibice bitewe n’uko bamwe bifuzaga amatora mbere y’Imikino Olempike, abandi bayashaka nyuma yayo, abona byamugora kubayobora muri icyo gihe cyose ndetse yumva adatekanye.

Ibi byatumye abanyamuryango basubira mu cyemezo bari bafashe mu nama y’inteko rusange ishize ko amatora yazaba nyuma y’Imikino Olempike, bashingiye ku kuba Rwemarika atiteguye kuyobora bitewe n’umwuka urimo, bakareba niba bamufasha maze amatora agategurwa vuba bishoboka.

Batoreye ko icyemezo cy’uko amatora azaba nyuma y’imikino mpuzamahanga Olempike giteshejwe agaciro ahubwo azaba mbere ndetse mu kwezi gutaha kwa Gicurasi.

Kandidatire zizatangira gutangwa tariki ya 24 Mata kugeza ku wa 30 Mata 2021 ari nabwo hazahita hazasuzumwa kandidatire zatanzwe.

Kuva tariki ya 1 -7 Gicurasi, abo kandidatire zabo zizaba zemewe bazatangira kwiyamamaza ni mu gihe amatora azaba tariki ya 8 Gicurasi 2021.

Nyuma y’iyi nama, Rwemalika Félicité yabwiye abanyamakuru ko atari gufata ubuyobozi bwa Komite Olempike y’u Rwanda kuko abanyamuryango bamaze gucikamo ibice.

Ati “Ikindi navuga ko twageze ku ntego twifuzaga ni uko ubushize nabwo habaye Inteko Rusange [Isanzwe] ariko hari umwuka mubi cyane, abantu baratongana, abantu barebana nabi, abandi barigendera. Wabonaga hari ishyamirana. Narebye ndibaza nti ‘nzakorana na bo nte kandi bariciyemo ibice? Ndavuga nti oya!’.”

Komite Nyobozi ya Komite Olempike y’u Rwanda mu myaka ine ishize, yari igizwe na Amb. Munyabagisha Valens [weguye], Rwemalika Félicité [Visi Perezida wa Mbere akaba n’Umunyamuryango wa Komite Olempike Mpuzamahanga], Bizimana Festus [Visi Perezida wa Kabiri], Sharangabo Alexis [Umunyamabanga] watowe asimbuye Bizimana Dominique weguye manda itararangira, Ingabire Alice [Umubitsi], E’gairma Hermine [Umujyanama], Nzabanturura Eugène [Umujyanama] na Ntagengwa Olivier uyobora Komisiyo y’abakinnyi.

Inama y'Inteko Rusange idasanzwe ya Komite Olempike y'u Rwanda kuri uyu wa Gatandatu, yemeje ubwegure bwa Amb, Munyabagisha Valens wari umaze imyaka ine ayiyobora
Umuyobozi wa RAF, Mubiligi Fidèle, ni umwe mu bayobozi b'amashyirahamwe y'imikino bitabiriye iyi Nteko Rusange idasanzwe
Bagabo Placide uyobora Ishyirahamwe Nyarwanda ry'umukino wa Taekwondo, atanga igitekerezo cye ku bijyanye n'amatora
Abanyamuryango batoye ko icyemezo cyari cyafashwe ku matora tariki ya 3 Mata 2021, giteshejwe agaciro
Visi Perezida wa Mbere akaba n’Umunyamuryango wa Komite Olempike Mpuzamahanga, Rwemalika Félicité, yavuze ko atayobora kugeza mu Ukwakira, asaba ko hakorwa amatora vuba bishoboka
Abanyamuryango ba Komite Olempike y'u Rwanda bemeje ko amatora azaba muri Gicurasi 2021, mbere y'imikino Olempike izabera i Tokyo mu Buyapani

Amafoto: Komite Olempike y’u Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .