00:00:00 IGIHE NETWORK KN KINYARWANDA EN ENGLISH FR FRANCAIS

Rwampungu ukina Wheelchair yahawe miliyoni 3 Frw ku mukino wa ‘BK All-Star’ (Amafoto)

Yanditswe na Eric Tony Ukurikiyimfura
Kuya 21 Ugushyingo 2021 saa 12:02
Yasuwe :
0 0

Kapiteni w’Ikipe y’Igihugu ya Wheelchair Basketball, Rwampungu Meshack, yahawe miliyoni 3 Frw yo kumushyigikira nyuma y’umukino wa “BK All-Star” wahuje abakinnyi b’intoranywa muri Shampiyona ya Basketball iterwa inkunga na Banki ya Kigali Plc.

Uyu mukino wabereye muri Kigali Arena ku wa Gatandatu, warangiye Ikipe ya Shyaka Olivier itsinze iya Ndizeye Ndayisaba Dieudonné amanota 77-73 bisabye iminota itanu y’inyongera.

Ikipe ya Shyaka Olivier yatsinze "BK All-Star Game 2021" yahembwe miliyoni 1 Frw, igihembo yatanzemo ubufasha kuri Rwampungu Meshack wahoze akina Basketball, ariko kuri ubu akaba akina Wheelchair Basketball nyuma yo gukora impanuka mu 2015 ubwo yakiniraga KBC.

Rwampungu yahawe kandi miliyoni 2 Frw n’Ishyirahamwe Nyarwanda ry’Umukino wa Basketball mu rwego rwo kumushyigikira uburyo atacitse intege nyuma yo gukora impanuka yamushegeshe none ubu akaba agendera mu kagare.

Muri Werurwe 2015 ni bwo ikipe ya Kigali Basketball Club yakoze impanuka y’imodoka igiye gukina i Huye, Rutayisire Guy wayikiniraga yitaba Imana.

Rwampungu Meshack ari mu bakomeretse cyane icyo gihe ku buryo agendera mu kagare kuko yavunitse uruti rw’umugongo. Kuri ubu, yahisemo gushinga ‘salon de coiffure’ i Remera kugira ngo agerageze kwiyubaka.

Mu kiganiro aheruka kugirana na IGIHE, yavuze ko nyuma yo gukora impanuka akavunika umugongo, byabaye urugendo rukomeye kugeza ubwo kuri ubu yumva asa n’umaze kumera neza nubwo bikimusaba kujya kwa muganga kugira ngo bakomeze kumufasha gukira.

Ati “Nyuma y’impanuka ibintu biba ari bishya, umubiri uba ari mushya, kugendera mu kagare, gusunika, binsaba imbaraga nyinshi zikubye nanjye ntabasha gukora kuko ni ibintu bishya. Ureba uburyo abantu basanzwe birirwa biruka byanga, noneho ukirebaho wowe ukoresha igare ugasanga birikubye.”

Bamwe mu bamufashije kongera kwisuganya muri ubu buzima bushya harimo abo bahoze bakinana n’abo biganaga avuga ko bamubera abakiliya muri ‘salon de coiffure’ afite iruhande rw’ahazwi nko kuri ‘Contrôle Technique’, ahateganye n’ahari kubakwa hoteli ya FERWAFA ndetse yizeye ko igikorwa cye kizatera imbere n’ashyigikirwa n’abandi bantu.

Mbere y’uko haba umukino wa “BK All-Star Game”, abakinnye 24 bagize amakipe yawukinnye, bahisemo ko igihembo cya miliyoni 1 Frw kizahabwa ikipe yatsinze, cyazashyikirizwa uyu musore mu rwego rwo kumushyigikira.

Ni ko byagenze ubwo umukino wari urangiye ku wa Gatandatu, aho Rwampungu yazanywe mu kibuga asunitswe mu igare na Hagumintwari Steve usanzwe ukinira Patriots BBC.

Ishyirahamwe Nyarwanda ry’Umukino wa Basketball (FERWABA) na ryo ryunzemo mu kumufasha, rimugenera andi miliyoni 2 Frw, aho yayashyikirijwe na Visi Perezida wa Kabiri ushinzwe amarushanwa, Nyirishema Richard.

Rwampungu kuri ubu ni Kapiteni w’Ikipe y’Igihugu y’umukino wa Wheelchair Basketball iheruka kujya muri Afurika y’Epfo muri Shampiyona Nyafurika yo gushaka itike y’Imikino ihuza ibihugu bivuga ururimi rw’Icyongereza (Commonwealth Games) izabera i Birmingham mu 2022.

Rwampungu Meschack yarebye uyu mukino yicaranye na Hagumintwari Steve usanzwe ukinira Patriots BBC
Ikipe ya Shyaka Olivier yahawe miliyoni 1 Frw nyuma yo gutsinda umukino wa "BK All-Star" ku wa Gatandatu
Igihembo cy'ikipe yatsinze, cyashyikirijwe Rwampungu Meshack kuri ubu utagikina Basketball kubera impanuka yakoze mu 2015 akinira Kigali Basketball Club
Rwampungu Meshack asuhuzanya n'Ikipe ya Shyaka yarimo abo bakinanaga Basketball mbere y'uko akora impanuka
FERWAWABA yahawe Rwampungu andi miliyoni 2 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .