Rayon Sports 2-1 Police:Camara yunze mu rya Diarra ahagurutsa abafana ku munota wa nyuma

Yanditswe na Philbert Girinema
Kuya 8 Nzeri 2016 saa 11:51
Yasuwe :
0 0

Igitego cya Camara ku munota wa 90 w’umukino ni cyo cyabaye itandukaniro ku mukino wahuzaga Rayon Sports na Police FC ku munsi wa mbere w’irushanwa ryateguwe na AS Kigali.

Rayon Sports yaje gukina uyu mukino ari yo ihabwa amahirwe, yaje kugorwa n’intangiriro zawo aho byagaragara ko Police FC yabonanaga kurusha iyi kipe y’umutoza Masudi Djuma.

Uyu mutoza wahesheje Rayon Sports igikombe cy’amahoro, yari yahisemo kubanza ku gatebe k’abasimbura Pierrot Kwizera wabaye umukinnyi w’umwaka wa shampiyona ushize, mu gihe na Nahimana Shasir waje muri iyi ipe uyu mwaka avuye muri Vitalo na we atari muri 11 babanzamo. Rutahizamu mushya Camara bakuye muri Mali na ba myugariro Zappy na Senyange Ivan bo bari babanje mu kibuga.

Police FC yatangiye neza umukino, ni na yo yaje gufungura amazamu ku munota wa munani w’umukino, ubwo koroneri ya Ndatimana Robert yasanganirwaga na Eric Ngendahimana atsinda igitego cy’umutwe.

Iki gitego cyabaye nk’igikangura iyi kipe yambara ubururu n’umweru yatangiye gusatira cyane, biza no kuyihira ku munota wa 24 ubwo Savio Nshuti , utagaragaye cyane mu mukino, yazaga kwishyurira iyi kipe kuri Coup Franc nyuma y’ikosa ryari rikorewe Lomami Frank.

Igice cya mbere cy’umukino,cyaje kurangira amakipe yombi anganya 1-1 maze umutoza Masudi akora impinduka mbere y’uko igice cya kabiri gitangira, yinjizamo Nahimana Shasir mu mwanya wa Manishimwe Djaber mu gihe Pierrot Kwizera yafataga umwanya wa Lomami Frank.

Izi mpinduka zafashije Rayon Sports yatangiye kwiharira umukino ariko ntibone izamu. Ku munota wa 85, umusifuzi Ishimwe Claude yaje gusifura penaliti ya Rayon Sports gusa aza kwisubiraho nyuma yaho umusifuzi wo ku ruhande amubwiriye ko Nshuti Savio yigwishije. Mu gihe abari kuri stade bari bakibaza ibibaye, Neza Anderson wa Police na we yaje gutegerwa mu rubuga rw’amahina ku munota wa 90 ariko umusifuzi arabyirengagiza.

Mu gihe umukino byasaga nk’aho amakipe yombi agiye kuwunganya, Rayon Sports yaje kuzamukana umupira maze Irambona Eric wari winjiye mu kibuga asimbuye ashobora kubona Camara wari hagati ya ba myugariro babiri ba Police ariko abatsindana igitego ku munota wa kane w’inyongera.

AS Kigali Pre -season irakomeza kuri uyu wa Gatanu Kiyovu yakira Sunrise mbere y’uko APR FC yisobanura na Dauphins Noirs.

Abafana bari babukereye
Kwizera Pierrot yabanje ku gatebe
Zappy ni umwe mu bitwaye neza nubwo yaje kuvunika hakiri kare
Celestin Ndayishimiye wa Police ni we watowe nk'umukinnyi w'umukino
Ibyishimo ku mutoza Masudi mu gihe Maso yahuraga n'ikipe yavuyemo
Savio Nshuti ntabwo yitwaye neza nubwo yatsinze igitego
Umusifuzi Ishimwe Claude yanze penaliti nyuma yo kuvugana n'umwungirije
Celestin Ndayishimiye wa Police ni we watowe nk'umukinnyi w'umukino
Ndatimana Robert yongeye kugaruka mu kibuga
Abakinnyi ba Police ntibumvaga uburyo umusifuzi yemeje Penaliti
Camara yari yagerageje guhiga igitego ku buryo bwose
Nahimana Shasir yitezweho byinshi n'abakunzi ba Rayon Sports
Camara yishimira igitego
Camara yiteye amazi nyuma yo gusoza akazi
Police na yo yari ifitemo amaraso mashya
Rayon Sports yabanje mu kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza