Perezida Kagame yitabiriye Car Free Day asaba ko yongererwa amasaha (Amafoto)

Yanditswe na Manzi Rema Jules
Kuya 3 Ukuboza 2017 saa 12:34
Yasuwe :
2 0

Perezida Paul Kagame n’umufasha we, Jeannette Kagame bifatanyije n’abatuye Umujyi wa Kigali muri siporo ngarukakwezi ya “Car Free Day” kuri iki Cyumweru tariki 3 Ukuboza 2017 asaba Minisiteri ya Siporo n’Umuco kuyongerera amasaha.

Buri Cyumweru cya mbere cy’ukwezi, abantu b’ingeri zose bo mu bice bitandukanye by’Umujyi wa Kigali bahurira muri siporo ku kibuga cy’Ikigo cy’Igihugu cy’Imisoro n’Amahoro, bagakora imyitozo ngororangingo itandukanye irimo kwiruka ku maguru, gutwara amagare n’iyindi.

Kuri iki Cyumweru Umukuru w’Igihugu, Paul Kagame ari kumwe n’Umufasha we bifatanyije n’abaturage benshi bari bayitabiriye bakorana imyitozo ngororamubiri.

Minisitiri wa Siporo n’Umuco, Uwacu Julienne, yatangaje ko kuba Umukuru w’Igihugu n’abo mu muryango we bifatanyije n’Abanyarwanda muri iyi siporo ari iby’agaciro kenshi kuko baba bafite inshingano nyinshi ariko bakagerageza no kuboneka mu bikorwa bigamije gufasha Abanyarwanda kugira ubuzima bwiza.

Yagize ati “Ni ikintu twishimiye cyane kuko dusanzwe tubizi ko akunda siporo kandi ayishyigikiye. Ubu turatanga n’ubutumwa no ku bandi bataraza kuko barahombye, bakwiye gukora uko bashoboye muri gahunda nyinshi bagira bagashyiramo n’umwanya wo gukora siporo kuko ituma tugira ubuzima bwiza tukarushaho gukora n’indi mirimo.”

Minisitiri Uwacu yavuze ko Perezida yasabye ko gahunda ya Car Free Day yakongerwamo imbaraga ndetse n’amasaha abiri yari isanzwe ikorwa akongerwa kugira ngo irusheho gutanga umusaruro.

Yagize ati “Iyi siporo yayishimye, ashimira cyane ko abantu bayitabira anashima igikorwa cyo gupima abaje muri siporo kugira ngo barebe uko ubuzima bwabo buhagaze. Yanatubwiye ngo amasaha yo kuyikora tuyongere turusheho gutanga umwanya uhagije ku bayitabira yaba ari hano mu Mujyi wa Kigali cyangwa ahandi hose mu gihugu.”

Gahunda ya Car Free Day yatangijwe mu Mujyi Kigali muri Gicurasi 2016, umubare w’abayitabira ugenda wiyongera umunsi mu munsi kuri ubu ikaba imaze kuba ubukombe aho usanga mu mihanda ya Nyamirambo, Remera, Kicukiro n’ahandi abatari bake babyuka biruka ku maguru gake gake bagana Kimihurura aho bahurira n’umutoza, Mukasa Nelson ubafasha gukora imyitozo itandukanye.

Nubwo iki gikorwa cyatangiye mu Rwanda umwaka ushize, Car Free Day ni umunsi umaze imyaka myinshi witabirwa mu bindi bihugu cyane cyane iby’ibihangange wizihizwa tariki 22 Nzeri buri mwaka. Watangijwe ku rwego rw’Isi mu 2000, mu rwego rwo gukangurira abantu kugabanya kwanduza ikirere bakoresha ibinyabiziga bidasohora imyuka yangiza ahubwo rimwe na rimwe bakagenda n’amaguru cyangwa bagakoresha ibikoresho bitanduza ikirere nk’amagare mu ngendo.

Mu mijyi nka Bogota muri Columbia, Jakarta muri Indonesia, Kaohsiung muri Taiwan, Caracas muri Venezuela; Toronto, Montreal, Ottawa na Winnipeg hose muri Canada ni hamwe mu ho uyu munsi wamaze kuba nk’umuco.

Perezida Paul Kagame n’umufasha we, Jeannette Kagame muri Car Free Day
Umuyobozi w'Umujyi wa Kigali Wungirije ushinzwe Iterambere ry'Ubukungu , Busabizwa Parfait asuhuza Madamu Jeannette Kagame na Perezida Kagame
Perezida Paul Kagame asuhuza abitabiriye siporo muri "Car Free Day"
Abafite amagare n'abagendera ku nkweto z'amapine na bo ntibahezwa muri Car Free Day
Perezida Kagame yakoranye n'Abanyakigali siporo muri Car Free Day
Bamwe bafataga amafoto y'urwibutso
Car Free Day yatangijwe mu Mujyi Kigali muri Gicurasi 2016
Abitabira Car Free Day bahurira muri siporo ku kibuga cy’Ikigo cy’Igihugu cy’Imisoro n’Amahoro ku Kimihurura
Iyi siporo ngarukakwezi yitabirwa n’abantu b’ingeri zose
Perezida Kagame yasabye ko amasaha ya Car Free Day yongerwa
Perezida Kagame na Madamu Jeannette Kagame baganira n'abayobozi barimo Umuvunyi Mukuru, Murekezi Anastase; Minisitiri w'Ubuzima, Dr Diane Gashumba; Minisitiri wa Siporo n’Umuco, Uwacu Julienne n'Umuyobozi w'Umujyi wa Kigali Wungirije ushinzwe Iterambere ry'Ubukungu , Busabizwa Parfait
Perezida Paul Kagame n’umufasha we, Jeannette Kagame bifatanyije n’abatuye Umujyi wa Kigali muri siporo ngarukakwezi
Perezida Kagame na we yasuzumwe indwara zitandura
Nyuma ya siporo, abayitabiriye bapimwa indwara zitandura

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza