Owoeri Julius Tarigboro wakiniraga Etincelles amaze amezi abiri afunzwe

Yanditswe na Ntabareshya Jean de Dieu, Mukwaya Olivier
Kuya 19 Gashyantare 2021 saa 08:19
Yasuwe :
0 0

Umunya-Nigeria Owoeri Julius Tarigboro wakiniraga ikipe ya Etincelles amaze amezi abiri afunzwe kubera inyandiko mpimbano z’ibyangombwa byerekanaga ko yakinaga mu gihugu cya Uruguay, zatumye Etincelles imufata nk’umukinnyi w’igitangaza.

Ubwo ikipe ya Etincelles yakaga ibyangombwa bya Owoeri Julius mu Ishyirahamwe ry’umupira w’Amaguru ku Isi, FIFA, yasubijwe ko uwo mukinnyi atigeze akina muri Uruguay, FIFA isaba ko yakurikiranwa.

Mu Ugushyingo 2020 hajemo ubwumvikane buke hagati y’ikipe ya Etincelles na Gakumba Patrick ‘Super Manager’ ushinzwe kugurisha abakinnyi kubera uyu munya-Nigeria Owoeri Julius Tarigboro yayigurishije, ariko igasanga adashoboye yewe n’ibyangombwa bye ari ibihimbano ariko ntibyagira icyo bitanga.

Umunyamabanga wa Etincelles, Kabanda Innocent yabwiye IGIHE ko icyo gihe bagerageje kuvugana na Gakumba Patrick uzwi nka Super Manager wabagurishije umukinnyi ngo bumvikane kuri iki kibazo ariko we akamwihakana. Byabaye ngombwa ko ikipe imusezerera gusa abura itike yo kumucyura iwabo muri Nigeria, agumana n’abakinnyi nyuma baza kumushyikiriza Urwego rw’Ubugenzacyaha mu Rwanda, RIB, ngo akurikiranwe kubera amanyanga yo gukoresha inyandiko mpimbano.

Kabanda Innocent yemereye IGIHE ko uyu musore afunzwe azira gukoresha ibyangombwa by’ibihimbano.

Ati “Nibyo koko arafunze, amezi abiri arashize. Akurikiranyweho gukoresha ibyangombwa by’ibihimbano. Nyuma yo kubonako yatubeshye, kuko yaba ari FIFA no muri Uruguay batubwiye ko batamuzi, kandi natwe umutoza akimubona yahise amugaya, ni ngomba ko akurikiranwa kubera iyo mpamvu, cyane ko n’uwatubeshye ari we Super Manager yamwihakanye.”

Ndagijimana Enock, Visi perezida ushinzwe ubukungu aheruka kubwira IGIHE ko Gakumba yababeshye akabazanira umukinnyi yitwaje ibyangombwa mpimbano bigatuma batanga amafaranga y’ubusa.

Ati “Gakumba afata abakinnyi akabazana muri Etincelles atubeshya ko bazi gukina. Nk’uriya yaramuzanye avuga ko avuye muri Uruguay, abivuga ku maradiyo yose kandi uriya mukinnyi nta hantu yigeze akina. Yazanye impapuro nk’umuntu twizeye tubonye imyirondoro y’umukinnyi dutanga amafaranga ntacyo twitayeho.”

Yakomeje ati “Ntabwo umuntu yava mu ikipe ikomeye aje mu yo hasi ngo umugerageze, bakoze inyandiko mpimbano dushatse twanamufungisha ubu turi kuganira n’abanyamategeko ngo baturebere icyo twakora.”

Amakuru atugeraho nuko ubu uwo mukinnyi ari muri Gereza ya Gisenyi aho ategereje kuburana mu mizi.

Owoeri Julius Tarigboro uri hagati akurikiranyweho gukoresha impapuro mpimbano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .