Kwamamaza

"Nk’uko i Rubavu mwitwa Brazil mubyaze umusaruro impano mufite muri siporo"

Yanditswe kuya 18-09-2016 saa 09:16' na Manzi Jules


Umuyobozi ushinzwe siporo muri Minisiteri y’umuco na siporo mu Rwanda, Bugingo Emmanuel, yasabye urubyiruko rwo mu Karere ka Rubavu kubyaza umusaruro impano rufite rugera ikirenge mu cy’abandi bahakomoka nka Salomon Nirisalike ukina i Burayi.

Ibi Bugingo Emmanuel yabitangaje ubwo Minispoc yifatanyaga n’abatuye Akarere ka Rubavu muri siporo kuri bose kuri uyu wa Gatandatu tariki 17 Nzeri 2016.

Ni igikorwa cyitabiriwe n’ingeri zitandukanye z’abaturage harimo urubyiruko, ababyeyi n’abayobozi mu nzego zinyuranye zo mu Karere n’Umurenge wa Rugerero wabereyemo iyo siporo.

Mu ijambo yagejeje ku bari bateraniye aho, Bugingo yagize ati "Rubavu mwiyita ’Brazil’, abana banyu benshi batunzwe na siporo harimo abakina mu makipe akomeye y’umupira w’amaguru mu Rwanda no hanze, abandi barasiganwa ku magare bagahesha igihugu ishema, namwe mugomba kurushaho kumva akamaro kayo ku buzima bwanyu ndetse ku bakiri bato, mwatera ikirenge mu cya bakuru banyu mukayigira umwuga."

Yakomeje ababwira ko igihugu cyatekereje gushyiraho gahunda yo gushishikariza abaturage gukora siporo nyuma y’uko hari indwara zitandura zirimo umubyibuho ukabije, umutima, igisukari (Diabete) n’izindi zikomeje gushegesha ubuzima bwa benshi nyamara urukingo rwazo rworoshye ari ugukora siporo.

Uretse iyi gahunda ya siporo kuri bose yagiye itangizwa mu Turere dutandukanye, Leta yashyiriyeho abakozi bayo uburyo bwo gukora siporo ibagenera amasaha abiri yo ku wa Gatanu saa Cyenda kugira ngo barusheho guhangana n’indwara zitandura.

Umuyobozi w’Akarere ka Rubavu wungirije ushinzwe imibereho myiza y’abaturage, Uwampayizina Marie Grace we yagize ati "Muri Rubabu n’Umurenge wa Rugerero by’umwihariko, siporo ni umuco wacu, muri weekend imihanda iba yuzuye, abandi bagiye ku Kivu ndetse no mu mazu akorerwamo siporo. Turishimira ko abayobozi muri Minispoc baje kwifatanya natwe. Ni iby’agaciro kandi tuzakomeza kurwanira umwanya wa mbere kuko ubu nta baduhiga mu gukora siporo."

Umurenge wa Rugerero ubaye uwa mbere ukorewemo siporo kuri bose kuko ubusanzwe yakorerwaga ku byicaro by’Uturere, Bugingo akaba avuga ko ari ubundi buryo bashyizeho bwo kwegera cyane abaturage kurushaho.

Akarere ka Rubavu ni kamwe mu turere two mu Rwanda dukunda guturakamo abakinnyi benshi b’umupira w’amaguru bakomeye nka Haruna Niyonzima ukinira Yanga yo muri Tanzania, Nirisalike Salomon n’abandi.

Bugingo Emmanuel ushinzwe siporo muri MINISPOC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved