00:00:00 IGIHE NETWORK KN KINYARWANDA EN ENGLISH FR FRANCAIS

Leicester City yegukanye Community Shield, PSG yegereye Messi, Brésil na USA biyobora i Tokyo: Avugwa mu mikino hanze

Yanditswe na Eric Tony Ukurikiyimfura
Kuya 8 Kanama 2021 saa 12:18
Yasuwe :
0 0

Igitego rukumbi cyinjijwe na Kelechi Iheanacho cyafashije Leicester City kwegukana Community Shield itsinze Manchester City 1-0 mu mukino wabaye ku wa Gatandatu, tariki ya 7 Kanama 2021.

Uyu mukino wahuje Manchester City yegukanye Shampiyona ya Premier League mu mwaka w’imikino wa 2020/21 na Leicester City yatwaye FA Cup, wabereye kuri Stade Wembley.

Kelechi Iheanacho yatsinze igitego kuri penaliti yatanzwe ku munota wa 89 nyuma yo gukinirwa nabi na Nathan Ake mu gihe yari amaze iminota 10 asimbuye Harvey Barnes.

Jack Grealish uheruka kugurwa na Manchester City imutanzeho miliyoni 100£, yagiye mu kibuga ku munota wa 65.

Leicester City izatangira Premier League yakira Wolves ku wa Gatandatu mu gihe Manchester City izakirwa na Tottenham ku Cyumweru.

Kelechi Iheanacho ntiyishimiye igitego yatsinze Manchester City yigeze gukinamo
Jack Grealish yakinnye umukino wa mbere muri Manchester City nyuma yo kugurwa miliyoni 100£
Abakinnyi ba Leicester City bishimira Community Shield begukanye

=====================================================

PSG yatangiye ibiganiro na Lionel Messi

Nyuma yo gutandukana na FC Barcelone itarabashije kumwongerera amasezerano kubera amikoro n’ibibazo by’imikorere muri La Liga, Lionel Messi ari kwifuzwa na Paris Saint-Germain yo mu Bufaransa.

Amakuru avuga ko abo ku ruhande rwa Messi bavuganye na Paris Saint-Germain ku wa Kane ndetse ibindi biganiro byabaye ku wa Gatandatu.

Kuri iki Cyumweru saa Sita z’amanywa, Messi aragirana ikiganiro n’itangazamakuru nyuma yo gutandukana na FC Barcelone yari amazemo imyaka 21 nubwo yayikiniye imyaka 17 mu ikipe nkuru.

Ku wa Gatanu, Joan Laporta uyobora FC Barcelone, yavuze ko kugumana Messi byari gushyira iyi kipe mu gihombo yari kuzikuramo mu myaka 50 iri imbere.

Messi w’imyaka 34, nta kipe afite nyuma yo gusoza amasezerano yari afitanye na FC Barcelone ku wa 30 Kamena 2021.

Ifote ye ari kumwe n’abakinnyi ba Paris Saint-Germain barimo Neymar, Leandro Paredes, Marco Verratti na Angel Di Maria iri mu zikomeje kugarukwaho, aho bamwe babona ko bitanga icyizere ko yajya gukina mu Bufaransa.

Neymar yakinanye na Messi muri FC Barcelone hagati ya 2013 na 2017, agurwa na PSG atanzweho miliyoni 200£ , gusa abagabo bombi ni inshuti magara.

Paris Saint-Germain imaze kugura abakinnyi barimo Sergio Ramos, Georginio Wijnaldum, Gianluigi Donnarumma na Achraf Hakimi, yatangiye neza Shampiyona ya Ligue 1 ku wa Gatandatu, aho yatsinze Troyes ibitego 2-1 byinjijwe na Achraf Hakimi na Mauro Icardi.

Lionel Messi uheruka gutandukana na FC Barcelone ari mu biganiro na PSG
Ifoto ya Messi ari kumwe n'abakinnyi ba PSG barimo Neymar, Paredes, Di Maria na Verratti, ikomeje kugarukwaho cyane

==========================================================

Chelsea ishobora gusubirana Romelu Lukaku

Ikipe ya Chelsea yo mu Bwongereza ikomeje ibiganiro bigeze kure na Inter Milan ndetse bishobora kurangira isinyishije Romelu Lukaku kuri miliyoni 97,5£.

Lukuku w’imyaka 28, yakiniye Chelsea akiri muto ubwo yagurwaga muri Anderlecht y’iwabo mu Bubiligi, afite imyaka 18 gusa, ariko nyuma yo gutsinda igitego kimwe mu mikino 15 agurishwa muri Everton.

Yashoboraga gusubira muri Chelsea mu 2017, ariko atwarwa n’umutoza José Mourinho muri Manchester United mu 2017, aguzwe miliyoni 75£.

Kuri ubu ni umwe mu bakinnyi beza basatira izamu, aho yatsinze ibitego 47 mu mikino 72 amaze gukina muri Shampiyona y’u Butaliyani mu myaka ibiri ayimazemo.

Chelsea irifuza gusubirana Romelu Lukaku

==========================================================

Brésil na USA byegukanye umudali wa Zahabu mu Mikino Olempike

Ikipe y’Igihugu ya Brésil y’Abatarengeje imyaka 23, yegukanye umudali wa Zahabu mu mupira w’amaguru, itsinze iya Espagne ibitego 2-1 mu minota 120.

Malcom yinjije igitego cy’intsinzi ku munota wa 108 mu gihe iminota 90 yari yarangiye ari igitego 1-1.

Matheus Cunha yari yafunguye amazamu ku munota wa 42, nyuma y’iminota irindwi Richarlison ahushije penaliti mu gihe Mikel Oyarzabal yishyuriye Espagne ku munota wa 72.

Brésil yisubije umudali wa Zahabu dore ko mu myaka itanu ishize, yabigezeho ifashijwe na penaliti yatsinzwe na Neymar ku mukino wa nyuma mu mukino yahuyemo n’u Budage i Rio.

Leta Zunze Ubumwe za Amerika zegukanye umudali wa Zahabu muri Basketball y’abagabo ku nshuro ya kane yikurikiranya, zitsinze u Bufaransa amanota 87-82.

Mu bagore, naho zegukanye uyu mudali ku nshuro ya karindwi yikurikiranya zitsinze Abayapani amanota 90-75.

Abakinnyi ba Brésil bishimira umudali wa Zahabu bisubije mu mupira w'amaguru mu Mikino Olempike ya Tokyo 2020
Leta Zunze Ubumwe za Amerika zatwaye umudali wa Zahabu muri Basketball y'abagabo n'iy'abagore

======================================================

José Mourinho yahawe ikarita itukura mu mukino wa gicuti

Umutoza wa AS Roma, José Mourinho, yahawe ikarita itukura mu mukino wa gicuti ikipe ye yanyagiwemo na Real Betis ibitego 5-2 ku wa Gatandatu.

Ubwo Alex Moreno yatsindaga igitego cyafashije Betis kuyobora umukino n’ibitego 3-2 ku munota wa 57, abakinnyi ba AS Roma baburanye bavuga ko yakoze umupira n’ukuboko.

Lorenzo Pellegrini yahawe ikarita ya kabiri y’umuhondo mu gihe na Mourinho yahawe ikarita itukura kubera kutishimira iki cyemezo.

Mu minota ya nyuma y’umukino, AS Roma yahawe andi makarita y’umuhondo ya kabiri kuri Gianluca Mancini na Rick Karsdorp, isoza umukino ifite abakinnyi umunani, itsindwa 5-2.

José Mourinho yahawe ikarita itukura mu mukino wa gicuti AS Roma yatsinzwemo na Real Betis
Mourinho yazize kutishimira icyemezo cy'umusifuzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .