00:00:00 IGIHE NETWORK KN KINYARWANDA EN ENGLISH FR FRANCAIS

Inkoni y’Umwamikazi yatambagijwe mu Mujyi wa Kigali mbere yo kujyanwa muri Tanzania (Amafoto)

Yanditswe na Eric Tony Ukurikiyimfura
Kuya 12 Ugushyingo 2021 saa 06:36
Yasuwe :
0 0

Ku munsi wayo wa gatatu mu Rwanda, inkoni y’Umwamikazi w’u Bwongereza, Elizabeth II, yatambagijwe mu bice binyuranye by’Umujyi wa Kigali birimo Ingoro Ndangametaka y’Urugamba rwo guharika Jenoside yakorewe Abatutsi mu 1994 no kuri Stade Mpuzamahanga ya Cricket i Gahanga.

Iyi nkoni izazenguruka mu bihugu 72 bigize umuryango wa Commonwealth mbere y’imikino izabera i Birmingham mu mpeshyi ya 2022, iri mu Rwanda guhera tariki ya 9 Ugushyingo 2021.Kuri uyu wa Kane, tariki ya 11 Ugushyingo, yatambagijwe mu bice by’Umujyi wa Kigali.

Abitabiriye iki gikorwa basobanuriwe uburyo izahoze ari ingabo za RPA zahagaritse Jenoside yakorewe Abatutsi mu 1994 kuva ku wa 7 Mata kugeza muri Nyakanga 1994 ubwo hashyirwagaho Guverinoma y’Ubumwe bw’Abanyarwanda.

Visi Perezida w’Ishyirahamwe Nyarwanda ry’Imikino ya Commonwealth, Umulinga Alice, yavuze ko impamvu bahisemo iyi Ngoro Ndangamateka nka hamwe mu hazatambagizwa iyi nkoni, ari ukugira ngo amahanga amenye aho u Rwanda rwavuye ndetse n’abakinnyi bahagararira igihugu bamenye amateka y’igihugu cyabo bazaharanire ko atazongera kuba.

Ati “Iyi nkoni ikigera hano mu Rwanda twayijyanye ku Rwibutso rwa Jenoside rwa Kigali ku Gisozi, twagombaga rero kuyizana hano mu rwego rwo kwerekana ko ya Jenoside yahagaritswe, uburyo yahagaritswe n’abayihagaritse. Ibyo byose ni byo twabonye muri iyi nzu twatembereye.”

Yakomeje agira ati “Yaje hano kuko turi muri Commonwealth, iyo abantu batitanga ngo bahagarike Jenoside banubake igihugu cyacu kugeza aho kiri uyu munsi, ntabwo tuba turi muri uyu muryango. Twazanye hano n’abakinnyi bacu, mu bisobanuro by’iyi nkoni harimo icyizere n’amahoro, ni bo dufiteho icyizere cyo guharanira amahoro, bakora ubuvugizi ko ibihe twanyuzemo bitazongera kuba.”

Nyuma yo kuva ku Kimihurura, inkoni y’Umwamikazi yajyanywe ku kibuga mpuzamahanga cy’umukino wa Cricket i Gahanga nk’umwe mu mikino ufite inkomoko mu Bwongereza ukinirwa ku kibuga Abongereza bagizemo uruhare ngo cyubakwe ndetse umukino ukaba uri mu yo Abanyarwanda bazashakamo itike yo kujya i Birmingham mu 2022.

I Gahanga, abari batwaye inkoni bahasanze abana bakina Cricket bo mu ishuri rya IPRC Kigali, bakinana na bo umukino mugufi ugamije ubusabane.

Ubwo iyi nkoni y’Umwamikazi yari ivuye i Gahanga, yatambagijwe mu Mujyi rwagati mbere y’uko hakorwa urugendo rw’amaguru rwavuye ahakorera Ikigo cy’Igihugu cy’Ubuzima (RBC) i Remera rugasorezwa muri Kigali Arena.

Kuri uyu wa Gatanu, tariki ya 12 Ugushyingo saa sita n’iminota 50 z’amanywa, ni bwo iyi nkoni iva mu Rwanda, aho izajyanwa muri Tanzania nk’igihugu cya 11 kizayakira muri 72 izageramo mbere y’uko Imikino y’i Birmingham 2022 itangira.

Abari gutambagiza inkoni y'Umwamikazi Elizabeth II basobanuriwe byinshi ku rugamba rwo guhagarika Jenoside yakorewe Abatutsi mu 1994
Mukobwankawe Liliane na Hakizimana John ni bo bari batwaye inkoni y'Umwamikazi ubwo yatemberezwaga mu Ngoro Ndangamateka yo guhagarika Jenoside
Abaherekeje inkoni y'Umwamikazi bafata umunota wo kwibuka no guha agaciro ingabo zitanze kugira ngo Jenoside ihagarare
Abayobozi muri Minisiteri ya Siporo, Ishyirahamwe Nyarwanda ry'Imikino ya Commonwealth na Ambasade y'u Bwongereza mu Rwanda bafata ifoto imbere ya bimwe mu bigaragaza amateka yaranze urugamba rwo guhagarika Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .