Ihere ijisho Kigali Arena! Mu cyumweru kimwe iraba ishobora kwakira imikino (Amafoto na Video)

Yanditswe na Philbert Girinema
Kuya 27 Kamena 2019 saa 10:43
Yasuwe :
0 0

Birashoboka ko Kigali Arena, inyubako y’imikino n’imyidagaduro iri kubakwa i Remera kuri Stade Amahoro ari imwe mu zihuse kurusha ibindi bikorwa remezo binini byubatswe mu Rwanda mu myaka mike ishize.

Mu matariki ya 15 Mutarama nibwo ibikorwa byo kubaka iyi nzu ifite ubushobozi bwo kwakira abantu ibihumbi 10 yatangiye. Sosiyete y’Abanya-Turikiya, Summa Rwanda, niyo yahawe iyi mirimo nyuma yo kugaragaza ubushobozi ubwo yasozaga Kigali Convention Centre.

Ni inyubako ya mbere nini y’imikino mu Karere ka Afurika y’Uburasirazuba ndetse iri mu icumi za mbere muri Afurika yose.

Yubatswe mu buryo bumeze kimwe na Dakar Arena iherereye i Diamniadio nayo yubatswe na Summa ariko aho bitandukaniye ni uko iyi yo muri Sénégal yakira abantu ibihumbi 15.

Ifite uburebure bwa metero 18,6 uvuye ku gisenge. Izajya yakira imikino ya Basketball, Volleyball, Tennis na Football ikinirwa mu nzu. Ishobora kwakira ibitaramo, inama mpuzamahanga, ibiterane n’ibindi bikorwa bitandukanye.

Kigali Arena igizwe n’ibice bine (zone), aho buri kimwe gifite abo cyagenewe. Amarembo magari aherereye ahazwi nko mu Migina ku muhanda wa Sport View.
Aha niho abantu bazajya bagurira amatike ashyirwa ku kuboko, hanyuma binjire hakoreshejwe uburyo bw’ikoranabuhanga aho imashini izajya ikora scan y’itike ubundi umuntu akinjira. Ntabwo ari nka bimwe by’uko ku muryango habaga hariho umuntu ugenzura amatike.

Umuntu azajya agura itike iriho umuryango agomba kwinjiriramo na nimero y’intebe ari bwicareho. Ikindi ni uko umuntu acyinjira, azajya azamuka ahingukire mu gice kizaba kirimo za restaurant n’intebe abantu bashobora kwicaraho hanze baganira cyangwa se bafungura.

Usibye igice cy’abafana, ifite ikindi cyihariye cyagenewe abakinnyi kigizwe n’aho bambarira (vestiaires). Hari za vestiaires esheshatu kandi nini zizashyirwamo televiziyo nini ku buryo umukinnyi ashobora kuba ari kureba ibiri kubera mu kibuga.

Hari kandi ibyumba byahariwe abasifuzi, abatoza, ikizajya gikorerwamo imyitozo ngororamubiri yoroheje nko kwishyushya kirimo ibyuma bya siporo ariko nticyagereranwa na gym zisanzwe.

Mu masaha y'umugoroba ni uku Kigali Arena iba igaragara

Harimo kandi igice cya gatatu cyagenewe itangazamakuru, kirimo icyumba cyo kuganiriramo n’abatoza cyangwa abakinnyi, icyumba kizajya gitunganyirizwamo amashusho ari kwerekanwa ku kibuga n’ibindi.

Umuryango uteganye n’ahahoze ikibuga cyigishirizwamo imodoka [ubu hari sitasiyo ya Polisi] ni wo uzajya ukoreshwa n’abanyacyubahiro, aho ukiwinjiramo uzajya usanganirwa n’intebe nziza ku buryo abantu bashobora kwicara bakaganira.

Hazaba hari restaurant, hanyuma umuntu azamuke ingazi zihari agana muri stade nabwo mu gace ka VIP. Aha hari na ascenseur zishobora gukura abanyacyubahiro mu gice cyo hasi zibazamura hejuru muri etage aho bicara.

Mu gice cy’abanyacyubahiro, hagabanyijemo ibyumba bitandukanye, aho nk’umushyitsi umwe cyangwa umuntu runaka ashobora gufata itsinda ari kumwe na ryo bakicara ukwabo muri icyo cyumba kizaba kirimo televiziyo, bakagira icyo basangira, babishaka bakigira imbere (ahazaba hari intebe), bagakurikira ibibera hasi mu kibuga.

Uko iyi nzu iteye ntabwo ishobora gukora nta muriro w’amashanyarazi, niyo mpamvu ifite uburyo butatu butuma adashobora kubura kuri stade.

Ubwa mbere ni umuriro w’Ikigo cy’Igihugu gishinzwe Ingufu (REG), ubwa kabiri ni moteri eshatu nini ndetse ubwa gatatu bukaba bushobora kwitabazwa mu gihe ubundi buryo bubiri bwose bwanze.

Amazi akoreshwamo harimo ay’Ikigo Gishinzwe Amazi, Isuku n’Isukura (WASAC) abanza kongera kuyungururwa mbere yo gukoreshwa ndetse hari n’ibigega bibini bifata ay’imvura n’andi aba yakoreshejwe muri stade nko mu bwiherero n’ibindi, bikayashyira mu mashini iyatunganya ku buryo yifashishwa mu kuhira ubusitani.

Kimwe mu byatumye iyi nyubako yuzura vuba harimo n’ibikoresho byifashishijwe.

Ibyo birimo inkuta zizwi nka Precast n’inkingi no kuba iyi sosiyete izwiho kwihutisha imirimo.

Abakozi 500 bubaka iyi nzu ni abubatsi bakomeye bo muri Turikiya bunganirwa n’Abanyarwanda bagera ku 1000. Nibura umukozi ufasha abafundi ashobora gukorera ibihumbi bitanu ku munsi ariko yiyongera mu gihe akoze amasaha y’ikirenga.

Buri munsi umukozi aba afite ibyo agomba gukora, niba ari ugukora amakalo, akaba abizi ko narangiza gukora metero kare 200 ahita ataha. Undi na we uri gukora igisenge bikaba uko, ku buryo basimburanwa amanywa n’ijoro.

Ishimwe Abdul Aziz ugenzura iyubahirizwa ry’Igishushanyo mbonera cy’iyi nyubako, yavuze ko bitewe n’aho imirimo igeze, nyuma y’icyumweru kimwe, inyubako ishobora gutangira gukoreshwa.

Ati “Ibanga twakoresheje ni uko sosiyete yacu dukora ibintu mu gihe gito, tukabirangiza vuba. Kuba tubishaka, tukavuga ngo turashaka kubirangiza mu gihe gito gishoboka, ikindi ni uko dukora amanywa n’ijoro iminsi yose.”

Amakuru agera kuri IGIHE ni uko mu masezerano harimo ko iyi stade igomba kuba yatashywe tariki ya 17 Nyakanga 2019 ariko ko imirimo yihutishijwe kugira ngo ibe kimwe mu bikorwa u Rwanda rwishimira mu kwizihiza isabukuru y’imyaka 25 rwibohoye. Ni yo mpamvu itariki ya 4 Nyakanga 2019 ishobora kuba umunsi wo kuyitaha.

Kuri ubu, amazi yamaze kugeramo, umuriro urimo, ibyicaro byamaze gutunganywa, ikibuga cyatangiye gukorwa ku buryo mu minsi ibiri kizaba cyuzuye ndetse na televiziyo hamwe na hamwe mu byumba zashyizwemo.

Muri make igice kiri gukorwa ubu ntabwo ari imirimo y’ubwubatsi ahubwo ni amasuku ya nyuma, no kugenzura ko buri kintu cyose kiri mu mwanya wacyo ariyo mpamvu ababishinzwe bavuga ko mu cyumweru kimwe ishobora gukinirwaho.

Iyi stade izifashishwa u Rwanda rwakira imikino ya Afrobasket y’abatarengeje imyaka 16 mu 2020 ndetse ruherutse kwemezwa nk’igihugu kizakira imikino ya Afrobasket 2021.

Abantu bashobora kuzajya bifashisha Tapis roulant cyangwa ingazi zisanzwe mu kwinjira cyangwa gusohoka
Ubwiherero rusange bwamaze kuzura ndetse uko bumeze ubu bushobora gutangira gukoreshwa
Ubwiherero rusange butunganyije neza
Ubwiherero rusange nabwo bwararangiye
Iki nicyo cyumba kizajya gikorerwamo imyitozo yo kurambura ingingo. Hatangiye gushyirwamo ibikoresho bike bya siporo
vestiaires zamaze gutunganywa neza
Abakozi bagera kuri 500 mu bari kubaka iyi stade ni abo muri Turikiya
Iki gice kizaba kirimo ibiro by'abakozi bashinzwe gutunga iyi stade cyangwa se abandi bazagenwa na Minisiteri ifite siporo mu nshingano
Buri muntu azajya yinjira muri stade, yicare mu mwanya uri ku itike yaguze
Hagati mu kibuga, hari imashini yifashishwa mu gutunganya ahazashyirwa ecran nini zizajya ziba ziri kwerekana ibiri kubera muri stade
Ku ruhande rw'ibumoso ahagaragara igice cy'umuhondo, ni imbaho zifashishwa mu gukora ikibuga zatangiye gusaswa neza
Intebe ziri mu mabara y'umuhondo, ubururu n'icyatsi nk'ibirango by'u Rwanda
Magingo aya, intebe zamaze gushyirwa aho zigomba kuba ziri
Aha niho abanyacyubahiro bazajya banyura. Amakarito ateretse iruhande arimo intebe zizaterwa aha ku buryo haba nko mu ruganiriro
Aha hazashyirwa intebe na restaurant ku buryo abantu bazajya basohoka muri stade bakicara bafata ifunguro
Abakozi bakora amanywa n'ijoro basimburana kugira ngo akazi kihute
Ucyinjira mu muryango rusange uzajya ukoreshwa n'abafana, aha niho uzajya uzamukira ugana hejuru muri stade
Mu nkengero za Stade, abakora ubusitani nabo bageze kure akazi kabo. Amazi azajya yifashishwa mu kubwuhira ni azajya aba yakoreshejwe muri stade hanyuma yongere atunganywe
Buri mukozi aba yahawe icyate agomba gukora, yakirangiza akagenda undi akaza kumusimbura
Kigali Arena yatangiye kubakwa muri Mutarama uyu mwaka na Sosiyete yitwa Summa Rwanda y'Abanya-Turikiya
Ifite ubushobozi bwo kwakira abantu bagera ku bihumbi 10 ariko bashobora kurenga bakagera ku bihumbi 11 bitewe n'igikorwa cyabaye
Amarembo magari aherereye ahazwi nko mu Migina
Amabendera y'u Rwanda yarazamuwe hanze y'isi stade: Aho ari niho hazajya hashyirwa ay'ibihugu byitabiriye amarushanwa
Hanze ya stade hari imashini nini zizajya zifashishwa mu gihe umuriro ubuze, zizajya zihita zaka ako kanya
Ishimwe Abdul Aziz ugenzura iyubahirizwa ry’Igishushanyo mbonera cy’iyi nyubako, yavuze ko mu cyumweru kimwe imirimo iraba irangiye

Amafoto: Moise Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza