Boneza ball yahimbwe n’Umunyarwanda igiye kujya ikinwa mu mashuri yisumbuye

Yanditswe na Akimana Erneste
Kuya 2 Kamena 2018 saa 11:17
Yasuwe :
0 0

Mu gihe hari hamenyerewe imikino itandukanye yakinwaga mu bigo by’amashuri yisumbuye nk’umupira w’amaguru, basketball, Handball n’indi, hagiye kwiyongeraho uwa Boneza Ball wahimbwe na Jonas Ngirinshuti.

Kuri uyu wa Gatandatu tariki 2 Kamena nibwo hatangira amarushanwa azasozwa ku wa 9 Kamena akazitabirwa n’ibigo by’amashuri yisumbuye birindwi byo mu karere ka Rusizi ari naho uyu mukino wahimbiwe.

Nk’uko Jonas Ngirinshuti yabitangarije IGIHE yavuze ko aya marushanwa agamije gutangiza umukino wa Bonezaball mu bigo by’amashuri no gukomeza kuwumenyekanisha mu bakiri bato ari nabo bazawusakaza mu gihugu hose.

Yagize ati “Icyo ngamije ni ugukomeza kugeza uyu mukino ahashoboka hose kandi nkongera n’amakipe. Ikindi ni uko ubu dufite Ishyirahamwe rigamije kuwuteza imbere ryitwa (ADBOBA: Association des Development de Boneza Ball) ryemewe mu gihugu kandi turateganya no kuwagura ku buryo uzajya ukinwa no ku Isi yose ariko bigomba guhera hano wahimbiwe.”

Ibigo byitabira iri rushanwa harimo Urwunge rw’Amashuri rwa Gihundwe, Urwunge rw’Amashuri rwitiriwe Mutagatifu Bruno Gihundwe, Friends School of Kamembe, Urwunge rw’Amashuri rwitiriwe Mutagatifu Bonevanture Nkanka, TTC Mururu ndetse Jill Barham School.

Kugeza ubu uyu mukino ukinwa n’amakipe 11 mu Rwanda, arimo ane y’i Rusizi, atanu yo muri Nyamasheke, imwe y’i Nyanza n’indi ikinira ku Kimisagara mu Mujyi wa Kigali; hakaba hagiye kwiyongeraho n’aya arindwi yashinzwe mu bigo by’amashuri i Rusizi ari naho ugiye gutangirira ku rwego rw’amashuri mu gihugu.

Uyu mukino ukinwa mu gihe kingana n’iminota 70, igice cya mbere kigira iminota 35 n’icya kabiri kikagira iyindi 35, bakaruhuka iminota 10.

Ukinishwa amaguru n’umutwe. Hagati mu kibuga haba harimo ikintu kimeze nk’urushundura, hagati muri rwo harimo agatebo (pannier) ari nako ushaka gutsinda ateramo umupira.

Buri kipe iba ifite rutahizamu umwe mu kibuga cy’iyindi, ari na we usatira abakeba ababuza gutsinda mu gatebo.

Ku ntebe y’abasimbura haba hicaye abakinnyi batandatu ariko ikipe yemerewe gusimbuza kane gusa.

Umukinnyi mu nzira zo gutinda igitego

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza