Amb. Munyabagisha Valens yeguye ku buyobozi bwa Komite Olempike

Yanditswe na Thamimu Hakizimana
Kuya 6 Mata 2021 saa 01:15
Yasuwe :
0 0

Perezida wa Komite Olempike, Ambasaderi Munyabagisha Valens, yeguye ku mirimo yo kuyobora iri shyirahamwe yari amaze imyaka ine abereye umuyobozi mukuru.

Ambasaderi Munyabagisha yatangaje ubwegure bwe nyuma y’uko abanyamuryango ba Komite Olempike y’u Rwanda ku wa 3 Mata bari bemeje ko amatora ya Komite Nyobozi nshya, azakorwa mu Ukwakira 2021.

Ubutumwa bwo gusezera ku mirimo ye, Ambasaderi Munyabagisha, yabwanditse mu ijoro ryo ku wa Mbere, tariki ya 5 Mata 2021, ariko yirinze kugira byinshi atangaza ku bijyanye n’iimpamvu y’icyo cyemezo.

Abinyujije kuri rwa WhatsApp asanzwe ahuriraho n’abanyamuryango ba Komite Olempike, Ambasaderi Munyabagisha, yabandikiye ababwira ko yeguye anabashimira uko babanye mu myaka ine ishize.

Ati “Nshuti mwiriwe. Ndabamenyesha ko neguye ku mwanya wa Perezida wa RNOSC. Ndabashimira uburyo twakoranye muri iyi manda mu nyungu z’iterambere rya siporo.”

Munyabagisha yari ayoboye Komite Olempike afatanyije na Rwemalika Félicité [Visi Perezida wa Mbere akaba n’Umunyamuryango wa Komite Olempike Mpuzamahanga], Bizimana Festus [Visi Perezida wa Kabiri], Sharangabo Alexis [Umunyamabanga] watowe asimbuye Bizimana Dominique weguye manda itararangira, Ingabire Alice [Umubitsi], E’gairma Hermine [Umujyanama], Nzabanturura Eugène [Umujyanama] na Ntagengwa Olivier uyobora Komisiyo y’abakinnyi.

Ku wa 23 Mata 2020, Komite Olempike Mpuzamahanga (IOC) yandikiye za Komite Olempike mu bihugu byose izisaba kurebera hamwe n’amashyirahamwe azigize uburyo bwakurikizwa hagati yo kugendera kuri manda y’imyaka ine no kuba hategurwa amatora nyuma y’Imikino Olempike hagamijwe gutegura neza amakipe n’abakinnyi bazitabira iyo mikino mu mpeshyi.

Komisiyo ishinzwe gutegura amatora yatanze itariki ebyiri zishoboka ko zakorwaho ayo matora, ari zo tariki ya 15 Gicurasi (mbere y’Imikino Olempike) na tariki ya 9 Ukwakira 2021 (nyuma y’Imikino Olempike).

Abitabiriye Inama y’Inteko Rusange Isanzwe ku wa Gatandatu, babanje gusobanurirwa icyo amategeko ateganya ku matora, abatora n’abatorwa ndetse n’ibyo bagomba kuba bujuje.

Mu bantu 49 batoye, 21 muri bo bahisemo ko amatora ya Komite Nyobozi azaba mbere y’imikino Olempike naho abandi 28 bemeza ko azaba nyuma yayo. Abandi 11 ntibatoye.

Amakuru agera kuri IGIHE, avuga ko itariki amatora yari kuberaho yahise ihinduka ku buryo biteganyijwe ko azaba muri Gicurasi ndetse ko Komite Nyobozi nshya ya Komite Olempike izatorwa, ari yo izahita ifata inshingano zo gukomeza gutegura abakinnyi bazitabira imikino Olempike izabera i Tokyo.

Kubera icyorezo cya COVID-19, Imikino Olempike yagombaga kuba mu mpeshyi y’umwaka ushize wa 2020 i Tokyo mu Buyapani, yimuriwe hagati ya tariki ya 23 Nyakanga n’iya 8 Kanama 2021.

Ambasaderi Munyabagisha Valens yeguye ku buyobozi bwa Komite Olempike y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .