00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yitabiriye siporo rusange ya Car Free Day (Amafoto)

Yanditswe na IGIHE
Kuya 21 Ugushyingo 2021 saa 12:35
Yasuwe :
0 0

Perezida Paul Kagame ni umwe mu banya-Kigali bitabiriye siporo rusange izwi nka Car Free Day kuri iki Cyumweru tariki 21 Ugushyingo 2021.

Amafoto yashyizwe kuri Twitter n’Ibiro by’Umukuru w’Igihugu, yagaragaje Perezida Kagame ari kumwe na Minisitiri wa Siporo, Aurore Munyangaju Mimosa na Meya w’Umujyi wa Kigali Pudence Rubingisa, bagenda n’amaguru mu mujyi rwagati ahazwi nka Car Free Zone.

Mu butumwa Perezida Kagame yanyujije kuri Twitter, yagaragaje ko yishimiye kugenda n’amaguru mu mihanda ya Kigali nyuma y’igihe kinini abantu batemererwa guterana ari benshi.

Madamu Jeannette Kagame na we yifatanyije n’abatuye umujyi wa Kigali muri siporo rusange kuri iki cyumweru.

Car Free Day yabaye kuri iki Cyumweru, yitabiriwe n’abatuye mu turere dutatu tugize Umujyi wa Kigali, aho mu mihanda yagenwe ibinyabiziga birimo imodoka na moto byari byakumiriwe.

Abayitabiriye uyu munsi kuva saa Moya za mu gitondo kugera saa Yine, bubahirizaga amabwiriza yo kwirinda ikwirakwira rya COVID-19 arimo kwambara neza agapfukamunwa mbere na nyuma ya siporo ndetse n’igihe cyose bibaye ngombwa.

Hari abagendaga n’amaguru gake ku giti cyabo, abagenderaga hamwe mu matsinda n’abakoraga siporo yo kunyonga igare.

Car Free Day ni siporo rusange yatangijwe muri Gicurasi 2016 igamije gushishikariza abatuye Umujyi wa Kigali umuco wo gukora siporo no kubiborohereza; gushishikariza abaturage kwirinda indwara zitandukanye, aho bahabwa inama bakanapimwa izi ndwara ku buntu. Kuri ubu no mu ntara zindi iyi Siporo ikaba ikorwa.

Ifasha kandi mu kugabanya ihumanywa ry’umwuka abantu bahumeka binyuze mu gukumira imodoka na moto mu mihanda abakora siporo bifashisha.

Mu ntangiriro za 2018 ni bwo Perezida Kagame yasabye ko yazajya iba kabiri mu kwezi; ku Cyumweru cya mbere cy’ukwezi n’icya gatatu.

Perezida Paul Kagame (hagati), Minisitiri Munyangaju Mimosa (ibumoso) na Meya Rubingisa muri Car free Day
Perezida Kagame ubwo yagendaga n'amaguru muri Car Free zone
Perezida Kagame asuhuza bamwe mu bitabiriye Car Free Day
Perezida Kagame yitegereza zimwe mu nyubako nto ziri gushyira hafi ya Car Free Zone mu rwego rwo kurushaho kuharimbisha
Muri Car Free Day, hari abakora siporo yo kunyonga igare
Bamwe bakora siporo ku giti cyabo bagenda n'amaguru
Abatari bake bitabiriye Car Free Day yo kuri iki Cyumweru
Mu bice bitandukanye abaturage babyutse bakora siporo
Hari abakoreraga mu matsinda mu rwego rwo guterana imbaraga
Bamwe bakoze siporo mu matsinda ariko bahana intera
Amagare ya Guraride yifashishijwe muri iyi siporo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .