00:00:00 IGIHE NETWORK KN KINYARWANDA EN ENGLISH FR FRANCAIS

Abaganga b’i Tokyo basabye ko Imikino Olempike y’uyu mwaka ikurwaho

Yanditswe na Bukuru JC
Kuya 18 Gicurasi 2021 saa 03:47
Yasuwe :
0 0

Itsinda ry’abaganga bo mu Bayapani ryatanze inama y’uko Imikino Olempike ya 2020 izaba mu mpeshyi y’uyu mwaka yasubikwa mu gihe hari abasabye gukora nk’abakorerabushake muri iri rushanwa ryimuwe kubera COVID-19.

Mu gihe habura igihe kitageze ku byumweru 10 ngo Imikino Olempike ya Tokyo itangire kandi n’u Buyapani bukaba bukomeje guhangana n’ubwiyongere bw’ubwandu, ibitekerezo bya benshi bikomeje kurwanya ko iyi Mikino yaba.

Gusa, abashinzwe gutegura iyi Mikino bavuga ko izaba mu mutekano hubahirizwa ingamba zo kwirinda COVID-19, aho kuri ubu hatangiye gupimwa abakintu batandukanye barimo n’abazayitabira.

Ishyirahamwe ry’abaganga bagera ku 6,000 bo muri Tokyo, ryavuze ko “urwego ubwandu bwa COVID-19 bugezeho ubu ruri hejuru kuruta ikindi gihe.”

Mu itangazo bashyize hanze ku wa Mbere, aba baganga bakomeje bavuga ko “guhagarika kuba kw’iyi mikino ishobora kuba intandaro y’ubwiyongere bw’ubwandu n’impfu byaba ari amahitamo meza.”

Iri shyirahamwe ryagiriye guverinoma y’u Buyapani n’abashinzwe gutegura Imikino Olempike inama yo kwegera Komite Olempike Mpuzamahanga, hakarebwa uburyo yakurwaho.

Itangazo ry’aba baganga ryaje nyuma y’uko ihuriro ry’abaganga bo mu bitaro bikuru byo mu Buyapani mu cyumweru gishize ryaburiye guverinoma ko kuba kw’Imikino Olempike ya 2020 mu mutuzo bidashoboka.

Ubukana bwa COVID-19 mu Buyapani ntibwari bukangany nubwo imaze kwica abantu 11,500, ariko ikingirwa ryayo riri kugenda gahoro ndetse ubwiyongere bw’ubwandu muri iyi minsi bwatumye inzego z’ubuvuzi zitangira kuburira ubuyobozi.

Ku wa Gatanu w’icyumweru gishize, guverinoma y’u Buyapani yashyizeho amabwiriza mashya azakurikizwa kugeza mu mpera z’uku kwezi, habura igihe kitageze amezi abiri ngo hatangire Imikino Olempike ku wa 23 Nyakanga 2021.

Kuri uyu wa Kabiri, abashinzwe gutegura Imikino Olempike bavuze ko umubare w’abaganga bafite ubushobozi bwo kuvura muri siporo, basabye ubukorerabushake muri iyo Mikino wikubye kabiri abakenewe.

Itora riheruka gukoreshwa na kimwe mu binyamakuru bikomeye mu Buyapani, Asahi Shimbun, ryagaragaje ko 80% by’abatuye icyo gihugu batifuza ko Imikino Olempike yaba muri uyu mwaka.

Abayapani benshi ntibifuza ko Imikino Olempike y'uyu mwaka iba kubera icyorezo cya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .