Abafite ubumuga bwo mu mutwe bibutse Kennedy watangije ibikorwa byo kwidagadura

Yanditswe na Ishimwe Israel
Kuya 24 Nzeri 2016 saa 12:14
Yasuwe :
0 0

Umuryango wita ku bana bafite ubumuga bwo mu mutwe (Special Olympics Rwanda) wibutse Umunyamerika, Eunice Kennedy Shriver wawushinze,akanitangira gukora ibikorwa bigamije guharanira uburenganzira bwabo muri sosiyete.

Iki gikorwa cyabaye kuri uyu wa Gatanu tariki 23 Nzeri 2016 nyuma y’umukino w’umupira w’amaguru wahuje abana bafite ubumuga bwo mu mutwe wabereye ku kibuga cya Ferwafa i Remera.

Special Olympics ni umuryango watangiye mu 1968 utangijwe n’Umunyamerika, Eunice Kennedy Shriver wakuze aharanira ukwishyira ukizana kwa muntu ariko akababazwa n’uburyo abafite ubumuga bwo mu mutwe bakumirwaga mu muryango ndetse bagafatwa nabi.

Uyu mugiraneza wari ufite umuvandimwe na we ufite ubumuga bwo mu mutwe ariko bitewe n’uburyo bakuze basabana mu gukina umupira w’amaguru akabona uburyo bimufasha, ashaka kubyagura.

Mu 1968 yaje kugira igitekerezo cyo kwagura ibikorwa byo kwita ku bafite ubu bumuga abicishije mu mikino atangiza Special Olympics.

Mu muhango wo kwibuka, Eunice witabye Imana muri 2009 afite imyaka 88, Rwanda Special Olympics yifatanyije n’abana bafite ubumuga bwo mu mutwe barererwa mu kigo cya Izere Mubyeyi bakina umukino w’umupira w’amaguru ku kibuga cya Ferwafa nyuma bakora ubusabane n’ababyeyi babo.

Mu ijambo yagejeje kuri abo bana n’ababyeyi babo, Perezida wa Special Olympics mu Rwanda, Pasiteri Deus Sangwa yabasobanuriye amateka ya Eunice wibukwa n’ibyo yakoze, ubwitange yagaragaje bwo guhuza abasaga n’abibagiranye ndetse abasaba no gukomeza gufatanya kugira ngo barusheho guhindura n’abatarumva ko abafite ubumuga bwo mu mutwe ari abantu nk’abandi.

Yagize ati “Intego y’uyu munsi ni ukwibuka uyu mubyeyi (Eunice) witangiye abafite ubumuga bwo mu mutwe. Ubusanzwe ku Isi hose tumwibuka tariki 24 Nzeli buri mwaka ariko twe twahisemo kubikora uyu munsi. Ni umwanya tuba tubonye wo kuganira n’abana n’ababyeyi tukibukiranya uruhare rwa buri wese muri iyi nzira yo gukurikiza umurongo watangijwe na Eunice.”

Umubyeyi ufite abana babiri bafite ubumuga bwo mu mutwe bafashwa na Special Olympics, Kazimbaya Donath, yavuze ko uyu muryango waje ukenewe kuko byari bigoranye kubona aho abana nk’aba bajya bagakina, bakisanzura kuko wasangaga batiyumva mu bandi badafite ubumuga ndetse nabo bakabatinya.

Ngo kuva abana be bajya mu kigo cya Izere Mubyeyi abona barahindutse cyane, ubu bagerageza kuvuga mbere bitarashobokaga ndetse ngo n’imyitwarire yarahindutse kuko baba bari kumwe n’abarimu babihuguriwe kandi bafite n’umutima w’urukundo batabinubira.

Special Olympics yatangiye gukorera mu Rwanda muri 2003 kuri ubu ikaba ifite abana n’abantu bakuru bafite ubumuga bakina imikino inyuranye bagera ku bihumbi 13 200 mu gihugu hose.

Uyu muryango ukorana n’abagera kuri miliyoni 5.3 mu bihugu 170 ku Isi yose.

Abafite ubumuga bwo mutwe baconga ruhago
Imikino ihuza abafite ubumuga yabahinduriye ubuzima
Umuyobozi wa Special Olympics mu Rwanda, Pasiteri Deus Sangwa yashimangiye ko abafite ubumuga bagomba guhabwa uburenganzira bwabo
Abafite ubumuga bwo mu mutwe bibutse Eunice Kennedy Shriver washinze umuryango Special Olympics
Kazimbaya Donath, ufite abana babiri bafite ubumuga bwo mu mutwe barerwa n'Umuryango Special Olympics

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244