Umunyakenya Samuel Mwangi yaciwe ukuguru nyuma y’impanuka yakoze muri Tour du Rwanda

Yanditswe na Kanamugire Emmanuel
Kuya 30 Ugushyingo 2016 saa 11:23
Yasuwe : XX
0

Umukinnyi w’ikipe ya ‘Kenyan Riders DownUnder’, Samuel Mwangi yamaze gucibwa akaguru k’ibumoso kubera impanuka ikomeye yakoze ubwo yari muri Tour du Rwanda 2016 ku munsi wa nyuma bazenguruka muri Kigali tariki 20 Ugushingo 2016.

Mwangi w’imyaka 32 yakoreye impanuka i Kibagabaga ubwo hakinwaga agace ka nyuma ka Tour du Rwanda 2016 bazenguruka muri Kigali ku ntera ya kirometero 108 avunika igufa ry’akaguru k’ibumoso bituma adakomeza irushanwa.

Uyu mugabo wari ku mwanya wa 35 ku rutonde rusange mbere y’impanuka, yamaze gucibwa akaguru mu bitaro by’i Nairobi nyuma y’aho abaganga basanze nta yandi mahitamo nk’uko ikipe ye yabitangaje ibicishije ku rukuta rwayo rwa facebook.

Yagize iti “Umukinnyi wa Kenyan Riders Downunder, Samuel Mwangi yamaze gutakaza igice cy’akaguru ke k’ibumoso nyuma y’impanuka ikomeye yakoze ku munsi wa nyuma wa Tour du Rwanda.Mwangi yamaze kubyakira. Aragaragaza umutima ukomeye aho ari mu bitaro. Turimo kureba uburyo bwatuma ahazaza he hakomeza kuba heza. Bagenzi be mukomere.”

Mwangi utakaje amahirwe yo kuzongera gusiganwa ku magare ukundi, uyu mwaka yari yitabiriye amasiganwa atandukanye arimo Tour de Flores, Tour Ethiopian Meles Zenawi, Tour of China, na Tour du Rwanda ndetse muri 2010, muri shampiyona ya Afurika mu gusiganwa mu muhanda yari yabashije kurangiza ari ku mwanya wa gatandatu.

Mwangi ni umwe mu bakinnyi bari baratangiye kwitabira Tour du Rwanda kuva 2009 yashyirwa ku ngengabihe ya UCI uwo mwaka akaba yarasoje ari uwa 12 ku rutonde rusange, 2010 asoza ari uwa 33, muri 2011 Mwangi yabaye uwa 16.

Muri 2012 nubundi uyu mugabo wabaga akinira ikipe y’igihugu ya Kenya yongeye kwitabira iri rushanwa rizenguruka u Rwanda ku magare aba uwa 28 ariko ku kazi gakomeye yari yakoze afasha mugenzi we Njoroge John kwegukana umwanya wa gatatu ku rutonde rusange inyuma y’Abanya-Afurika y’Epfo Lill Darren na Girdlestone Dylan bari bayegukanye.

Muri 2013 Mwangi yagarutse muri Tour du Rwanda yongera gufasha Njoroge kuba uwa kane ku rutonde rusange we aba uwa 25. Muri 2014 ntabwo yitabiriye yagarutse muri 2015 ntiyabasha kurangiza isiganwa, 2016 ubwo yari yongeye kuryitabira ku nshuro ya karindwi rikaba risize atazongera gukina uyu mukino ukundi.

Samuel Mwangi(iburyo) na mugenzi we Joseph Gichora muri Tour du Rwanda
Mwangi(imbere) atarakora impanuka yatumye acibwa ukuguru
Samuel Mwangi ntazongera gusiganwa ku magare ukundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza