Tour de l’Espoir: Areruya yasoje ku mwanya wa gatanu mu gace katwawe na Mebrahtom

Yanditswe na Ishimwe Israel
Kuya 31 Mutarama 2018 saa 09:30
Yasuwe :
1 0

Areruya Joseph yasoje ku mwanya wa gatanu mu gace ka mbere k’irushanwa rya Tour de l’Espoir riri kubera mu Mujyi wa Douala muri Cameroun, Umunya- Érythrée, Natnael Mebrahtom aza ku isonga.

Iri siganwa riri kuba ku nshuro ya mbere muri Afurika ryatangiye kuri uyu wa 31 Mutarama rikazasozwa ku ya 4 Gashyantare 2017 aho abasiganwa bazakoresha ibilometero 417 mu duce tune tuzakinwa.

Mebrahtom yegukanye agace ka mbere muri Tour d’Espoir ka Douala- Douala ku ntera ya kilometero 92 akoresheje 2:25:24 mu gihe Umunyarwanda witezwe na benshi Areruya Joseph yasoje ku mwanya wa gatanu asizweho n’uwa mbere amasegonda 29. Areruya yatowe nk’umukinnyi wagaragaje guhangana cyane kuri uyu munsi mu bakinnyi 73 bari bahatanye.

Tour de l’Espoir itegurwa na Vivendi Sports ku bufatanye bw’Ishyirahamwe ry’Umukino wo Gusiganwa ku magare muri Cameroun n’iry’Umukino wo gusiganwa ku magare ku Isi (UCI) yitabirwa n’amakipe y’abatarengeje imyaka 23.

Iri siganwa ryitabiriwe n’ibihugu birimo Afurika y’Epfo, Burkina Faso, Algérie, Cameroun, Côte d’Ivoire, Misiri, Érythrée, Ethiopie, Mali, Maroc, Ibirwa bya Maurice, Repubulika Iharanira Demokarasi ya Congo, Tunisia na Vietnam.

Mebrahtom Natnael wegukanye aka gace ni we wanahembwe na Banki y’Ubucuruzi ya Cogebanque nk’umukinnyi uzamuka kurusha abandi muri Tour du Rwanda 2017, yegukanywe na Areruya Joseph.

U Rwanda ruhagarariwe n’abakinnyi batandatu bayobowe na Areruya uheruka kwegukana La Tropicale Amissa Bongo 2018, Mugisha Samuel waje ku mwanya wa 48; Munyaneza Didier wa 18, Hakiruwizeye Samuel wa 19, Ruberwa Jean Damascène wasoje ku wa 37 na Ukiniwabo René Jean Paul warangije ari uwa 7 asizwe n’uwa mbere iminota 2:53.

Aba bakinnyi bari mu Ikipe y’Igihugu y’abatarengeje imyaka 23 batozwa na Sterling Magnell bari guharanira gushaka itike yo kuzitabira Shampiyona y’Isi ya 2018.

Abakinnyi babiri ba mbere bazabona itike yo kwitabira Tour de l’Avenir izabera mu Bufaransa kuva ku ya 16-25 Kanama 2018.

Uduce dusigaye muri Tour de l’Espoir

-  Ku ya 1 Gashyantare 2018: Etape 2: Idenao-Douala (Km 147)

-  Ku ya 3 Gashyantare 2018: Etape 3: Yaoundé-Yaoundé (Km 101.8)

-  Ku ya 4 Gashyantare 2018: Etape 4: Akono-Yaoundé (Km 80.5)

Urutonde rw'abakinnyi 25 nyuma y'agace ka mbere muri Tour de l'Espoir
Abakinnyi b'Ikipe y'u Rwanda mu batarengeje imyaka 23 yitabiriye Tour de l'Espoir n'umutoza wabo Sterling Magnell
Abakinnyi ubwo bari bagiye guhaguruka bari mu gikundi
Umunya- Érythrée, Natnael Mebrahtom wegukanye agace kabanza muri Tour de l'Espoir, ni we wahembwe na Cogebanque nk’umukinnyi uzamuka kurusha abandi muri Tour du Rwanda 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza