Kwamamaza

Damme ushobora kuyobora UCI yahishuye icyo Tour du Rwanda irusha Tour de France

Yanditswe kuya 15-11-2016 saa 22:35' na Jah d'eau DUKUZE


Tom Van Damme uyobora ishyirahamwe ry’umukino w’amagare mu gihugu cy’Ububirigi akaba n’umwe mu bahabwa amahirwe yo kuzayobora impuzamashyirahamwe y’uyu mukino ku isi UCI, yatangaje ko Tour du Rwanda yasanze ikurikiranwa n’abakunzi benshi kurusha Tour de France yamamaye ku isi yose.

Ibi Van Damme akaba yabitangaje nyuma yo kubona umunsi wa gatatu wa Tour du Rwanda, wakinwagamo agace ka kabiri kahagurukaga i Kigali kerekeza i Karongi mu ntara y’Uburengerazuba. Uyu mugabo wasoje urugendo yagiriraga mu Rwanda, yagize ibyo atangariza i Karongi mbere yo gusubira mu Bubirigi.

Nyabugogo, abafana bari uruvunganzoka kuri uyu wa kabiri

Van Damme yagize ati: “Ni inshuro ya mbere nari nje muri aka karere byumwihariko mu Rwanda. Natunguwe cyane n’ibintu bibiri. Icya mbere natunguwe n’umubare w’ abantu bari ku mihanda bakurikirana iri siganwa. Nta gushidikanya, nabonye abantu bakurikira Tour du Rwanda baruta kure abakurikirana Tour de France”.

“Ikindi cyantunguye ni uburyo iri rushanwa ritegurwa, ibintu byose biri ku murongo, amasaha yo guhaguruka ntajya ahinduka, ni ibintu bidasanzwe”.

Kuri uyu wa kabiri, ikinyamakuru gikomeye mu gihugu cya Espagne cyandika imikino, Marca, kiri mu batunguwe n’ubwinshi bw’abantu bakurikirana Tour du Rwanda, aho banditse inkuru bibaza niba n’andi amarushanwa akomeye ku isi, atagakwiye kujyanwa aho akunzwe kurusha ahandi.

Marca yo muri Espagne hasanzwe hakinirwa isiganwa rya kabiri ku isi, na yo yatunguwe n'ubwinshi bw'abafana bitabiriye Tour du Rwanda

Abajijwe kuri ibi,Tom Van Damme yavuze ko na we yumva bikwiye ko amarushanwa akomeye ku isi yajya anazanwa mu bihugu bikurikira amagare kurusha ibindi, aho buri gihe kuyajyana i Doha(Qatar) na Dubai(UAE), hataba abafana ngo byagakwiye guhinduka. Nubwo uyu yafunguriye imiryango u Rwanda ko umunsi umwe rushobora kuzakira shampiyona y’isi, yanavuze ko ari ikintu cyo gutegereza byibura nyuma y’imyaka ine.

Mu matora y’umuyobozi wa UCI ateganyijwe umwaka utaha wa 2017, Van Damme wirinze gutangaza ko yafashe icyemezo cyo kwiyamamaza, azaba ahanganye na Michael Brian Cookson uyobora iri shyirahamwe kuva muri 2013 we warangije gutangaza ko ubwo manda y’imyaka ine yari yaratorewe izaba irangiye ngo azongera kugerageza amahirwe.

Umwe mu bayobozi bakomeye mu mukino w'Amagare ku isi, Tom Van Damme yahamije ko Tour du Rwanda irusha abafana Tour de France ya mbere muri uyu mukino
Ndayisenga Valens ni we wegukanye agace Kigali-Karongi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved