Team Rwanda irerekeza muri Gabon ishaka umwanya wa mbere muri Afurika

Yanditswe na Manzi Rema Jules
Kuya 12 Mutarama 2018 saa 02:30
Yasuwe :
0 0

Ikipe y’igihugu yo gusiganwa ku magare igizwe n’abakinnyi batandatu, irahaguruka i Kigali kuri uyu wa Gatanu nijoro, yerekeza muri Gabon mu isiganwa mpuzamahanga rya ‘La Tropicale Amissa Bongo 2017’, ifite intego yo kuzana umwanya wa mbere muri Afurika no kwegukana uduce twinshi.

Iri siganwa rikomeye kurusha ayandi muri Afurika, rizatangira kuzenguruka ibice bitandukanye bya Gabon tariki 15 risozwe kuri 21 Mutarama 2017. U Rwanda ruzaba ruhagarariwe n’abakinnyi batandatu barimo Areruya Joseph, Valens Ndayisenga, Bonaventure Uwizeyimana, Ukiniwabo René Jean Paul, Munyaneza Didier na Ruberwa Jean.

Aganira na IGIHE, Uwizeyimana Bonaventure, watangiye kwitabira iri rushanwa mu 2013 akaba uwa gatandatu mu 2015 na 2017, yatangaje ko we na bagenzi be bajyanye intego zo kwitwara neza kurusha inshuro zose bitabiriye La Tropicale Amissa Bongo nibura bakazatahana umwanya wa mbere mu makipe ya Afurika ndetse bakabasha no kwegukana uduce dutandukanye.

Yagize ati “Nk’ibisanze intego ni ugutsinda kandi tugiye nk’ikipe, harimo abana bakizamuka nka Munyaneza Didier, Ukiniwabo na Ruberwa ariko ntibizabatangaze ari bo dukoreye bagatsinda kuko nkanjye, Areruya na Ndayisenga abo tuzaba duhanganye baratuzi ariko aba bana ntibabazi.”

Yakomeje agira ati “Murabizi ubushize twabashije kuba ikipe ya gatatu muri Afurika yitwaye neza kandi navuga ko ari njye wari urimo umenyereye, abandi bari abana ari n’ubwa mbere barikinnye ariko uyu mwaka tujyanye abakinnyi batandatu bakomeye. Turashaka kuba ikipe ya mbere muri Afurika tukanashaka uduce twakwegukana kandi birashoboka.”

Uwizeyimana yavuze ko iri siganwa riba rigoye cyane kubera ko ryitabirwa n’amakipe agera kuri atandatu yabigize umwuga ariko bitewe n’inararibonye amaze kurigiramo no kuba azi imihanda yaho myinshi, bizafasha ikipe muri rusange kwitwara neza.

Barahaguruka mu Rwanda saa saba z’ijoro bari kumwe n’umutoza Sempoma Felex usanzwe atoza Benediction Club y’i Rubavu, umuganga Obed Ruvogera n’umukanishi Eric Maniriho.

Imihanda izakoreshwa izakoreshwa muri La Tropicale Amissa Bongo 2018

Tariki 15 Mutarama 2018 (Stage 1): Kango – Lambaréné, 146km

Tariki 16 Mutarama 2018 (Stage 2) : Ndendé – Fougamou, 173km

Tariki 17 Mutarama (Stage 3) : Fougamou – Lambaréné, 114km

Tariki 18 Mutarama 2018 (Stage 4): Ndjolé – Mitzic, 182km

Tariki 19 Mutarama 2018 (Stage 5) : Oyem – Ambam (Cameroon), 141km

Tariki 20 Mutarama 2018 (Stage 6): Bitam – Oyem, 115km

Tariki 21 Mutarama 2018 (Stage 7): Bikélé – Libreville, 140km

Areruya Joseph wegukanye Tour du Rwanda 2017 na Ndayisenga Valens ni bamwe mu bazaba bashakira igihugu ishema muri Gabon
Bonaventure Uwizeyimana mu 2014 yabashije kwegukana agace ka gatanu muri iri siganwa
Umutoza Sempoma Felex niwe uzaba ayoboye iyi kipe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza