Rwanda Cycling Cup 2019 izakomeza hakinwa Muhanga Circuit

Yanditswe na Eric Tony Ukurikiyimfura
Kuya 31 Ukwakira 2019 saa 08:42
Yasuwe :
0 0

Amarushanwa ya Rwanda Cycling Cup 2019 azakomeza kuri uyu wa Gatandatu tariki ya 2 Ugushyingo hakinwa isiganwa rizazenguruka Umujyi wa Muhanga wo mu Ntara y’Amajyepfo.

Iri siganwa rya gatandatu rya Rwanda Cycling Cup 2019 iterwa inkunga na Cogebanque n’uruganda rw’ibinyobwa rwa Skol, rizakinwa mu bice bibiri, aho ingimbi n’abari n’abategarugori bazatangira saa 09:30 naho abagabo batarengeje imyaka 23 n’abakuru bo batangire saa 11:00.

Abakinnyi bazasiganwa ku ntera y’ibilometero 3.3 bazenguruka mu Mujyi wa Muhanga, uwa mbere amenyekane nyuma y’isaha.

Bazahagurukira kuri Station Engen bakomeze kuri Havana Bar- SKOL- Station Kobil, bakate iburyo bagana ku biro by’Akarere ka Muhanga- kuri Police- bakate iburyo kuri Community Tele Centre- ALTM Industries Development Ltd- bakate ibumoso berekeza kuri gare ya Muhanga- bongere gukata iburyo bagana kuri ICK- Station Engen.

Ni inshuro ya kabiri hagiye gukinwa ubu bwoko bw’isiganwa rikinwa isaha kuko bwakoreshejwe i Rwamagana ubwo Mugisha Moïse yatsindaga.

Mugisha Samuel watwaye Criterium Byemayire Lambert iheruka, Mugisha Moïse (Rwamagana Circuit) na Munyaneza Didier (Kivu Race) ni amwe mu mazina akomeye (kuko batsinze nibura isiganwa) atazakina Muhanga Circuit kuko bari mu ikipe y’igihugu iri gukina Tour du Faso muri Burkina Faso.

Nzafashwanayo Jean Claude wa Benediction Excel Energy kimwe na Uwizeye Jean Claude usanzwe ukina mu Bufaransa na bo muri Burkina Faso muri iri siganwa rizasozwa ku Cyumweru.

Kugeza ubu hamaze kuba amasiganwa atanu uyu mwaka, aho irya mbere ryabereye i Musanze ‘Northern Challenge’ ryegukanywe na Uwizeyimana Bonaventure wa Benediction Excel Energy kuri ubu utakiri mu Rwanda, muri Nyakanga.

Nkurunziza Yves wa Benediction Excel Energy yatwaye Tour de Kigali muri Kanama, Mugisha Moïse wa Skol Fly Cycling Club atwara Rwamagana Circuit mu gihe Munyaneza Didier ‘Mbappé’ yatwaye Kivu Race, amasiganwa yombi yakinwe muri Nzeri.

Mugisha Samuel ni we uheruka kwegukana Criterium Byemayire Lambert yakinwe mu kwezi gushize.

Amakipe 11 azahatana muri Muhanga Circuit ni Fly Cycling Club, Les Amis Sportifs, Cycling Club For All, Benediction Club, Muhazi Cycling Generation, Karongi Vision Sport Center, Kigali Cycling Club, Nyabihu Cycling Team, Kayonza Young Stars Cycling Team, Ciine Elmay na Bugesera Cycling Club izaba isiganwa bwa kane nyuma yo gukina muri Rwamagana Circuit, Kivu Race na Criterium Byemayire Lambert.

Cycling Cup ni amarushanwa ngarukamwaka ategurwa na Ferwacy kuva mu 2015. Yashyizweho mu rwego rwo kongerera imyitozo n’ubunararibonye abakinnyi by’umwihariko abadakina mu Ikipe y’igihugu batitabira amasiganwa menshi mpuzamahanga.

Rwanda Cycling Cup izakomereza i Muhanga ku wa Gatandatu
Mugisha Samuel watwaye isiganwa riheruka (Criterium Byemayire Lambert) ari mu batazakina Muhanga Circuit

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza