Rwanda Cycling Cup 2019 izakomeza hakinwa isiganwa ryitiriwe abahinzi

Yanditswe na Eric Tony Ukurikiyimfura
Kuya 20 Ugushyingo 2019 saa 12:06
Yasuwe :
0 0

Amarushanwa ya Rwanda Cycling Cup 2019 azakomeza kuri uyu wa Gatandatu tariki ya 23 Ugushyingo hakinwa isiganwa ryitiriwe abahinzi ‘Farmers Race’ rizazenguruka Umujyi wa Musanze wo mu Ntara y’Amajyaruguru.

Iri siganwa rya karindwi rya Rwanda Cycling Cup 2019 iterwa inkunga na Cogebanque n’uruganda rw’ibinyobwa rwa Skol, rizatangira saa tatu (09:00), abakinnyi bazenguka intera y’ibilometero 6.2 mu Mujyi wa Musanze.

Bazahagurukira, banasoreze kuri Restaurant La Paillote banyuze kuri ADEPR – Ku Musigiti mu Ibereshi - Mpenge - Sunrise School - Nyarubande - CPND Fatima - Police - WASAC - Virunga Hotel - La Paillote.

Abagore bazakora intera y’ibirometero 93 nyuma yo kuzenguruka inshuro 15, ingimbi zikore intera y’ibirometero 111.6 nyuma yo kuzenguruka inshuro 18 mu gihe abagabo bakuru n’abatarengeje imyaka 23 bazakora intera y’ibirometero 155 nyuma yo kuzenguruka inshuro 25.

Kugeza ubu hamaze kuba amasiganwa atandatu uyu mwaka, aho irya mbere ryabereye i Musanze ‘Northern Challenge’ ryegukanywe na Uwizeyimana Bonaventure wa Benediction Excel Energy kuri ubu utakiri mu Rwanda, muri Nyakanga.

Nkurunziza Yves wa Benediction Excel Energy yatwaye Tour de Kigali muri Kanama, Mugisha Moïse wa Skol Fly Cycling Club atwara Rwamagana Circuit mu gihe Munyaneza Didier ‘Mbappé’ na we wa Benediction yatwaye Kivu Race, amasiganwa yombi yakinwe muri Nzeri.

Mugisha Samuel yegukanye Criterium Byemayire Lambert mu kwezi gushize mu gihe Uhiriwe Byiza Rénus wa Benediction, aheruka gutwara Muhanga Circuit yabaye mu ntangiriro z’uku kwezi.

Amakipe 11 azahatana muri Farmers Race ni Fly Cycling Club, Les Amis Sportifs, Cycling Club For All, Benediction Club, Muhazi Cycling Generation, Karongi Vision Sport Center, Kigali Cycling Club, Nyabihu Cycling Team, Kayonza Young Stars Cycling Team, Ciine Elmay na Bugesera Cycling Club izaba isiganwa bwa gatanu nyuma yo gukina muri Rwamagana Circuit, Kivu Race, Criterium Byemayire Lambert na Muhanga Circuit.

Cycling Cup ni amarushanwa ngarukamwaka ategurwa na Ferwacy kuva mu 2015. Yashyizweho mu rwego rwo kongerera imyitozo n’ubunararibonye abakinnyi by’umwihariko abadakina mu Ikipe y’Igihugu batitabira amasiganwa menshi mpuzamahanga.

Rwanda Cycling izasubira i Musanze, hakinwa Farmers Race ku wa Gatandatu
Uhiriwe Byiza Rénus yegukanye Muhanga Circuit iheruka gukinwa muri Rwanda Cycling Cup 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza