Ruberwa Jean Damascène yegukanye agace kabanza muri Tour de la RDC yambikwa umwenda w’umuhondo

Yanditswe na Eric Tony Ukurikiyimfura
Kuya 4 Kanama 2019 saa 11:27
Yasuwe :
0 0

Umunyarwanda Ruberwa Jean Damascène wa Benediction Excel Energy yegukanye agace ka mbere k’Isiganwa rizenguruka Repubulika Iharanira Demokarasi ya Congo ryatangiye kuba ku nshuro ya karindwi ku wa Gatandatu, tariki ya 3 Kanama 2019.

Iri rushanwa ryagiye risubikwa inshuro nyinshi, aho ubundi ryagombaga gutangira tariki ya 23 Nyakanga 2019.

Kuri uyu wa Gatandatu ni bwo ryatangijwe na Guverineri wungirije w’Intara ya Kongo Central, Justin Luemba, ari kumwe na Meya wa Boma, Marie-Josée Niongo Nsuami na Visi Perezida wa mbere w’Ishyirahamwe ry’Umukino w’Amagare muri RDC, Rachidi Kongolo.

Abasiganwa bahagurutse mu Mujyi wa Boma berekeza muri Matadi ku ntera y’ibilometero 120 maze uwa mbere aba Umunyarwanda Ruberwa Jean Damascène wakoresheje amasaha atatu, iminota itandatu n’amasegonda 58.

Umunya-Cameroun Kamzong Absollo Clovis wa SNH Vélo Club, yabaye uwa kabiri nyuma yo gukoresha amasaha atatu, iminota irindwi n’amasegonda 13.

Umunye-Congo waje hafi yabaye Jimmy Mohindo Kyaviro wabaye uwa cyenda, uyu akaba ari umwe mu baje kwitoreza mu Rwanda mu kwezi gushize.

Agace ka kabiri karakinwa kuri iki Cyumweru tariki ya 4 Kanama 2019, aho abasiganwa bahaguruka ahitwa Mbanza Ngungu berekeza i Kasangulu ku ntera y’ibilometero 100.

Tour de la RDC iri kuba ku nshuro ya karindwi uhereye mu 2013, yitabiriwe n’ibihugu 11 birimo RDC, Togo, Bénin, Côte d’Ivoire, U Rwanda, Cameroun, Burundi, Burkina Faso, Angola, u Buholandi n’u Bufaransa.

U Rwanda ruhagarariwe na Benediction Excel Energy iri gukina irushanwa rya gatatu mpuzamahanga nyuma yo kuba ikipe yo ku rwego rwa gatatu, aho irya mbere yakinnye ari Tour du Rwanda naTour de Limpopo.

Benediction yajyanye abakinnyi barimo Uwizeyimana Bonaventure, Byukusenge Patrick, Nsengimana Jean Bosco, Nzafashwanayo Jean Claude, Uwiduhaye Mike na Ruberwa Jean Damascène usanzwe ukinira Nyabihu Cycling Team ifatwa nk’ikipe ya kabiri ya Benediction.

Ruberwa Jean Damascène yegukanye agace ka mbere muri Tour de la RDC
Ruberwa yahise yambikwa umwambaro w'umuhondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza