00:00:00 IGIHE NETWORK KN KINYARWANDA EN ENGLISH FR FRANCAIS

Polisi y’u Rwanda yaburiye abazakurikira ‘Tour du Rwanda’

Yanditswe na Nsengiyumva Emmy
Kuya 1 Gicurasi 2021 saa 02:23
Yasuwe :
0 0

Mu gihe habura amasaha make ngo irushanwa rizenguruka u Rwanda ku magare ‘Tour du Rwanda’ ritangire, Polisi y’Igihugu yaburiye abazarikurikira kwitwararika amabwiriza yo kwirinda ikwirakwira ry’icyorezo cya Covid-19.

Ibinyujije ku rukuta rwa Twitter, Polisi y’u Rwanda yiseguye ku bakoresha imihanda izanyuramo amagare mu isiganwa rya Tour du Rwanda.

Iryo tangazo rigira riti “Turamenyesha abaturarwanda bose ko kubera isiganwa ry’amagare ku nshuro ya 13, riteganyijwe kuri uyu wa 2 Gicurasi 2021 imihanda ikurikira izaba ifunze guhera saa Yine za mu gitondo kugeza saa Sita na mirongo ine n’itanu.”

Imihanda izaba ifunze mu gihe cy’isiganwa irimo uva kuri Kigali Arena - Le Printemps - KIE - Kwa Rwahama - Umushumba Mwiza – La Parisse - Kuri 12 - Murindi - Inyange Industries - Masaka Hospital – Kabuga - Nyagasambu - Rwamagana Poids Lourd - Sitasiyo SP - Dereva Hotel Kuzenguruka Rwamagana inshuro 10 bava kuri Dereva Hotel - Rwamagana Ville - Poids Lourd – Sitasiyo SP.

Polisi y’u Rwanda, Ishami rishinzwe Umutekano wo mu muhanda ryijeje Abanyarwanda ko izaherekeza abasiganwa hose mu gihugu.

Yibukije Abanyarwanda ko icyorezo cya Covid-19 kigihari bityo bakwiye kuzitwararika ku mabwiriza yo kucyirinda mu gihe bazaba bari gukurikirana iri rushanwa.

Yakomeje iti “Tuributsa abafana ndetse n’abakunzi b’umukino wo gusiganwa ku magare ko Coronavirus igihari, ko kubahiriza amabwiriza yose yo kwirinda bigikomeje, cyane cyane aho abasiganwa bazaca hose ndetse n’aho isiganwa rizajya rirangirira.”

Polisi yaboneyeho gusaba abazaba bari ku mihanda bakurikirana isiganwa gukurikiza amabwiriza bazajya bahabwa n’abapolisi, bakirinda icyo ari cyo cyose cyateza impanuka nko kwegera cyane inkengero z’umuhanda cyangwa kujyana abana no kubasiga bonyine hafi y’umuhanda.

Tour du Rwanda ya 2021 yari iteganyijwe tariki ya 21-28 Gashyantare, ariko yimurirwa tariki ya 2-9 Gicurasi 2021 kubera icyorezo cya COVID-19.

Kuri iyi nshuro yayo ya 13 igiye kuba kuva ibaye mpuzamahanga, Tour du Rwanda izitabirwa n’amakipe 16 arimo atatu yo mu Rwanda.

  • Amakipe yemerewe kuzitabira Tour du Rwanda 2021

Amakipe ane y’ibihugu

• Team Rwanda

• Team Eritrea

• Team Algeria

• Team Ethiopia

Amakipe akina amarushanwa yo ku mugabane/UCI Continental Teams

• Benediction Ignite/Rwanda

• SACA/Rwanda

• Pro-Touch/USA

• Bike Aid/yo mu Budage

• TSG TERENGGANU /Malaysie

• Medellin/Colombia

• Tarteletto-Isorex/U Bubiligi

• Wildlife Generation Pro Cycling

Amakipe y’ababigize umwuga

• Total Direct Energie/France

• Team B&B Hotels/France

• Androni Giocatolli Sidermec/Italie

Amakipe akina amarushanwa akomeye ku Isi/World Tour Teams

• Israel Start-Up Nation/Israel

Uduce tugize Tour du Rwanda 2021

• Agace ka mbere: Tariki ya 2 Gicurasi: Kigali Arena- Rwamagana (ibilometero 115,6)

• Agace ka kabiri: Tariki ya 3 Gicurasi: Kigali- Huye (ibilometero 120.5)

• Agace ka gatatu: Tariki ya 4 Gicurasi: Nyanza- Gicumbi (ibilometero 171,6)

• Agace ka kane: Tariki ya 5 Gicurasi: Kimironko - Musanze (ibilometero 123,9)

• Agace ka gatanu: Tariki ya 6 Gicurasi: Nyagatare- Kimironko (ibilometero 149,3)

• Agace ka gatandatu: Tariki ya 7 Gicurasi: Kigali (KBC)- Kigali (Mont Kigali) (ibilometero 152.6)

• Agace ka karindwi: Tariki ya 8 Gicurasi:Kigali (Nyamirambo)- Mont Kigali ( ITT- ibilometero 4.5)

• Agace ka munani: Tariki ya 9 Gicurasi: Kigali (Canal Olympia)- Kigali (Canal Olympia) (ibilometero 75,3)

Tour du Rwanda igiye kuba ku nshuro yayo ya 13 kuva ibaye mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .