Perezida wa Ferwacy yatangaje impamvu Girubuntu atagiye kubagwa bigatuma asezera ku myaka 22

Yanditswe na Manzi Rema Jules
Kuya 19 Gashyantare 2018 saa 07:08
Yasuwe :
0 0

Perezida w’Ishyirahamwe ry’Umukino wo gusiganwa ku magare mu Rwanda, Bayingana Aimable, yatangaje ko kuba uwari nimero ya mbere mu kunyonga igare mu bakobwa mu gihugu atarabashije kujya kubagwa ku kibazo cy’amaguru afite atareshya bigatuma asezera imburagihe, ari ukubera inama z’abaganga bamusuzumye.

Kuri uyu wa Gatandatu tariki 17 Gashyantare 2018 nibwo Girubuntu Jeanne d’Arc yatangaje ko asezeye burundu ku mukino wo gusiganwa ku magare ku myaka 22 kubera ikibazo cy’amaguru atareshya cyamenyekanye mu myaka ibiri ishize ariko ntavuzwe kandi bituma iyo anyonga aribwa cyane.

Ni inkuru yabaye incamugongo ku bakunzi b’uyu mukino urimo kuzamuka cyane no kwigarurira imitima y’Abanyarwanda benshi muri iki gihe, kuko Girubuntu yari nimero ya mbere mu bakobwa akaba anafite amateka menshi ihariye arimo kuba yari asigaye ahangamura ibihanganye muri Afurika, kuba yaraserukiye igihugu muri shampiyona y’Isi akanitwara neza ndetse akaba yari icyitegererezo ku bangavu barota kugera ikirenge mu cye.

Nubwo uyu mukinnyi we yatangaje ko yatereranywe kandi yari afite icyizere ko ashobora gukira, Perezida wa Ferwacy, Bayingana Aimable kuri iki Cyumweru yasobanuye ko ikibazo afite atari uburwayi busanzwe ndetse ko kuba atarabazwe byatewe n’inama z’abanganga.

Yagize ati “Jeanne nta burwayi afite. Afite ikibazo kijyanye n’umubiri we agomba kuba yaravukanye. Ntabwo ari uburwayi bw’umuntu ni amaguru atareshya. Twaramuvuje uko dushoboye, tumujyana muri Faisal batubwira ko nta kindi babikoraho uretse kumuha akantu atiza mu nkweto gatuma amaguru areshya.”

Yakomeje agira ati “Twabajije abaganga batubwira ko kumuvuza nta kundi uretse kumujyana hanze bakamubaga ariko nabwo ko bamubaze nta cyizere cyaba gihari ko yagaruka mu mukino w’amagare. Ubwo rero birasaba imyitwarire myiza kugira ngo amenye uko akoresha ako kantu ko gutiza mu nkweto ndetse akanagabanya ibiro […] murumva ko ari ibintu bijyanye n’abaganga twe nta kindi twabikoraho.”

Avuga ku migendekere ya shampiyona ya Afurika u Rwanda rwari rwakiriye ku nshuro ya kabiri nyuma y’iya 2010, Bayingana yavuze ko yagenze neza cyane uko babyifuzaga kuko umubare w’abitabira wabaye mwinshi unaca agahigo k’izindi 12 zabanje akaba yanabiherewe igihembo cy’ishimwe na Dr. Mohamed Wagih Azzam uyobora Impuzamashyirahamwe y’Umukino wo gusiganwa ku magare muri Afurika.

Inkuru bifitanye isano: Girubuntu avuga ku isezera rye n’amateka ye mu gusiganwa ku magare

Girubuntu yasezeye imburagiye umukino w'amagare kubera amaguru atareshya
Perezida wa Ferwacy yasobanuye impamvu Girubuntu atagiye kubagwa
Perezida wa Ferwacy yashyikirijwe igihembo cyo gutegura neza iri rushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza