Nyabihu izitabira Rwanda Cycling Cup bwa mbere ifite Gasore wayegukanye ubushize

Yanditswe na Manzi Rema Jules
Kuya 19 Gicurasi 2017 saa 10:06
Yasuwe :
0 0

Ku nshuro ya mbere ikipe nshya ya Nyabihu Cycling Club iritabira isiganwa ry’amagare rimara umwaka rizenguruka igihugu “Rwanda Cycling Cup” rigeze ku gace ka gatatu kazakinwa kuri uyu wa Gatandatu 20 Gicurasi 2017, aho abasiganwa bazava mu Karere ka Ruhango bagasoreza i Karongi.

Aka gace kitiriwe Kwibuka abazize Jenoside yakorewe abatutsi 1994 ‘Race to Remember’ kareshya na kirometero 155,6 ku bakuru n’abari munsi y’imyaka 23; ibirometero 92,5 ku ngimbi na 82,7 ku bakobwa.

Ku nshuro ya mbere ikipe nshya y’Akarere ka Nyabihu “Nyabihu Cycling Club” izasiganwa muri iri rushanwa ikaba ifite umwe mu bakinnyi bakomeye, Gasore Hategeka, wegukanye Rwanda Cycling Cup 2016, akanaza ku mwanya wa 21 muri Tour du Rwanda.

Uyu musore w’imyaka 30, aganira na IGIHE yavuze ko icyemezo cyo kuva muri Benediction y’i Rubavu ajya muri Nyabihu Cycling Club byatewe n’uko ari akarere avukamo, byiyongereye ku nama yahawe n’uwari umutoza we, Sempoma Felix wamusabye ko yajya gufasha iyo kipe nshya kugira ngo umukino ukomeze kuzamuka hose.

Yagize ati “Tujya gutangira iyi kipe twaganiriye n’Akarere batubwira ko ubushobozi buhari kandi bashaka ko ikomera. Ikindi n’umutoza wanjye, Felix Sempoma nawe azatuba hafi, anadufashe mu myitozo no ku magare yo gukinisha kuko yarabitwijeje.”

Yakomeje agira ati “Intego ni uko nafasha bariya bana tuzajya dukinana kandi murabona ko ndimo kugenda ngana mu za bukuru, ngomba no gutangira kwiga gutoza ku buryo mu myaka iri imbere Nyabihu twagira ikipe ikomeye ihangana z’izindi.”

Mu bandi bakinnyi bagize ikipe ya Nyabihu yo gusiganwa ku magare harimo Ruberwa Jean Damascène, Nizeyimana Alex, Ndayambaje Djuma na Uwiragiye Théogene.

Nyabihu Cycling Club ije isanga andi nayo avutse vuba nka Karongi Vision Sport Center na Muhazi Cycling Generation zirimo gukina Rwanda Cycling Cup ya mbere ziyongereye ku yari asanzwe arimo Benediction Club y’i Rubavu, Les Amis Sportif y’i Rwamagana, Cine Elmay Cycling Club y’i Nyamirambo, Cycling Club for All y’i Huye na Fly Club ya Kicukiro.

Gasore (ibumoso) yari asanzwe akinira Benediction Club y'i Rubavu
Muri Tour du Rwanda umwaka ushize yabaye uwa 21 muri rusange
Gasore Hategeka niwe wegukanye Rwanda Cycling Cup 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza