Nsengimana na Uwizeyimana mu bazahagararira u Rwanda muri Grand Prix Chantal Biya

Yanditswe na Ishimwe Israel
Kuya 19 Nzeri 2018 saa 02:44
Yasuwe :
0 0

Nsengimana Jean Bosco na Uwizeyimana Bonaventure batoranyijwe mu bakinnyi batanu bazahagararira Ikipe y’Igihugu y’Umukino w’Amagare (Team Rwanda) mu irushanwa rya ‘‘Grand Prix Chantal Biya’’ ribera muri Cameroun.

Grand Prix Chantal Biya iri ku bipimo bya 2.2 ku ngengabihe y’Ishyirahamwe ry’Umukino w’Amagare ku Isi (UCI) izatangira ku wa 26 Nzeri, isozwe ku wa 30 Nzeri 2018.

Urutonde rw’abakinnyi bagize Team Rwanda rwashyizwe hanze n’Umutoza wayo, Sempoma Felix. Rugizwe na Nsengimana Jean Bosco na Uwiyeyimana Bonaventure bakinira Benediction Club y’i Rubavu; Rugamba Janvier; Manizabayo Eric na Uwiduhaye.

Aba bakinnyi bazahaguruka mu Rwanda ku wa 24 Nzeri 2018 mbere y’iminsi ibiri ngo irushanwa ritangire.

Nsengimana w’imyaka 24 mu 2016 yegukanye agace ka Kane kavaga Sangmélima kerekeza i Yaoundé ku ntera y’ibilometero 169. Uyu musore wakiniraga Stradalli - Bike Aid yo mu Budage yakoresheje amasaha 4:09:42.

Iri rushanwa rigiye kuba ku nshuro ya 18 rizitabirwa n’amakipe 10 arimo atatu yo muri Cameroun. Rizaba rigizwe n’uduce dutanu.

Grand Prix Chantal Biya ibera muri Cameroun kuva mu 2001. Iterwa inkunga n’Ishyirahamwe ryo gusiganwa ku magare muri iki gihugu. Ryitiriwe Chantal Biya, umugore wa Perezida wa Cameroun, Paul Biya.

Mu mwaka ushize, Grand Prix Chantal Biya yegukanywe n’Umunya-Cameroun w’imyaka 26 Clovis Kamzong Abessolo ukinira SNH Velo Club.

Uduce dutanu tugize Grand Prix Chantal Biya:

- Ku wa 26 Nzeri 2018: Douala – Douala, 92 km

- Ku wa 27 Nzeri 2018: Yaoundé -Nanga-Eboko, 152 km

- Ku wa 28 Nzeri 2018: Yaoundé – Ebolowa, 151 km

- Ku wa 29 Nzeri 2018: Sangmélima – Meyomessala, 134 km

- Ku wa 30 Nzeri 2018: Sangmélima – Yaoundé , 170 km

Nsengimana Bosco (wazamuye amaboko) ari mu bakinnyi batanu bazitabira isiganwa rya Grand Prix Chantal Biya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza