Niyonshuti Adrien yasobanuye ibye na Mugisha Moïse wamushinje kumukubita n’uko yanze amazi amuhaye ngo atamuroga

Yanditswe na Eric Tony Ukurikiyimfura
Kuya 26 Werurwe 2021 saa 08:43
Yasuwe :
0 0

Umutoza w’Ikipe y’Amagare ya SACA, Niyonshuti Adrien, yavuze ko nta rwango afitiye na Mugisha Moïse wamuciriye amazi ari mu modoka, agaragaza ko byose byatewe n’uwahoze ari umukanishi muri iyi kipe, Ntibitura Issa, washishikarije abakinnyi kwivumbura nyuma yo kwamburwa akazi k’ubutoza.

Kuva mu Ukwakira 2020, hatangiye kuvugwa ikibazo cya Niyonshuti Adrien na Mugisha Moïse kuri ubu ufatwa nk’umukinnyi wa mbere mu Rwanda mu magare nyuma yo kwigaragaza muri Tour du Rwanda iheruka, yabayemo uwa kabiri, no kwegukana Grand Prix Chantal Biya.

Mu mpera z’umwaka ushize, Mugisha Moïse yasabye gusesa amasezerano muri SACA , avuga ko yakubiswe na Niyonshuti Adrien.

Uyu mukinnyi uri mu bihano, aherutse guteguza abamukurikira kuri Twitter ko ashobora kutazakina Tour du Rwanda 2021 izaba muri Gicurasi.

Asobanura ikibazo afitanye na Mugisha Moïse, Niyonshuti Adrien, yavuze ko ari umutoza, atari Umuyobozi wa SACA.

Ati “Abantu bajye babitandukanya mu by’ukuri, ibyo bireba Perezida wa SACA na Visi Perezida, kimwe n’umuterankunga wa SACA [Umuyobozi wa SKOL]. Ibiri hagati yanjye na Moïse, SACA na federasiyo, buriya hari igihe bazicara bakavuga ngo turabona umwana ashobora gukina.”

Niyonshuti yavuze ko Mugisha Moïse ari umwana w’umuhanga mu mukino w’amagare ndetse amubonamo ubushobozi bwo gutwara Tour du Rwanda.

Ati “Nkurikije uko muzi, Moïse yitoje afite ubushobozi bwo gutwara iyi Tour du Rwanda, niyumva na we afite ubushake bwo kuyitwara ntekereza ko ntawe utazamuha ayo mahirwe. Hari amahirwe ko ashobora kuba yagaruka muri SACA akitabira Tour du Rwanda.”

Umutoza wa SACA yasobanuye ko ikibazo yagiranye n’umukinnyi we cyatangiriye ku mukanishi wahoze muri iyi kipe, Ntibitura Issa.

Ati “Maze kugera hano tugakora SACA, Moïse yari umwana mwiza witonda, ariko umuvandimwe Issa wari umutoza w’aba bana muri Fly [yahujwe na Les Amis Sports bigakora SACA] , hatangira kuzamo amakimbirane. Natwaye akazi ke k’ubutoza kandi ari umukanishi akaba n’umutoza. Naramubwiye nti menya akazi kawe k’ubukanishi nanjye nkore akanjya nk’umutoza, arambwira ngo oya uramvangira akazi, wantwariye akazi.”

Yakomeje agira ati “Icyo kintu ni cyo cyababaje Moïse, ngira ngo wumvise mu biganiro yagiye atanga ko yavuze ko nirukanishije umutoza we. Ntabwo namwirukanishije, ubwo niba amushaka azakomeze amutoze, abayobozi ba SACA ni bo bafite uko bazabigenza.”

Niyonshuti Adrien yavuze ko nyuma yo kugirana ikibazo na Ntibitura, bagerageje kugikemura, ariko avuga ko uyu mukanishi yabyanze.

Ati “Yaravuze ati njye sinzakorana na Adrien, ndavamo kandi ntware n’abakinnyi banjye. Ashyiramo poropagande [icengezamatwara] abakinnyi bose. Turicara ku munota wa nyuma Issa amaze gusezera azi ko abakinnyi bose bari bumukurikire, havamo Moïse gusa asaba icyumweru kimwe cyo kujya mu rugo akitekerezaho.”

“Avuye muri Chantal Biya [yakinanye na Team Rwanda] ni bwo yatangiye kuvuga ko bagenzi be bashaka kumwica, sinari mpari. No kuvuga ko nari nkubise Moïse cyangwa namukubise, ntakubeshye ari nawe wamukubita, nta mazi mfite hano ngo kwereke ibyo yankoreye, ndebe uko nawe witwara.”

Uyu mutoza yavuze ko bari mu irushanwa ryo mu muhanda yateguye, maze ubwo berekereza mu bice bya Gatuna, ahaye umukinnyi amazi ayamucira ari mu modoka.

Ati “Nabateguriye irushanwa riva hano mu Gatsata, bajya i Gatuna bakagaruka. Mu kuzamuka uriya musozi wa Rukomo, Moïse ni we wari umeze neza arabasiga, mu kwerekeza Gatuna nkurikira Moïse, mushyira amazi, mushyira Panache. Namuhaye amazi ararakara, ngo nyamuzaniye mu gihe kitari cyo. Yarayafashe arayanywa, ahita ayancira.”

“Ntibyashoboka kubyakira, ubundi iyo bishoboka nari guhita mva no mu modoka nkamukubita, naramwihoreye muhereza Panache mu icupa, Romeo na Didier bari bahari, twari kumwe mu modoka bambera abahamya. Yavuze ako atongera gufata amazi ngo namuroga. Issa [Ntibitura] yari kuri moto, akajya ajya kumuvomera ku mavomero yo ku musozi, ku muhanda.”

Niyonshuti Adrien wabaye umukinnyi ukomeye mu magare, agakinira amakipe atandukanye yabigize umwuga kugeza ku rwego rw’Isi, yasabye Ishyirahamwe Nyarwanda ry’Umukino w’Amagare [FERWACY] n’amakipe gushyiraho amategeko agenga abakinnyi kuko bari abafite imyitwarire yihariye.

Ati “Abakinnyi beza baraharari, ariko iyo ikinyabupfura kinaniranye hari igihe bikunanira kugera ku ntego wifuza. Moïse ni umwana muzima ufite impano, ariko akeneye abajyanama.”

“Ikintu nabwira Moïse ni uko nta kibazo mfitanye na we, ndamukunda, yiteguye kuza mu ikipe agakina, yaza.”

Yavuze ko kuri ubu yamaze gutoranya abakinnyi batanu bazakina Tour du Rwanda 2021 ndetse ateganya ko mu gihe Mugisha Moïse atayikina, hari abazamusimbura.

Ati “Mfite urutonde rw’abakinnyi batanu ukuyeho Moïse [Mugisha] ibye bitarasobanuka mu kuri ngo menye niba azakina cyangwa atazakina. Abakinnyi batanu barimo abo mwabonye ubushize barimo Seth [Hakizimana] ari we kapiteni, Jean Eric [Habimana], Dukuzumuremyi Ali Fidèle, ni ubwa kabiri bazaba bakinnye Tour du Rwanda, ubushize bakinnye iya 2,1 bitwara neza kandi batarakinnye iya 2,2, nkeka ko uyu mwaka bazaba bumva ko bashobora no kuyitwara.”

“Moïse ibye nibisobanuka azaba ari mu bakinnyi bazakina, nibidasobanuka hazaba hari uwo bita Nshimyumuremyi Janvier, ni umwana w’imyaka 20 ushobora na we kwerekana ko afite impano muri Tour du Rwanda. Hakabaho Gashiramanga Eugène uri ku rutonde rw’agateganyo, Niyonshuti Jean Pierre w’imyaka 20 na Nsabimana Jean Baptitse.”

Skol Adrien Cycling Academy (SACA) ni imwe mu makipe atatu yo mu Rwanda arimo Ikipe y’Igihugu, ari muri 16 azakina Tour du Rwanda izaba hagati ya tariki ya 2 n’iya 9 Gicurasi 2021.

Umutoza wa SACA, Niyonshuti Adrien, yavuze ko Mugisha Moïse yagumuwe n'uwahoze amutoza we ndetse yamuciriye amazi ari mu modoka
Mugisha Moïse wabaye uwa kabiri muri Tour du Rwanda 2020, ari mu bihano yafatiwe na SACA ndetse aherutse kugaragaza ko ashobora kudakina irushanwa ry'uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .