Kwamamaza

Ni mwuka ki uri mu bakinnyi bazitabira Tour du Rwanda ya 2016?

Yanditswe kuya 4-11-2016 saa 09:24' na Manzi Rema Jules


Mu gihe habura iminsi 10 ngo irushanwa mpuzamahanga ry’amagare rizenguruka u Rwanda “Tour du Rwanda 2016” ritangire, abakinnyi bazaserukira igihugu kuri ubu bari mu mwiherero i Musanze, baravuga ko nta kibazo na kimwe bafite kuko ubuyobozi bubari hafi intego ikaba ari ukwisubiza iri rushanwa.

Tour du Rwanda igiye kuba ku nshuro ya munani kuva muri 2009 yaba mpuzamahanga, izitabirwa n’abakinnnyi 84 bo mu makipe 17 akomoka ku migabane yose y’Isi harimo atatu azahagararira u Rwanda (Les Amis Sportif, Benediction Club na Team Rwanda).

Mbere y’uko iryo rushanwa nyir’izina ritangira, IGIHE yasuye abakinnyi bose uko ari 15 bazahagararira u Rwanda mu makipe atandukanye bari kumwe n’abakina mu makipe yo hanze nka Ndayisenga Valens na Bonaventure Uwizeyimana ba Team Dimension Data yo muri Afurika y’Epfo na Nsengimana Jean Bosco wa Bike Aid aho bari mu mwiherero i Musanze.

Igihe nk’iki umwaka ushize, ubwo bari mu mwiherero wateguraga Tour du Rwanda ya 2015 hajemo agatotsi, abakinnyi bamwe barivumbura ariko ubuyobozi bubyitwaramo neza burabihosha ndetse iryo rushanwa ryegukanwa n’Umunyarwanda, Nsengimana Jean Bosco. Gusa noneho kuri ubu ngo umwuka ni mwiza kurusha ibihe byose byashije nk’uko aba bakinnyi babitangaza.

Nsengimana Jean Bosco uzaba wambaye nimero ya mbere nk’icyubahiro cyo kuba ariwe wegukanye iri rushanwa riheruka, gusa utazaba akinira u Rwanda kuko yamaze kuba uwabigize umwuga mu Budage mu ikipe ya Bike Aid, avuga ko mu mwiherero bameze neza kandi ko biteguye gufatanya nk’Abanyarwanda batitaye ku makipe bakinamo kugira ngo barwanire ishema ry’igihugu.

Ati “Abantu benshi barumva ko kuba mfite irushanwa ry’ubushize bimpa amahirwe yo kuryisubiza; yego nibyo kandi nanjye ndabishaka kandi ndakora cyane kugira ngo bibe byashoboka. Gusa bibuke ko uyu mukino udashobora gukina wenyine ngo ugire icyo ugeraho.”

“Birumvikana sinzaba nkinira u Rwanda ariko sinshobora kwibagirwa igihugu cyanjye. Nibiba ngombwa ko ntafata umwenda w’umuhondo ugafatwa na mugenzi wanjye w’Umunyarwanda, niteguye ijana ku ijana kumufasha kuwugumana nta kibazo.”

Patrick Byukusenge wabaye uwa kabiri umwaka ushize kuri ubu akaba ariwe uzaba ayoboye ikipe ya Benediction, avuga ko ubuyobozi buri kubaba hafi cyane, ku buryo ngo nta gushidikanya bagomba kwegukana iri rushanwa.

Ati “Uyu mwaka tumeze neza kurusha ubushize, mu by’ukuri twunze ubumwe cyane kandi umuyobozi (Aimable Bayingana) yaradusuye mu Cyumweru gishize nta kibazo. Ubu intego dufite ni imwe, kwegukana irushanwa kandi nta kabuza bizashoboka.”

Byukusenge Nathan, umwe mu bakinnyi bafite ubunararibonye cyane muri uyu mukino dore ko agiye gukina Tour du Rwanda ku nshuro ya munani kuva 2009, avuga ko nk’uko byagenze mu myaka ishize ngo yiteguye gutanga umusanzu we haba mu nama n’amayeri ku bakinnyi bashya bazaryitabira.

Ati “Kuba noneho hazakina amakipe asanzwe aho kuba Muhabura, Karisimbi n’Akagera nk’uko byari bisanzwe, bizongera imbaraga no gukora cyane bihereye ku makipe ya hano kuko buri yose izaba ishaka kuryegukana.”

Kuba Team Rwanda irimo abakinnyi bakuze kandi bafite ubunararibonye nka we na Gasore Hategeka bayikinnye inshuro umunani na Ruhumuriza Abraham uyikinnye inshuro zirindwi, avuga ko ari ikintu gishobora gutuma bakoresha ubwo bunararibonye ndetse n’imbaraga z’abana bakiri bato nka Nduwayo Eric na Biziyaremye Joseph bakaba banegukana iri rushanwa ry’uyu mwaka.

Umutoza Jock Boyer ubana n’aba bakinnyi umunsi ku munsi nawe yadutangarije ko akurikije uko abakinnyi bameze, Tour du Rwanda ya 2016 ishobora kuzasiga isura nshya y’uyu mukino mu banyarwanda n’abazayikurikirana bose.

Ati “Uyu mwaka amakipe arakomeye cyane. Hari Dimension Data izazana abasore nka Valens (Ndayisenga), Bike Aid ya Bosco (Nsengimana), hari ikipe yo muri Canada kandi nziza n’andi menshi kandi yose arashaka gutsinda. Ndakeka ko iri rizaba irushanwa rya mbere ryiza cyane kuko harimo n’inzira ebyiri nshya kandi zizaryohera abantu.”

Ubwo twasuraga uyu mwiherero kuri uyu wa Kane, Nsengimana Jean Bosco na Ndayisenga Valens bari barwaye ku buryo batakoze imyitozo ariko Umutoza Boyer yavuze ko atari ibintu bikomeye ku buryo bagiye kuruhuka ariko nka nyuma y’iminsi ibiri bashobora gukomeza imyitozo kimwe n’abandi.

Tour du Rwanda y’uyu mwaka izatangira tari 13 isozwe kuri 20 Ugushyingo, inyure mu bice bitandukanye by’igihugu birimo na Karongi- Rusizi na Rusizi- Huye, inzira nshya zashyizwe muri iri rushanwa mu rwego rwo guha amahirwe Abanyarwanda bose yo kureba uyu mukino ukunzwe cyane muri iki gihe.

Umwuka mu bakinnyi ngo ni mwiza ku buryo biteguye kwitwara neza
Ibiganiro biba ari byose n'abatoza babo
Bayingana uyobora FERWACY (wambaye umuhondo) yasuye abakinnyi anerekwa amagare azakoreshwa mu irushanwa
Ubuyobozi bwa FERWACY busura aba bakinnyi bukareba uko bameze mbere y'uko irushanwa nyir'izina ritangira
Gasore Hategeka avuga ko yifuza kwegukana Tour du Rwanda y'uyu mwaka
Mugisha Samuel agiye gukina Tour du Rwanda ku nshuro ya mbere
Aba bakinnyi babyukira mu myitozo bitegura Tour du Rwanda 2016 isigaje iminsi icumi
Uretse kwitoreza mu muhanda, aba bakinnyi banitoreza ku byuma byabugenewe biri mu kigo cyabo
Patrick Byukusenge avuga ko bafite icyizere cyo kuzegukana iri rushanwa
Boyer utoza aba bakinnyi yemeza ko irushanwa ry'uyu mwaka rizaba ari ryiza kandi rikomeye
Nsengimana urwaye bidakomeye ngo yiteguye gufatanya na bagenzi be kurwanira ishema ry'igihugu cyabo
Ruhumuriza Abraham na bagenzi be bafite ubunararibonye muri iri rushanwa ngo bazabukoresha banaryegukane
Ikigo aba bakinnyi b'umukino w'amagare bari gukoreramo umwiherero

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved