Kwamamaza

Ndayisenga Valens yagaruye icyizere cyo kwandika amateka mashya muri Tour du Rwanda

Yanditswe kuya 15-11-2016 saa 20:47' na Manzi Rema Jules


Nyuma yo kwegukana agace ka Kigali – Karongi muri Tour du Rwanda 2016 akanambara umwenda w’umuhondo, Ndayisenga Valens yatangaje ko ubu intego afite ari ukuryegukana bwa kabiri, agakora amateka atarakorwa n’undi mukinnyi muri iri rushanwa kuva ryaba mpuzamahanga mu myaka irindwi ishize.

Ndayisenga kuri ubu ukinira Dimension Data for Qhubeka yo muri Afurika y’Epfo, niwe Munyarwanda wa mbere wabashije kwegukana Tour du Rwanda muri 2014 nyuma y’imyaka itanu yari imaze ibaye mpuzamahanga.

Uyu musore wazamukiye mu ikipe ya Les Amis Sportif y’i Rwamagana, ntiyahiriwe ku gace gafungura iri rushanwa (prologue) kabaye ku Cyumweru, tariki 13 Ugushyingo, bazenguruka stade Amahoro kuko yasoje ari uwa gatandatu asizwe amasegonda atanu na Rugg Timothy wakegukanye.

Ku wa Mbere bava i Kigali bajya i Ngoma, n’ubundi uyu mukinnyi w’imyaka 22 ntibyagenze uko yabyifuzaga, kuko yageze ku murongo mu kivunge cy’abandi benshi ariko nyuma yo kubara ibihe bakoresheje yisanga ku mwanya wa gatatu arushwa amasegonda abiri gusa na Areruya Joseph wari uyoboye abandi ku rutonde rusange.

Nk’uko yabitangaje mbere y’uko Tour du Rwanda 2016 itangira ko intego ye ntakuka ari ukwegukana irushanwa ry’uyu mwaka akaba umukinnyi wa mbere mu mateka uyegukanye kabiri kuva yaba mpuzamahanga, yongeye kubisubiramo nyuma yo kwanikira abandi kuri uyu wa Kabiri mu gace ka Kigali-Karongi, asize Umunya-Kenya, Suleiman Kangangi wabaye uwa kabiri ho umunota n’amasegonda atandatu.

Ati “Nifuzaga gutwara aka gace kuko nari maze igihe ntatsinda, ikindi kandi n’Abanyarwanda bari bakeneye kubona Umunyarwanda yongeye gutwara agace kuko ni ibintu baba bakeneye. Baba baratakaje amafaranga menshi muri iri rushanwa, baba bakeneye intsinzi. Cyari igihe ngo umuntu abagarurire icyizere kuko barababaye ku munsi wa mbere natwe turabibona.”

Yakomeje agira ati “Nubwo ejo [ku wa Mbere] Areruya yegukanye umwenda w’umuhondo, Abanyarwanda bamaze gusobanuka ntabwo wabakangisha uwo mwenda, basigaye bazi kureba bakibaza bati ’ese harimo ibihe bingana iki? Ese bazayitwara? Byari ngombwa ko nshyiramo ibihe byinshi kugira ngo bagire icyizere noneho tuzarebe no mu yindi minsi izakurikiraho.’”

Yemeza ko icyizere cyo kwegukana Tour du Rwanda ku nshuro ya kabiri no gushyiraho agahigo gashya cyagarutse.

Ati “Rimwe na rimwe ibintu birahinduka, hari ubwo ushobora gusiga abandi n’iminota itatu ariko irushanwa nturyegukane. Gusa kuri njye, n’amasegonda 30” arahagije nkurikije uko meze n’uko niyizera.”

Nubwo atazoroherwa na Areruya Joseph na bagenzi be bashaka kongera kwisubiza umwenda w’umuhondo, Ndayisenga afitiye icyizere ikipe ye by’umwihariko Abanya-Eritera Gebreigzabhier Amanuel na Eyob Metkel ari na bo bakoze akazi gakomeye uyu munsi kugira ngo bamuheshe kwegukana aka gace.

Kugeza ubu ku rutonde rusange, Ndayisenga yamaze gushyiramo intera y’umunota n’amasegonda 25 hagati ye na Areruya Joseph wa kabiri, agasiga undi munyarwanda Nsengimana Jean Bosco umunota umwe n’amasegonda 26, mu gihe umunyamahanga uza hafi ari Okubamariam Tesfom, Umunya -Eritrea asiga umunota n’amasegonda 32.

Kuri uyu wa Gatatu, iri siganwa rizakomereza Karongi-Rusizi, kuva saa tatu za mu gitondo mu rugendo rwa kilometero zigera ku 124.

Nyuma yo kwegukana agace Kigali-Karongi, Valens Ndayisenga avuga ko icyizere cyo kwegukana Tour du Rwanda gihari
Ndayisenga avuga ko yakoresheje ingufu nyinshi kugira ngo atsinde mu rwego rwo gushimisha abanyarwanda
Valens yakuye ku mwanya wa mbere Areruya (wambaye umuhondo) wari wawufashe ku gace Kigali - Ngoma
Nsengimana Jean Bosco (iburyo) nawe ari mu bahabwa amahirwe yo kwambura umwanya wa mbere Ndayisenga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved