Kwamamaza

Ndayisenga Valens na Eyob Metkel mu ihurizo rikomeye kuri Dimension Data

Yanditswe kuya 18-11-2016 saa 20:33' na Jah d'eau DUKUZE


Isiganwa mpuzamahanga rizenguruka u Rwanda ku nshuro ya munani, riri kugana ku musozo, ahasigaye uduce tubiri ngo risozwe. Ubivuze neza, hasigaye agace kamwe ngo hamenyekane utsinda kuko nta mukinnyi n’umwe wari wananirwa kuryegukana mu gihe ageze ku munsi wa nyuma ayoboye.

Mu mateka, Merhawi Kudus, ni we waje kurekura ku munota wa nyuma ubwo Lil Darren yarimutwaraga ku gace kabanziriza akanyuma, aka kanavaga i Rubavu kerekeza i Kigali, nyamara uyu munya-Eritrea ukiri muto yari amaze igihe ayoboye. Iyi si inkuru nziza ku banyarwanda.

Nyuma y’agace Rusizi-Huye, Ndayisenga Valens, yatangarije itangazamakuru ko yizeye kuzegukana Tour du Rwanda 2016, ku kigero cya 85%. Iki cyizere ariko cyaje kugabanuka, ubwo yabonaga umunya-Eritrea Eyob Metkel akuramo amasegonda 46 ku munota umwe n’amasegonda 20 yamurushaga mbere y’uyu wa gatanu, maze ku nshuro ya mbere kuva yakwambara uyu mwenda w’umuhondo aza gutangaza ko “Bishoboka ko yawutakaza”.

Merhawi Kudus yaje gutakaza Maillot Jaune ku munsi ubanziriza uwanyuma wa Tour du Rwanda 2012, birangira abaye uwa kane

Amateka ya Tour du Rwanda, ubundi yagahaye amahirwe uyu musore wegukanye iri rushanwa mu mwaka wa 2014, kuko kuva ryagirwa mpuzamahanga, inshuro zose uretse imwe, uwaryegukanaga yabaga ava mu ikipe imwe n’umukurikiye.

Inshuro ya mbere bitabaye ni mu mwaka wa 2013, ubwo Dylan Girdlestone wakiniraga igihugu cya Afurika y’Epfo yazaga kuryegukana, agakurikirwa na Luis Mentjes we wakiniraga MTN Qhubeka nubwo na we bakomokaga mu gihugu kimwe.

Ugendeye kuri aya mateka, Ndayisenga Valens yakwizera ko kuba Eyob Metkel yamusatiriye mu bihe, ari ikimenyetso cy’uko agiye kumukorera kurushaho nkuko byagiye bigenda mu yandi marushanwa atambutse, cyane ko aba bakinnyi bahuriye mu ikipe imwe ya Dimension Data for Qhubeka, aho kubibona nko kumushyiraho igitutu cyo gushaka kumwigaranzura.

Ubwo aba bakinnyi babazwaga niba kuba begeranye bitagiye kubahanganisha kandi bakina mu ikipe imwe, baje kubisubiza ku buryo butandukanye. Ndayisenga Valens yagize ati "Ku ruhande rumwe ndishimye kuba umukinnyi dukinana yatsinze, gusa ku rundi ruhande birababaje kuko uyu uri kunsatira ni umunyamahanga, abanyarwanda bagakwiye kumfasha ariko ntabwo bari kubakora".

Yakomeje agira ati "Birashoboka ko natakaza uyu mwenda w’umuhondo kuko uyu mukinnyi unkurikiye yatatse (agiye) ntabwo namugarura kuko dukinana, ntabwo byoroshye kugumana uyu mwenda”.

Eyob Metkel wegukanye umwanya wa gatatu muri Tour du Rwanda ya 2013, yagize ati "Ntabwo duhanganye, turakinana, turacyafite umwenda w’umuhondo ni uwa Valens ni wo tugiye kugerageza kugumana, icyo duhatanira gusa ni ukwegukana uduce dutandukanye”.

Ni iyihe mpamvu Valens yatinya Eyob Metkel kandi bakina mu ikipe imwe?

Ubundi umukino w’amagare urihariye, buri kipe ikomeye iba akenshi ifite umukinnyi umwe igomba gukorera “Leader”, bivuze ko bagenzi be baba bagomba kumufasha kwegukana isiganwa ku buryo bwose bushoboka mu gihe ari muzima.

Mbere ya Tour du Rwanda, Dimension Data yari yatangaje ko izakorera Valens, gusa uko iri rushanwa rigenda rijya imbere, birasa nkaho mu mutwe wa Eyob Metkel haba harimo ko nawe ashaka gutsinda.

Gebreigzabhier Amanuel wa Dimension Data aganira na Merawi Kibrom wa Eritrea mbere y'agace k'uyu munsi

Valens na Metkel ariko, baramutse bashatse gutsinda bombi ntabwo bwaba ari ubwa mbere bibaye mu mukino w’amagare. Mbere ya Tour de France ya 2013 habanje kuba impaka ndende kuzaba ari umukinnyi ngenderwaho mu ikipe ya Sky yo mu Bwongereza, hagati ya Chris Froome na Bradley Wiggins wari wegukanye irushanwa ryabanje.

Intambara y’amagambo yaratangiye hagati y’aba bagabo bombi bahiganaga ubutwari, binakomereza ku bakunzi babo, imbuga nkoranyambaga ziracicikana gusa birangira n’ubundi Froome ari we ubaye umukinnyi ngenderwaho nyuma ariko y’imvune ya Wiggins. Uyu Chris Froome byaje kurangira yegukanye Tour de France 2013.

Tugarutse kuri Valens na Eyob, umuntu wese ukurikiranira hafi umukino w’amagare, arabizi ko kuva kera hagiye habaho guhangana hagati y’abanyarwanda n’abanya-Eritrea cyane ko ari bimwe mu bihugu bikomeye muri uyu mukino ku mugabane wa Afurika.

Kuba Valens na Eyob bahatana kandi bava mu ikipe imwe (nubwo ntawahamya ko ari ko bimeze), ntabwo byaba ari igitangaza ahanini kubera ko ibi bihugu byombi binasanzwe bihigana ubutwari muri uyu mukino.

Valens na Metkel baba bagiye kuba Froome na Wiggins ba Afurika?

Ibi biranigaragaza mbere ya buri gace, kuko mu gihe ku ruhande rumwe, Valens Ndayisenga aba avugana n’abanyarwanda bari mu yandi makipe, ku rundi ruhande Eyob Metkel we aba yiganirira n’abanya-Eritrea bake basigaye mu isiganwa,uhereye kuri Gebreigzabhier Amanuel bakinana mu ikipe imwe.

Dimension Data, ku ruhande rumwe barishimye kubera ko abakinnyi bayo babiri ari bo bayoboye isiganwa, gusa ihurizo rikomeye ni ukumenya uburyo iri buze kuganiriza aba bakinnyi kuri uyu mugoroba, ngo bongere kubumvisha no kwemeza aba banya-Eritrea ko bagomba gufasha Valens kwegukana isiganwa.

Ku rundi ruhande ariko hari Ndayisenga Valens, uri kwibaza impamvu abanyarwanda bene wabo batari kumufasha, mu gihe abanya-Eritrea bahuje ikipe bagenda bashaka kumucaho aho kumusunika.

Ukuri aha ni uko agace kabanziriza akanyuma ka Tour du Rwanda kari buze kuryoha kurushaho. Ku i saa 10:00 zo kuri uyu wa Gatandatu, ni bwo amagare ari buhaguruke i Musanze yerekeza i Kigali-Nyamirambo, mu nzira abanyarwanda bitwayemo neza mu mwaka ushize. Impinduka zabaye muri iyi nzira, ni uko gahunda yo kuzenguruka mu Rugunga itagikozwe, abasiganwa bazava Nyabugogo, bazamuke Kimisagara no kwa Mutwe basoreza kuri stade i Nyamirambo.

Ese Ndayisenga Valens ari buze kubikora nka Bosco Nsengimana ashimangire intsinzi? Cyangwa biri bumugendekere nka Merhawi Kudus muri 2012 ubwo ryamunyuraga mu myanya y’ipine? Imana yirirwa ahandi igataha i Rwanda, abayakira bayifate neza izasibire, maze kuri uyu wa gatandatu yirirwe mu rwa Gasabo.

Jean Bosco Nsengimana yari yitwaye neza muri izi nzira agera i Nyamirambo ari uwa mbere

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved