Ndayisenga Valens arifuzwa n’ikipe yo muri Pologne

Yanditswe na Ngabo Roben
Kuya 10 Ukwakira 2018 saa 04:34
Yasuwe :
0 0

Ndayisenga Valens ugiye kumara ukwezi adakina kubera imvune, arifuzwa n’ikipe yo muri Pologne yitwa ‘CCC–Sprandi–Polkowice’.

Uyu mukinnyi ufite Tour du Rwanda ebyiri, yakinnye mu makipe atandukanye nka; Team Dimension Data for Qhubeka, Tirol Cycling Team yo muri Autriche na POC Côte de Lumière yo mu Bufaransa, yarangijemo amasezerano y’umwaka umwe.

Ndayisenga yabwiye IGIHE ko agiye kugaruka mu Rwanda ariko hari amakipe amwifuza harimo n’iyo yari asanzwemo yifuza kumwongerera amasezerano.

Ati “Hari amakipe atandukanye anyifuza ariko gutangira ibiganiro nayo ntibyihutirwa kuko ndacyafite igihe cyo gutekereza no guhitamo. Ubu mfite imvune ngiye kumara ibyumweru hagati ya bitatu na bine ntakina, muri uku kwezi tuzagaruka mu Rwanda mbanze nkire mbone gutekereza ku mwaka w’imikino utaha.”

Uyu mukinnyi w’imyaka 24 aherutse gukora impanuka mu isiganwa ry’umunsi umwe ‘Tour de Vendée’ ryabereye mu Bufaransa ntiyarisoza kuko yagize ikibazo cy’imvune ku rutugu rw’ibumoso anababara mu gatuza, byatumye abaganga b’ikipe ye POC Côte de Lumière bemeza ko agomba kumara ukwezi adakina.

Nubwo Ndayisenga atifuje kuvuga amazina y’amakipe amwifuza ariko amakuru agera kuri IGIHE yemeza ko imwe muri yo ari CCC–Sprandi–Polkowice yo mu gihugu cya Pologne iri mu cyiciro cya gatatu muri gahunda ya UCI.

Umukino wo gusiganwa ku magare by’umwuga ugira ibyiciro bitatu by’amakipe akina hirya no hino ku isi yemewe n’impuzamashyirahamwe yawo ku isi ‘UCI’ (Union Cycliste Internationale).

Icyiciro cya mbere kibamo 18 amakipe akomeye kurusha andi ku isi bakita ‘World Tour Team’.

Icyiciro cya kabiri cy’ababigize umwuga kibamo amakipe 27, naho ikiciro cya gatatu ari nacyo ikiciro iyi kipe ‘CCC–Sprandi–Polkowice’ iherereyemo kibamo amakipe 176 ku Isi.

Amaze imyaka itatu akina amarushanwa yo ku mugabane w'u Burayi
Arangije amasezerano y'umwaka umwe yari yasinye muri POC Côte de Lumière yo mu Bufaransa
Ndayisenga ashobora gukinira CCC–Sprandi–Polkowice yo muri Pologne umwaka utaha
Uhereye ibumoso, Didier Munyaneza, Rene Ukiniwabo Jean Paul, Valens Ndayisenga uhambiriye kubera imvune na Jean Claude Uwizeye bagiye kugaruka mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza