Kwamamaza

Ndayisenga na Nsengimana mu mihigo yo kwegukana Tour du Rwanda 2016

Yanditswe kuya 5-11-2016 saa 11:55' na Manzi Rema Jules


Mu gihe iminsi irushaho kwicuma isatira tariki 13 Ugushyingo 2016, ubwo irushanwa mpuzamahanga rizenguruka u Rwanda “Tour du Rwanda 2016” rizaba ritangira ku nshuro ya munani, niko imihigo irushaho kuba myinshi hagati y’abakinnyi batandukanye buri wese ahamya ko uyu mwaka azitwara neza.

Mu mwiherero baherereyemo i Musanze, abakinnyi 15 bazaserukira u Rwanda mu makipe atatu (Les Amis Sportif, Benediction Club na Team Rwanda) ndetse n’Abanyarwanda bakina hanze nk’ababigize umwuga bakomeje imyitozo ikarishye bitegura iri rushanwa.

Ubwo kuwa Kane w’iki Cyumweru, IGIHE yabasuraga muri uyu mwiherero bazavamo batangira irushanwa nyir’izina, yasanze abakinnyi babiri begukanye iri rushanwa mu myaka ibiri ishize barimo Nsengimana Jean Bosco wayitwaye 2015 na Ndayisenga Valens muri 2014 barwaye ariko mu buryo budakomeye.

Aba bakinnyi bombi nubwo batazakinira u Rwanda kuko bamaze kubona amakipe yabigize umwuga, Ndayisenga Valens muri Team Dimension Data yo muri Afurika y’Epfo na Nsengimana Jean Bosco muri Bike Aid mu Budage, ni bamwe mu bahabwa amahirwe menshi cyane yo kwegukana iri rushanwa.

Gusa nk’uko muri 2014 Ndayisenga yegukanye iri rushanwa ariko akazi kenshi kakozwe na Nsengimana wamugendagaho amukorera akaza kubimwishyura muri 2015 nawe akamufasha cyane kugeza yegukanye iryo rushanwa, kuri ubu barahamya ko iki ari cyo gihe ngo barebe uhiga undi kuko bazaba bakina mu makipe ahanganye.

Mu kiganiro Ndayisenga yagiranye na IGIHE yagize ati “Imyitozo narayikoze ihagije, nagiye i Burayi, njya gukina shampiyona y’Isi kandi nitwara neza. Ningira amahirwe muri iyi minsi itatu nkaba nakize malaria mfite ku buryo nzatangira imyitozo."

Yakomeje agira ati “Kuri ubu Bosco (Nsengimana) sinakongera kumufasha. Na kwa kundi umuntu ava mu bandi akagenda, ntazagenda ngo mureke. Ubu noneho Bosco tuzacungana. Ikindi kuko n’amakipe yacu atuzi, iye izamusaba kuncunga kandi ndabizi bazansaba kutamuvaho. Bivuze ngo uzabasha kwitwara neza hagati yanjye na we, azabikesha gukora cyane kw’ikipe ye.”

Ku ruhande rwa Nsengimana we avuga ko azakina adahanganye na Ndayisenga kuko azi neza ko gutsinda bigoye aramutse ashyize ijisho ku muntu umwe ahubwo yiteguye gukora cyane kugira ngo azandikishe amateka yo kongera kwegukana Tour du Rwanda.

Ati “Mfite icyizere cyo kwisubiza Tour du Rwanda nk’umwaka ushize, kuri ubu abakinnyi bandi tuzakinana ubu bari mu myitozo mu Budage, bazaza bansange hano, kuba tutarimo gukorana si ikibazo kuko icya mbere ni ugukorera hamwe nk’ikipe. Ku bwanjye niteguye no kuba nakorera Umunyarwanda waba yambaye umwenda w’umuhondo kuko icyo ndeba ni ishema ry’Igihugu.”

Aba bakinnyi bombi bagaruka ku musore na we umaze kwigaragaza cyane, Areruya Joseph wegukanye agace ka kabiri bava Rusizi-Huye banyuze muri Nyungwe mu byumweru bibiri bishize, mu irushanwa ryo gutegura Tour du Rwanda bavuga ko we n’ikipe ye, Les Amis Sportif bashobora kuzabaha akazi gakomeye.

Areruya na we yatangarije IGIHE ko kuba yarabaye uwa kabiri umwaka ushize ndetse akaba yaranakomeje kwitwara neza mu marushanwa yitabiriye yaba mu Rwanda no hanze ari ikimenyetso ko igihe ikipe ye yamukinira neza bishoboka kwambara umwenda w’umuhondo.

Ati “Bizadusaba gukora cyane mu ikipe yacu ariko izo nzozi zo kuririmbirwa indirimbo y’igihugu natwe turazifite. Bibaye byiza nanjye nayitwara, imbaraga ndazifite kandi ubushize nabaye uwa kabiri ubu bimpa icyizere nanjye.”

Ku mutoza Jock Boyer we ntabona aba basore ko aribo bazaba bahanganye kuko uretse n’abazava hanze nabo bashaka gutsinda no mu gihugu imbere hari abandi bakinnyi bakomeye nka Patrick Byukusenge na Areruya Joseph ku buryo bitakorohera ushaka gutsinda wenyine ahubwo akaba yasabye abakinnyi bose b’Abanyarwanda gushyira hamwe kugira ngo bazabashe gutsinda.

Tour du Rwanda izatangira kuri 13-20 Ugushyingo 2016 yitabirwe n’abakinnyi bagera kuri 84 babumbiye mu makipe 17 ava hirya no hino ku Isi.

Ku ruhande rw’u Rwanda, amakipe atatu azakina iyi mikino arimo Team Rwanda igizwe na Byukusenge Nathan, Nduwayo Eric, Gasore Hategeka, Ruhumuriza Abraham na Biziyaremye Joseph.

Iya kabiri ni Benediction Club igizwe na Byukusenge Patrick, Mugisha Samuel, Ruberwa Jean, Nizeyimana Alex na Karegeya Jeremy mu gihe iya gatatu, Les Amis Sportifs igizwe na Uwizeye Jean Claude, Areruya Joseph na Tuyishimire Ephrem na Twizerane Mathieu na Hakiruwizeye Samuel.

Inkuru bifitanye isano:

Nsengimana Jean Bosco yegukanye agace gategura Tour du Rwanda

Impinduka mu makipe azitabira ’Tour du Rwanda 2016’

Ni mwuka ki uri mu bakinnyi bazitabira Tour du Rwanda ya 2016?

Ndayisenga Valens ashaka kwegukana Tour du Rwanda ya kabiri
Nsengimana Jean Bosco ashaka gukora amateka akegukana Tour du Rwanda ku nshuro ya kabiri yikurikiranya
Areruya Joseph atangaza ko ashaka kwegukana Tour du Rwanda uyu mwaka
Umutoza Jock Boyer avuga ko bazasaba abakinnyi gushyira hamwe kugira ngo babashe gutsinda
Urutonde rw’abakinnyi 84 bavuye mu makipe 17 azitabira Tour du Rwanda yatangajwe

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved