00:00:00 IGIHE NETWORK KN KINYARWANDA EN ENGLISH FR FRANCAIS

Musanze Cycling Club irateganya gutegura amarushanwa yo gusiganwa ku magare

Yanditswe na Eric Tony Ukurikiyimfura
Kuya 31 Ukwakira 2021 saa 08:27
Yasuwe :
0 0

Ikipe y’Amagare ya Musanze Cycling Club [MCC] iteganya kuzajya itegura amarushanwa y’uyu mukino kugira ngo irusheho gutanga umusanzu mu iterambere ryawo nk’imwe mu ntego yihaye ishingwa.

Musanze Cycling Club ni imwe mu makipe 14 y’abagabo yitabiriye “Irushanwa ryo gukunda Igihugu” ryegukanywe na Areruya Joseph ukinira Benediction Ignite.

Mu bakinnyi bayo batanu bari bitabiriye iri rushanwa, nta n’umwe wasoje nk’uko byagenze ku bandi 43 bo mu makipe atandukanye kuko iri rushanwa ryarimo abakinnyi 58 b’abagabo, ryasojwe n’abakinnyi 10 gusa.

Umuyobozi Mukuru wa MCC, Bizimana Festus, yabwiye IGIHE ko nubwo nta mukinnyi wabo wasoje isiganwa ariko bishimiye uko abakinnye bitwaye kuko ari inshuro yabo ya mbere.

Ati “Ikipe ihagaze nk’ikipe nshyashya yitabiriye bwa mbere kuva ishinzwe, ariko urebye uko yitwaye ni byo twari twiteze, ntabwo twatunguwe. Abana baracyari bato, ni ubwa mbere bakinanye n’abandi benshi, ariko byagaragaye ko bamaze kumenyera. Tubonye amasomo y’ibyo bagomba kwitaho.”

Mu gihe amikoro make ari mu bikunze kugora amakipe menshi mu Rwanda bigatuma asenyuka cyangwa agasubira inyuma, Bizimana yavuze ko nyuma y’umwaka umwe iyi kipe ishinzwe hari uburyo bateganyije ko igomba kubaho kandi babihaye icyerekezo kizima.

Ati “Dutangiza iyi kipe nabwiye abantu ko udashyiraho ikipe byo kuyishyiraho, ni nko gushyiraho ikigo cy’ubucuruzi, ugomba kuyishyiraho ufite gahunda n’icyorezo. Umukino w’amagare ni byo urahenda ariko urabona mu mwaka, tumaze kugira amagare umunani, dufite abakinnyi umunani, dutuza abakinnyi hamwe, turi mu makipe make afite ahantu akorera hazwi kandi hujujwe ibisabwa.”

Yakomeje avuga ko binjiye mu mukino w’amagare bafite intego ku buryo bateganya kuzajya bategura amarushanwa atandukanye ku bufatanye n’Ishyirahamwe Nyarwanda ry’Umukino w’Amagare (FERWACY).

Ati “Turi mu mukino w’amagare, turi mu irushanwa, natwe ubwacu kandi tugomba gutegura amarushanwa, ntabwo tugomba gutegereza ko FERWACY ari yo itegura amarushanwa, natwe tuzajya tuyategura dutumire amakipe. Ibyo tubirimo kandi tuzabikora ndetse bidukundiye mu kwezi gutaha k’Ugushyingo twategura amarushanwa akabera aho twakumvikana na FERWACY no mu buryo tuvuganye na yo kuko ni yo ihagarariye uyu mukino.”

Musanze Cycling Club yashinzwe mu Ukwakira 2020 ifite intego yo kubaka ubunyamwuga muri uyu mukino ukunzwe n’abatari bake mu Rwanda no mu mahanga.

Abakinnyi bayo bari bitabiriye “Irushanwa ryo gukunda Igihugu” ni Uwimana Emmanuel, Nkurunziza Olivier, Ngabonziza Justin, Munyemana Fils na Kwizerimana Innocent.

Musanze Cycling Club ni imwe mu makipe yitabiriye "Irushanwa ryo gukunda Igihugu" ryabaye ku wa 30 Ukwakira 2021
MCC ni imwe mu makipe mashya yatangiye kwitabira amarushanwa ategurwa na FERWACY
Abakinnyi ba MCC bitabiriye irushanwa rya mbere ryateguwe na FERWACY mu bihe bya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .