Kwamamaza

Miliyoni 60 ziyongereye ku ngengo y’imari ya Tour du Rwanda 2016

Yanditswe kuya 9-11-2016 saa 11:18' na IGIHE


Isiganwa mpuzamahanga ry’amagare rizenguruka u Rwanda “Tour du Rwanda 2016” rigiye kuba ku nshuro ya munani ryongerewe ingengo y’imari, iva kuri miliyoni 400 ryatwaraga ku nshuro ebyiri ziheruka igera kuri miliyoni 460 z’amafaranga y’u Rwanda uyu mwaka.

Aya marushanwa agomba gutangira ku Cyumweru tariki 13 agasozwa tariki 20 Ugushyingo 2016, azitabirwa n’amakipe 17 akomoka hirya no hino ku Isi agizwe n’abakinnyi 85 nk’uko Ishyirahamwe ry’umukino w’amagare mu Rwanda, Ferwacy ribitangaza.

Irushanwa ry’uyu mwaka ngo ni ryo rizatwara ingengo y’imari nini kurusha andi yose yaribanjirije nk’uko Perezida wa Ferwacy, Bayingana Aimable yabitangarije The New Times.

Ati “Dufite ingengo y’imari ihagije yo gukoresha.Turashimira cyane abafatanyabikorwa dukorana[…]turizera ko buri kintu cyose kizagenda neza.”

Mu 2013 iri rushanwa ryari ryatwaye agera kuri miliyoni 372 z’amafaranga y’u Rwanda, 2014 na 2015 arazamuka agera kuri miliyoni 400.

Mu gihe Tour du Rwanda ebyiri ziheruka zegukanywe n’Abanyarwanda barimo Ndayisenga Valens (2014) na Nsengimana Jean Bosco mu 2015, Bayingana avuga ko uyu mwaka uzagaragaramo guhangana gukomeye ndetse no gutungurana kurusha uko abantu babitekereza.

Ati “Ku bijyanye n’imyiteguro, ndatekereza twiteguye irushanwa. Niteze ko kuri iyi nshuro tuzabona gutungurana cyane kurusha inshuro ziheruka. Dufite abakinnyi batatu b’Abanyarwanda bazaba bakinira amakipe yo hanze, ndatekereza ko bizongera ihangana. Ikindi, uzaba umwanya mwiza wo kubona abana bashya bafite impano ari nabo cyizere cy’uyu mukino mu gihe kizaza.”

Muri aba bakinnyi bazakinira amakipe yo hanze, barimo Valens Ndayisenga na Bonaventure Uwizeyimana bazaba bakinira Team Dimension Data yo muri Afurika y’Epfo na Jean Bosco Nsengimana uzaba akinira Bike Aid yo mu Budage.

Nubwo aya mazina akomeye azaba ahanganye n’Abanyarwanda kuri iyi nshuro (ubundi bose bakinaga nk’ikipe y’u Rwanda), Bayingana avuga ko yizeye ko abakinnyi b’u Rwanda bazaba bari mu makipe atandukanye arimo Team Rwanda, Benediction Club na Les Amis Sportif bazakora neza no kurusha imyaka ishize.

Ati “Ku makipe dufite ubu, dushobora no gukora neza kurushaho. Abakinnyi bamaze igihe bari kumwe, basangira buri kimwe kandi barakorera hamwe ari nabyo bizabaha guhangana cyane nk’ikipe.”

Mu bakinnyi bazaserukira u Rwanda harimo Nathan Byukusenge na Gasore Hategeka bamaze kwitabira iri rushanwa inshuro zose uko ari zirindwi ziheruka na Ruhumuriza Abraham waryitabiriye inshuro esheshatu, Biziyaremye Joseph wabaye uwa karindwi umwaka ushize ndetse na Nduwayo Eric ugiye kurikina bwa mbere bazaba bari muri Team Rwanda.

Les Amis Sportif igiye gukina iri rushanwa bwa mbere izaba iyobwe na Areruya Joseph wabaye uwa kabiri umwaka ushize, Uwizeye Jean Claude wabaye uwa 22, Hakuzimana Camera wari uwa gatatu, Tuyishimire Ephrem na Twizerane Mathiew barikinnye bwa mbere.

Ikipe Benediction yo izaba irimo Byukusenge Patrick, Mugisha Samuel, Ruberwa Jean, Nizeyimana Alex na Karegeya Jeremie umwaka ushize wari wasoje ari uwa 21.

Amakipe y’amahanga nka LowestRates yo muri Canada yamaze kugera mu Rwanda, andi akaba ategerejwe ku wa kane no ku wa gatanu w’iki cyumweru. Amakipe azahagararira u Rwanda nayo azagera i Kigali ku wa gatanu avuye i Musanze aho yari amaze igihe mu mwiherero.

FERWACY ivuga ko ibyangombwa byose bizakenerwa muri iri rushanwa byateguwe

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved