Manizabayo Eric yegukanye agace ka Rwanda Cycling Cup kiswe ‘Kivu Race’

Yanditswe na Ngabo Roben
Kuya 6 Ukwakira 2018 saa 02:11
Yasuwe :
0 0

Manizabayo Eric bakunda kwita ‘Karadiyo’ ukinira Nyabihu Cycling Club, niwe wegukanye agace ka Rwanda Cycling Cup, kiswe Kivu Race.

Aka gace ka munani k’irushanwa ngarukamwaka ryo gusiganwa ku magare, katangiriye i Musanze kuri uyu wa Gatandatu gasorezwa i Rubavu.

Manizabayo yakurikiwe na Hakizimana Seth wa Les Amis Sportifs naho Gasore Hategeka wa Nyabihu Cycling Club aba uwa Gatatu.

Mu bagabo hatangiye abakinnyi 28, mu bakobwa hakinnye 11 naho mu ngimbi abakinnyi 22.

Bahagurutse i Musanze barenga Mukamira basatira Kora na Sashwara bakiri kumwe.
Bageze Sashwara Gasore Hategeka na Alexis Nizeyimana bakinira Nyabihu Cycling Club bakiniraga mu mihanda y’iwabo bacomoka mu bandi bakurikirwa na Hadi Janvier, ari nabo bageze i Rubavu bari imbere.

Nyuma yo kugera mu Mujyi wa Rubavu bazengurutse inshuro zirindwi banyuze ku biro by’akarere- BK - Hôtel Stip - Tribunal Gisenyi - Aéroport - A D E P R – kuri Station ya Essence (Chez Mujomba) - ku bitaro bya Gisenyi -bagasoreza ku isoko rya Rubavu.

Abagabo basiganwe intera ya kilometero 120,7, abagore n’ingimbi bo bazengurutse Rubavu inshuro enye ku ntera ya 96,4 Km.

Mu kuzenguruka kwa nyuma habayeho gutungurana. Nyuma y’akazi gakomeye kakozwe na Alexis Nizeyimana na Gasore Hategeka ba Nyabihu Cycling Club, mugenzi wabo Manizabayo Eric bita Karadiyo yahise atsinda.

Manizabayo yabwiye itangazamakuru ko gutsinda bimutunguye. Yavuze ko icyamuteye imbaraga ari uko imbere hari abakinnyi be, hakiyongeraho ishyaka ryo kwanga ko ikipe y’i Rwamagana (Les amis sportif), itsinda.

Ati “Nongereye imbaraga nanjye ngo mfashe bagenzi banjye bari imbere tugeze muri metero 100 za nyuma ntinya ko badutsinda kuri sprint (umuvuduko) ndabatanga ndasatira birangira mbatsinze”.

Manizabayo Eric Karadiyo yegukanye iri siganwa iminsi mike nyuma yo kurokoka impanuka kuko yari muri Team Rwanda yitabiriye Grand Prix Chantal Biya muri Cameroon yakoze impanuka y’imodoka.

Mu cyiciro cy’abakobwa uwegukanye irushanwa ni Nzayisenga Valentine wa Benediction, wakurikiwe na Ingabire Diane wa Benediction na Tuyishimire Jacqueline wa Benediction wabaye uwa gatatu.

Mu ngimbi uwabaye uwa mbere ni Muhoza Eric wa Les amis sportif, yakurikiwe na Nzafashwanayo Jean Claude wa Benediction, naho Niyonshuti Jean Claude wa Fly aba uwa gatatu.

Abakinnyi bitegura guhaguruka i Musanze
Cogebanque itera inkunga ikipe ya Les amis sportif n'umukino w'amagare muri rusange nayo yaserutse
Guverineri w'Intara y'Amajyaruguru Gatabazi JMV yari ahatangirijwe iri siganwa i Musanze
Uruganda rwa Skol rutera inkunga umukino w'amagare nirwo rwahembye uwabaye uwa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza