Impinduka muri Tour du Rwanda 2018 izatwara asaga miliyoni 500 Frw

Yanditswe na Manzi Rema Jules
Kuya 13 Kamena 2018 saa 09:46
Yasuwe :
0 0

Isiganwa Mpuzamahanga rizenguruka u Rwanda ku magare ‘Tour du Rwanda 2018’ rizatwara asaga miliyoni 500 Frw, zizagaragaramo impinduka zitandukanye mu mihanda rizacamo aho rinafite agace kazasorezwa rwagati mu Mujyi wa Kigali.

Tour du Rwanda imaze imyaka 10 ishyizwe ku ngengabihe y’impuzamashyirahamwe y’Umukino w’Amagare ku Isi, UCI, ku bipimo bya 2.2, igiye kuba ku nshuro ya nyuma iri kuri ibyo bipimo ikazahita ijya kuri 2.1 muri Gashyantare 2019, urwego rumwe na La Tropicale Amissa Bongo ya mbere muri Afurika.

Mu kiganiro n’abanyamakuru kuri uyu wa Gatatu tariki 13 Kamena 2018 Ishyirahamwe ry’umukino wo gusiganwa ku magare ryatangaje imihanda izakoreshwa muri Tour du Rwanda 2018 izatangira tariki 5 kugera 12 Kanama, hagaragaramo ibice izageramo bwa mbere n’imihanda mishya.

Perezida w’Ishyirahamwe ry’Umukino w’Amagare, Ferwacy, Bayingana Aimable, yavuze ko biri mu rwego rwo gukomeza kugeza iri siganwa ku Banyarwanda benshi aho kugira ngo rijye ryiharirwa na bamwe.

Yagize ati "Buri mwaka tugerageza kuzanamo inzira nshya. N’uyu mwaka niko byagenze urebye nk’agace ka Karongo- Rubavu, ni ubwa mbere abatuye hariya bazaba babonye Tour du Rwanda. Hari n’agace kazanyura mu bice bitandukanye bya Kigali, kugira ngo nabo babashe kureba isiganwa neza aho kugira ngo bajye baribona aho rihagurukiye cyangwa risorejwe."

Yavuze ko bitewe n’ikibazo cy’umuhanda, uyu mwaka bitakunze ko Tour du Rwanda irenga ishyamba rya Nyungwe ngo ijye mu bice bya Rusizi na Nyamasheke ariko mu myaka itaha, igihe umuhanda uzaba umeze neza rizajyayo.

Bitandukanye n’izindi nshuro zabanje, Tour du Rwanda ntizatangirira muri Kigali kuko agace ka mbere kazakinirwa i Rwamagana, abakinnyi bakazagera i Kigali bahahagurukira bajya i Huye ku munsi wa kabiri, bakazakurikizaho agace karekare k’iri rushanwa kazava i Huye kagasoreza i Musanze ku ntera ya kilometero zirenga 190.

Ku munsi wa kane hazaba agace gashya muri Tour du Rwanda kazava i Musanze kajya i Karongi, buke abakinnyi basiganwa ku nkombe z’i Kivu bajya i Rubavu, bazave i Rubavu bajya i Musanze mu Kinigi kuri Parike y’Ibirunga, bahave bagaruka muri Kigali mu gace kazasorezwa rwagati mu Mujyi imbere y’inyubako ya MIC naho ku munsi wa nyuma bakazazenguruka muri Kigali bava i Remera bajya i Nyamirambo nabwo bikazaba ari ku nshuro ya mbere.

Abakunzi b’umukino w’amagare bazongera kubona amahirwe yo kureba umwe mu Banyarwanda banditse amateka akomeye muri uyu mukino, Niyonshuti Adrien akina Tour du Rwanda ari kumwe n’ikipe ye nshya ya Team Sampada yo muri Afurika y’Epfo ndetse Ndayisenga Valens wegukanye Tour du Rwanda ebyiri na Uwizeye Jean Claude nabo bakazakina bari kumwe n’ikipe ya Equipe De POC Côte De Lumière yo mu Bufaransa.

Tour du Rwanda 2018 izatwara asaga miliyoni 500 Frw, yatewe inkunga na MINISPOC, RDB, Skol, Cogebanque, RwandaAir, Rwanda Tea, Prime Insurance, SP, Inyange LTD, RMC (Rwanda Motorcycle Company), Rwanda Foam Ltd, Ameki Color, Polisi y’Igihugu, Komite Olempike na Sebamed.

Iyi Tour du Rwanda izanye n'inzira nshya mu rwego rwo kuyegereza abanyarwanda
Amakipe azitabira iri rushanwa...

Amakipe azitabira Tour du Rwanda 2018

I. Ane y’ibihugu

- Ikipe y’u Rwanda
- Ikipe ya Afurika y’Epfo
- Ikipe ya Eritrea
- Ikipe ya Ethiopia

II. Amakipe yo muri Afurika
-  Les Amis Sportif (Rwanda)
-  Benediction (Rwanda)
-  GSP Algeria (Algeria)
-  Kenyan Riders Safaricom (Kenya)
-  Team Sampada (Afurika y’Epfo)
-  Bai Sicasal- Petro de Luanda (Angola)

III. Amakipe yo hanze ya Afurika
-  Team Loup Suisse Romandie (Suisse)
-  Marc Pro GYM One Cycling Team (USA)
-  Team Haute-Savoie Rhône Alpes (France)
-  Equipe De POC Côte De Lumière (France)
-  Team Embrace The World (u Budage)

Uduce twa Tour du Rwanda 2018 n’imihanda tuzacamo

-  Ku wa 5 Kanama: Rwamagana-Rwamagana: 104 Km
-  Ku wa 6 Kanama: Kigali-Huye: 120,3 Km
-  Ku wa 7 Kanama: Huye-Musanze: 195,3Km
-  Ku wa 8 Kanama: Musanze-Karongi: 135,8 Km
-  Ku wa 9 Kanama: Karongi-Rubavu: 95,1 Km
-  Ku wa 10 Kanama: Rubavu-Kinigi (Parike y’Ibirunga): 108,5 km
-  Ku wa 11 Kanama: Musanze- Kigali (imbere ya MIC): 107,4 km
-  Ku wa 12 Kanama: Kigali (Stade Amahoro)- Kigali (Nyamirambo): 82,2 km

Ineza Private ushinzwe imenyekanishabikorwa muri RMC, izatanga moto zose zizakoreshwa muri Tour du Rwanda
Perezida w'Ishyirahamwe ry'umukino wo gusiganwa ku magare, Bayingana Aimable, yavuze ko bazanye inzira nshya uyu mwaka kugira ngo Tour du Rwanda igere ku Banyarwanda bose
Obed Ruvogera na Nathan Byukusenge bakinnye Tour du Rwanda ikiba mpuzamahanga mu myaka 10 ishize, bari bitabiriye iki kiganiro
Polisi y'Igihugu nayo ni umuterankunga w'imena wa Tour du Rwanda mu gucunga umutekano w'abayitabira
Uwari uhagarariye Cogebanque, umuterankunga w'imena wa Tour du Rwanda, Theonestine Mukabanana
Tour du Rwanda iheruka yegukanywe na Areruya Joseph wakiniraga Dimension Data itazitabira uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza