Impinduka mu gace ka kabiri ka Rwanda Cycling Cup katakerekeje i Gicumbi

Yanditswe na Manzi Rema Jules
Kuya 17 Gicurasi 2018 saa 01:46
Yasuwe :
2 0

Ishyirahamwe ry’umukino w’amagare mu Rwanda (Ferwacy) ryatangaje ko ku mpamvu z’umutekano w’abakinnyi, agace ka Rwanda Cycling Cup kari kuzahagurukira i Kayonza kuri uyu wa Gatandatu kagasorezwa I Gicumbi kahinduriwe umuhanda kakazasorezwa i Muhanga.

Iri siganwa rigamije gutyaza abakinnyi bakina imbere mu gihugu no gutegura abazakina Tour du Rwanda, ryatangiye muri Werurwe hakinwa agace kitiriwe kwibuka Byemayire Lambert wari Perezida wungirije muri Ferwacy; uyu yitabye Imana mu 2016.

Rigomba gukomeza ku wa Gatandatu, tariki 19 Gicurasi, aho byari biteganyijwe ko abasiganwa bazahagurukira i Kayonza bagasoreza i Gicumbi ariko kubera umuhanda wangiritse ushobora guteza ibibazo abakinnyi, Ferwacy, yafashe icyemezo cyo guhindura bakazasoreza i Muhanga banyuze i Kigali.

Mu itangazo Ferwacy yasohoye, rigira riti “Kubera imvura yangije umuhanda wa Kigali- Gatuna, byabaye ngombwa ko duhindura umuhanda tuzakoresha mu isiganwa ryo ku wa 19 Gicurasi 2018. Abakuru n’abatarengeje imyaka 23 mu bagabo bazahagurukira i Kayonza basoreze i Muhanga naho abakobwa n’ingimbi bakazahagurukira i Ntunga bagasoreza i Muhanga.”

Biteganyijwe ko aka gace kazakinwa n’amakipe icyenda yemewe na Ferwacy mu Rwanda, abakuru n’abatarengeje imyaka 23 mu bagabo bakazasiganwa ibirometero 121, abakobwa n’ingimbi bakazakora ibirometero 92.

Umukinnyi wa mbere mu bagabo no mu ngimbi azahembwa n’umuterankunga Cogebanque naho uwa mbere mu bakobwa n’abatarengeje imyaka 23 ahembwa n’umuterankunga w’irushanwa, Skol.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza