Impinduka muri Rwanda Cycling itegurirwamo abazitabira “Tour du Rwanda 2016”

Yanditswe na Ishimwe Israel
Kuya 9 Nzeri 2016 saa 12:55
Yasuwe :
0 0

Amarushanwa ya Rwanda Cycling Cup agamije gutegura abakinnyi bazahagararira igihugu muri ‘Tour du Rwanda’ izakinwa mu Ugushyingo arakomeza kuri uyu wa Gatandatu tariki 10 Nzeli hakinwa agace ka munani kiswe ‘Central Challenge’ yahindutse kuko abasiganwa bagombaga gutangirira i Kigali berekeza i Muhanga bakazenguruka uyu mujyi, bazahagurukira i Kayonza bagasoreza i Muhanga.

Nyuma yo gusanga imihanda yo mu Mujyi wa Muhanga itaberanye no gusiganwa abakinnyi bazenguruka agace runaka ‘circuit’ , Ishyirahamwe ry’umukino w’amagare mu Rwanda, Ferwacy ryahisemo ko isiganwa ry’umunsi wa munani muri Rwanda Cycling Cup 2016 ryimurwa.

Mu gihe abakinnyi bagombaga guhagurukira i Kigali berekeza mu Mujyi wa Muhanga bakahazenguruka iri siganwa ryahiduriwe imihanda.

Umunyamabanga wa Ferwacy, Murenzi Emmanuel yatangarije IGIHE ko iri siganwa rizatangirira i Kayonza rigasorezwa i Muhanga.

Yagize ati "Byari biteganyijwe ko bazenguruka mu Mujyi wa Muhanga ariko mu buryo bwa tekiniki twasanze bitashoboka duhitamo ko bajya gutangirira i Kayonza bagasoreza i Muhanga."

Murenzi yanavuze ko yaba Ferwacy n’abo bafatanya gutegura aya marushanwa barimo COGEBANQUE bishimira umusaruro ari gutanga kuko uyu mwaka hagaragaye guhangana gukomeye haba mu makipe n’abakinnyi ubwabo, by’umwihariko abakiri bato barigaragaje cyane ndetse n’abakobwa batanga icyizere mu gihe kiri imbere.

Ku munsi w’ejo abahungu bakuru n’abari munsi y’imyaka 23 bazahaguruka i Kayonza, abari munsi y’imyaka 18 bahagurukire i Rwamagana mu gihe abakobwa bazatangirira isiganwa ku Giti cy’Inyoni.

Mu masiganwa 10 yari ateganyijwe hamaze gukinwa arindwi hakaba hasigaye Central Challenge izakinwa kuri uyu wa Gatandatu, Kivu Belt izakinwa tariki 22 Ukwakira, aho abakinnyi bazahagurukira Karongi bajya i Rusizi na Nyungwe Challenge izakinwa bukeye bwaho tariki 23 bava i Rusizi bagasoreza i Huye banyuze mu ishyamba rya Nyungwe. Iyi nzira izanakoreshwa muri Tour du Rwanda 2016 izaba hagati ya tariki 13-20 Ugushyingo.

Uretse kugaragaza abana bafite impano muri uyu mukino w’amagare kuri ubu bahagararira igihugu no mu marushanwa mpuzamahanga nka Areruya Joseph, Mugisha Samuel n’abandi, Rwanda Cycling Cup y’umwaka ushize yafashije bikomeye Nsengimana Jean Bosco wayegukanye bikaza no kumuhesha kwegukana Tour du Rwanda 2015.

Rwanda Cycling Cup irakinwa umunsi wayo wa munani
Hadi Janvier wegukanye Race for Culture bava i Nyamagabe bajya i Nyanza ni umwe mu bakinnyi bitezwe cyane
René Ukiniwabo w'imyaka 19 wegukanye Northern Circuit ni umwe mu bakiri bato bigaragaje uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza