Amagare: Bike Aid yo mu Budage yahigiye guhesha Nsengimana Jean Bosco Tour du Rwanda

Yanditswe na Ishimwe Israel
Kuya 12 Ugushyingo 2016 saa 08:59
45 31

Ikipe ya Stradalli - Bike Aid yo mu Budage yasesekaye i Kigali aho ije kwitabira Tour du Rwanda 2016, ifite intego imwe rukumbi yo gufasha Umunyarwanda Nsengimana Jean Bosco uyikinamo, gukora amateka atarakorwa n’undi mukinnyi wese kuva 2009, irushanwa ryaba Mpuzamahanga, akayegukana kabiri yikurikiranya.

Tour du Rwanda izatangira kuri iki Cyumweru tariki 13 Ugushyingo 2016 hakinwa Individual Time Trial ‘Prologue’ y’ibirometero 3,3, aho abasiganwa bazazenguruka agace gakikije Stade Amahoro, mbere yo gukomereza mu bindi bice by’igihugu kugera tariki 20 Ugushyingo isojwe.

Ku mugoroba wo ku wa Gatanu, tariki ya 12 Ugushyingo 2016, nibwo Stradalli- Bike Aid yo mu Budage ikinamo Umunyarwanda, Nsengimana Jean Bosco wanegukanye Tour du Rwanda iheruka, yageze ku Kibuga Mpuzamahanga cy’Indege i Kanombe.

Umuyobozi ushinzwe amarushanwa muri iyi kipe, Yves Beau, yatangarije IGIHE bakigera mu Rwanda, ko bazanye intego yo gutsinda kandi icyizere bacyifitiye.

Ati “Tuje gufasha abakinnyi b’Abanyafurika gutsinda. Dufite abakinnyi batatu bo muri Afurika barimo Laizer Richard wo muri Tanzania, Amanuel Meron wo muri Érythrée na Nsengimana Jean Bosco uri mu rugo. Undi mukinnyi wa kane, Schnapka Matthias wo mu Budage yabuze indege ariko arahagera asanga abandi. Nsengimana ndakeka ubu ameze neza cyane kuko mu kwezi gushize yegukanye agace ka nyuma muri Grand Prix Chantal Biya, kandi mu byumweru bibiri bishize nahamagawe na Jock Boyer (Umutoza w’Ikipe y’Igihugu y’u Rwanda) ambwira ko hari irushanwa riruhije cyane yatsinze hano ari wenyine. Ikindi azakorana ishyaka cyane kuko akeneye kugumana umwenda w’umuhondo.”

Yakomeje agira ati “Turi hano kubera Jean Bosco gusa, Teshome Meron yakabaye yaje ariko yagize uburwayi nyuma ya Shampiyona y’Isi. Iyo Meron aba ari hano twari kwegukana uduce tumwe na tumwe, nta bakinnyi baterera dufite, umuyobozi dufite ni Jean Bosco ariyo mpamvu ikipe yose igomba kumukorera.”

Nubwo iyi kipe ivuga ko ije gufasha Nsengimana kwisubiza Tour du Rwanda, ntizoroherwa n’andi makipe akomeye arimo Team Dimension Data nayo yageze mu Rwanda ku wa Gatanu, ndetse Umuyobozi wayo, Kevin Campbell agatangaza ko baje gufasha Umunyarwanda Ndayisenga Valens kwegukana iri rushanwa byanze bikunze.

Laizer Richard wo muri Tanzania (ibumoso) na Amanuel Meron wo muri Érythrée (iburyo) bakinira Bike Aid yo mu Budage
Richard Laizer (ibumoso) aganira na Yves Beau ku kibuga cy'Indege i Kanombe
Bashyira ibikoresho bazanye mu modoka
Inzira Tour du Rwanda 2016 izanyuramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE