Ibyishimo bidasanzwe kuri Nkurunziza Yves nyuma yo kwegukana Tour de Kigali (Amafoto)

Yanditswe na Eric Tony Ukurikiyimfura
Kuya 4 Kanama 2019 saa 08:32
Yasuwe :
0 0

Nkurunziza Yves wa Benediction Excel Enery, wegukanye isiganwa rya Tour de Kigali ryakinwe kuri uyu wa Gatandatu muri Rwanda Cycling Cup, yavuze ko byamushimije cyane ndetse bimuha icyizere cy’uko ashobora kwegukana n’irindi siganwa rikomeye.

Nkurunziza yabaye uwa mbere mu bagabo bakuru n’abatarengeje imyaka 23 nyuma yo gukoresha amasaha atatu, iminota ine n’amasegonda 15 muri iri siganwa ryakoresheje inzira nshya muri aya marushanwa azenguruka igihugu mu mukino w’amagare.

Abasiganawa bahagurukiye ku Ishuri ribanza ry’Intwari i Nyamirambo, bekereza kuri Tapis Rouge, aho bahitaga bamanuka mu Nyakabanda, bagakomeza Kimisagara, bagera Nyabugogo bakerekeza kuri Yamaha na APACOPE, bagakomeza mu Gakiriro na Gitega mbere yo kugaruka kuri Ishuri ry’Intwari ku ntera y’ibirometero 12.

Icyiciro cy’agabo bakuru n’abatarengeje imyaka 23, bazengurutse iyi ntera inshuro icyenda zireshya n’ibilometero 108, aho bagiye bagorwa n’inzira izamuka ku Muhima bagaruka i Nyamirambo.

Rugamba Janvier wa Les Amis Sportifs, utabashije gusoza isiganwa nyuma yo kugwa, ni we watangiye ayoboye abandi ubwo bari bamaze kuzenguruka inshuro imwe, aho yari kumwe na Manizabayo Eric ‘Karadiyo’.

Ubwo bazengurukaga ku nshuro ya kabiri, abasiganwa bagarutse i Nyamirambo bayobowe na Nkurunziza Yves mu gihe Rugamba na Karadiyo bari basubiye mu gikundi cyari gikurikiye uyu mukinnyi wa Benediction Excel Energy.

Nkurunziza yakomeje kuyobora isiganwa ndetse bazenguruka inshuro icyenda zose akiyoboye, akoresheje amasaha atatu, iminota ine n’amasegonda 15, akurikirwa na Nsengiyumva Shemu wa Les Amis Sportifs wakoresheje amasaha atatu, iminota itanu n’amasegonda atandatu, Manizabayo Eric aba uwa gatatu arushijwe amasegonda arindwi n’uwa kabiri.

Nyuma yo kwegukana iri siganwa, Nkurunziza Yves yavuze ko bimuha icyizere ko ashobora no kwegukana irindi rikomeye dore ko ari ku nshuro ya mbere yegukanye isiganwa mu cyiciro cy’abakuru.

Ati” Isiganwa ry’uyu munsi ryari rikomeye cyane, kuba twaraje turi abakinnyi batu gusa mu ikipe yacu ntabwo byatworoheye kuko byadusabye gutanga 100% y’ibyo twari dufite. Biranshimishije cyane kandi binyeretse ko nshobora no gutwara n’irindi siganwa rikomeye.”

Benediction Excel Energy yakinishije abakinnyi batatu gusa (Nkurunziza, Karadiyo na Ukiniwabo Rene Jean Paul) kuko abandi barimo Uwizeyimana Bonaventure watwaye isiganwa rya mbere ry’uyu mwaka rya ‘Musanze Circuit’ yajyanye n’ikipe ye Benediction Excel Energy muri Tour de la RDC hamwe na bagenzi be barimo Byukusenge Patrick, Nsengimana Jean Bosco, Nzafashwanayo Jean Claude, Uwiduhaye Mike na Ruberwa Jean Damascène usanzwe ukinira Nyabihu Cycling Team.

Nkurunziza avuga ko mu byabafashije kwitwara neza muri Tour de Kigali, harimo inama z’aba bakinnyi bakinana bagiye muri Tour de la RDC yatangiye kuri uyu wa Gatandatu.

Ati“ N’ubwo abandi bagiye mu yandi masiganwa, twakomeje kuvugana batubwira ko tugomba kugaragaza ko turi mu ikipe ikomeye. Batubwiye uko tugomba kubigenza, twagendeye ku nama za bakuru bacu.”

Uyu musore w’imyaka 19, azerekeza mu mujyi wa Monaco mu Bufaransa kuri iki Cyumweru, aho agiye kumarayo amezi abiri akora imyitozo anakina amasiganwa atandukanye.

Mu cyiciro cy’abakobwa bazengurutse inshuro esheshatu zingana n’ibirometero 72, uwa mbere yabaye Mukundente Geneviève wa Benediction Excel Energy wakoresheje amasaha abiri, iminota 24 n’amasegonda 15, arusha amasegonda abiri n’atatu bagenzi be bakinana barimo Ingabire Diane na Nzayisenga Valentine.

Mu cyiciro cy’ingimbi (Junior men) bahazengurutse inshuro umunani, bakora intera ingana n’ibirometero 96 maze uwa mbere aba Ngendahayo Jeremy wa Huye Cycling For All (CCA) wakoresheje amasaha abiri, iminota 39 n’amasegonda 44.

Bikorimana Elysée wa Benediction Excel Enery, yabaye uwa kabiri nyuma yo gukoresha amasaha abiri, iminota 43 n’amasegonda 15 mu gihe uwa gatatu yabaye Bigirimana Jean Nepo wa Kigali Cycling Club, we wasizwe isegonda rimwe n’uwa kabiri.

Iri siganwa ryabaye kuri uyu wa Gatandatu ntabwo ryagaragayemo abakinnyi bakomeye nka Uhiriwe Byiza Renus, Munyaneza Didier na Gahemba Bernabé bamaze iminsi mu Buyapani, aho bagiye mu myitozo yo kwitegura Imikino Nyafurika n’Imikino Olempike. Hari n’abakinnyi bari mu Bubiligi mu marushanwa yitabiriwe na SKOL Fly Cycling Team, kimwe na Habimana Jean Eric uri mu Busuwisi.

Rwanda Cycling Cup izakomeza mu kwezi gutaha, aho hazakinwa amasiganwa abiri, Rwamagana Circuit yo ku itariki ya 7 Nzeri na Kivu Race izakinwa tariki ya 21.

Nkurunziza Yves yegukanye agace ka kabiri ka Rwanda Cycling Cup kiswe 'Tour de Kigali' (Amafoto)
Nkurunziza washimishijwe no kwegukana iri siganwa, acugusa champagne
Nkurunziza washimishijwe no kwegukana iri siganwa, acugusa champagne
Ubwo Nkurunziza Yves yasozaga isiganwa ayoboye abandi mu cyiciro cy'abakuru n'abatarengeje imyaka 23
Mukundente Genevieve wabaye uwa mbere mu bakobwa, asoza isiganwa
Ngendahayo Jeremy wabaye uwa mbere mu ngimbi, asoza isiganwa
Mukundente Genevieve yahembwe na Iyamuremye Antoine ushinzwe Iyamamazabikorwa muri Cogebanque n'Umunyamabanga wa Ferwacy Toussaint Nosisi
Ngendahayo Jeremy ahembwa nyuma yo kwegukana isiganwa mu cyiciro cy'ingimbi
Abasiganwa bazamuka kuri 40 i Nyamirambo
Abasiganwa bakata Nyabugogo nyuma yo kumanuka bava Kimisagara
Abatari bake bakurikiye iri siganwa, cyane Nyabugogo
Cogebanque na Skol ni abaterankunga b'Imena b'Umukino w'amagare mu Rwanda
MC Brian wafatanyaga na Bosco, basobanuriraga abaje kureba iri siganwa ibyerekeye umukino w'amagare
Benediction Club yari iyoboye mu bakobwa

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza