Fly Cyling Club yateguye irushanwa ryo gushaka abana bafite impano mu kunyonga igare

Yanditswe na Ishimwe Israel
Kuya 6 Ukwakira 2016 saa 02:31
Yasuwe : XX
0

Ikipe y’umukino wo gusiganwa ku magare, Fly Cyling Club yo mu Karere ka Gasabo yateguye irushanwa ry’umunsi umwe rizaba tariki 15 Ukwakira 2016 i Gacuriro rigamije gushaka abana bari munsi y’imyaka 20 bafite impano n’ubushake mu gutwara amagare kugira ngo bafashwe kuvamo abakinnyi babigize umwuga.

Fly Cycling Club yagize igitekerezo cyo gutegura iri siganwa rizaba rikinwa ku nshuro ya mbere nyuma yo kubona ko hari abana bakunda umukino w’amagare badahabwa amahirwe yo kubona amakipe ngo bigaragaze nk’uko Perezida wayo, Ntembe Bosco yabibwiye IGIHE.

Ati “Fly Cycling Club ni ikipe imaze imyaka myinshi ariko twagiye tugorwa n’ibibazo by’amikoro make. Nyuma yo kubona umuterankunga turashaka kubaka ikipe ikomeye ihangana na Les Amis Sportif na Benediction. Tugiye guhera ku gushaka abana bafite impano. Si ikipe yacu bizafasha gusa kuko n’andi makipe ashobora kugira abo akuramo, ikipe y’igihugu ikabona abakinnyi benshi. Ikindi n’aba bana bazaba babonye amahirwe yo kwigaragaza.”

Kwitabira iri siganwa ririmo gutegurwa ku bufatanye bw’Ishyirahamwe ry’Umukino w’Amagare mu Rwanda (Ferwacy) na Skol, bisaba kuba umukinnyi nta kipe asanzwe akinira yitabira amasiganwa ategurwa na Ferwacy, kuba ari munsi y’imyaka 20, afite n’ikarita y’ishuri cyangwa indangamuntu.

Abazasiganwa bazakoresha amagare asanzwe (Pneu ballon) kugira ngo horoherezwe abatabasha kubona amagare yabugenewe.

Perezida Ntembe yasabye ababyeyi bafite abana bashoboye gutwara igare kubafasha kwiyandikisha mu bazasiganwa. Kwiyandikisha bizakorerwa ku cyicaro cya Ferwacy i Remera kuri Stade Amahoro, kuva kuri uyu wa Gatanu, tariki ya 7 kugeza kuwa 14 Ukwakira 2016 habura umunsi umwe ngo irushanwa ritangire.

Ikipe ya Fly Cycling Club igiye gufasha abana kugaragaza impano mu gutwara amagare
Munyakazi Felicien (imbere) umwe mu bakinnyi ba Fly Cycling Club wagaragariye mu marushanwa nk'aya yabereye mu karere ka Gisagara muri Kanama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza