Canal+ igiye kwerekana ibihe by’ingenzi bya Tour du Rwanda 2017

Yanditswe na IGIHE
Kuya 21 Ugushyingo 2017 saa 12:12
Yasuwe :
1 0

Sosiyete ya CANAL+ icuruza imirongo ya televiziyo na radio hifashishijwe icyogajuru imaze kuba ubukombe mu guha abakiliya bayo amashene menshi abereka ibyo bifuza, yaherekeje Tour du Rwanda 2017 mu Ntara zose z’igihugu yanyuzemo mu gihe cy’icyumweru.

Kuva ku ya 12 kugeza ku ya 19 Ugushyingo 2017, u Rwanda rwakiriye isiganwa rikomeye rizenguruka igihugu, Tour du Rwanda, rimaze kwandika amateka kubera imitegurire yaryo mu ngeri zitandukanye zirimo no gutara amakuru no kuyasakaza.

Usibye ibitangazamakuru byo mu Rwanda n’ibyo mu mahanga ntibyacikanwe n’ibi birori ngarukamwaka byitabirwa n’abatari bake aho nka Canal+ yajyanye n’iri siganwa umunota ku wundi igaragaza amashusho y’uburyohe bwaryo mu misozi n’amataba abasiganwa bakoresheje.

Canal+ itera inkunga imikino itandukanye ku mugabane wa Afurika imaze imyaka itanu ari umufatanyabikorwa wa Tour Du Rwanda ndetse n’iy’uyu mwaka yayigizemo uruhare rufatika.

Iri siganwa ryitabiriwe n’amakipe 15, agizwe n’abakinnyi 73 basiganwe intera ya kilometero 819 mu gihe cy’iminsi umunani. Urugendo bakoze rwatangiriye i Kigali, rukomereza mu Karere ka Huye, Nyamata, Kayonza mbere yo kugaruka mu Mujyi aho ryasorejwe ku Cyumweru, tariki ya 19 Ugushyingo 2017.

Tour du Rwanda ya 2017 yegukanywe na Areruya Joseph ukinira Dimension Data yo muri Afurika y’Epfo ahigitse Umunya-Eritrea, Eyob Metkel bari bahatanye akaza kumurusha amasegonda 28 ku rutonde rusange.

Muri uyu mwaka, CANAL+ ibinyujije kuri shene yayo nshya yerekana siporo zo ku mugabane wa Afurika A+ SPORT yatangijwe muri Nyakanga 2017, ni yo yerekanye Tour du Rwanda 2017.

Mu isiganwa hagati A+ SPORT yerekanye ibihe by’ingenzi byaranze agace ka Tour du Rwanda, buri munsi saa 20h30. A+ SPORT izanerekana kandi incamake za Tour du Rwanda 2017, izamara iminota 26 ku wa Gatanu, tariki ya 24 Ugushyingo 2017 saa 20h30 GMT(saa yine n’igice zo mu Rwanda).

Umuyobozi wa Canal+ muri Afurika, David Mignot, yatangaje ko bazakomeza gutera inkunga isiganwa ry’amagare.

Yagize ati "Kimwe n’ibyo dukorera umupira w’amaguru muri Afurika, kwerekana isiganwa ry’amagare na byo biri mu byo dushyize ku isonga. Ibi bizatuma uyu mukino ukomeza gutera imbere no gukurura abaterankunga benshi."

Uburyo isiganwa ry’amagare ryitabirwa biri mu byatumye, Canal+ yiyemeza kuba umufatanyabikorwa mu masiganwa akomeye akinirwa ku mugabane wa Afurika.

CANAL+ imaze imyaka irenga 20 ikorera ku mugabane wa Afurika, aho ibarizwa mu bihugu birenga 25 ndetse ikagira abafatanyabikorwa n’abacuruza ifatabuguzi ryayo barenga 30.

Canal+ yajyanye na Tour du Rwanda mu bice byose by'igihugu yanyuzemo
Areruya Joseph ukinira Dimension Data for Qhubeka yegukanye Tour du Rwanda 2017
Areruya yari afite akanyamuneza nyuma yo gusoza ari ku isonga
Areruya Joseph yabaye Umunyarwanda wa gatatu utwaye Tour du Rwanda mu myaka ine ishize
Tour du Rwanda ni rimwe mu masiganwa yitabirwa n'abafana benshi mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza