Rwanda Cycling Cup: Mugisha yegukanye agace ka Gatuna-Kigali, Byukusenge ahiga abandi mu isiganwa ryose

Yanditswe na Manzi Rema Jules
Kuya 30 Ukuboza 2017 saa 07:07
Yasuwe :
1 0

Nyuma yo kuzenguruka hirya no hino mu gihugu, isiganwa rya Rwanda Cycling Cup, ryasojwe kuri uyu wa Gatandatu tariki ya 30 Ukuboza 2017 hakinwa agace ka Gatuna- Kigali kegukanwe na Mugisha Samuel wahise anatangaza ko afite inzozi zo kwegukana Tour du Rwanda umwaka utaha.

Tariki 1 Mata uyu mwaka nibwo isiganwa ryihariye rigamije gutegura no kumenyereza abakinnyi b’Abanyarwanda guhatana, rigizwe n’uduce 11 “Rwanda Cycling Cup” ryatangiye.

Icyo gihe hakinwe agace ka Kigali-Huye kari kitiriwe kwibuka Lambert Byemayire wahoze ari Perezida wungirije mu Ishyirahamwe ry’Umukino wo gusiganwa ku magare (Ferwacy), witabye Imana bitunguranye mu mpera za 2016 kegukanwa na Nsengimana Jean Bosco.

Iri siganwa ryageze mu bice bitandukanye by’igihugu, ryasojwe kuri uyu wa Gatandatu abakinnyi batandukanye barimo n’abakina hanze mu makipe yabigize umwuga, bahangana bikomeye kuva i Gatuna mu Karere ka Gicumbi basoreza i Kigali.

Ni urugendo rw’ibilometero 108,4 aho Mugisha Samuel usanzwe akinira Dimension Data yo muri Afurika y’Epfo ariwe waje ku isonga.

Ni isiganwa ryarimo guhangana cyane ahanini ku ikipe ya Les Amis Sportif yari imaze iminsi ititwara neza kuko yashakaga gutsinda ariko ntibyayihira.

Aka gace kanagaragayemo Hadi Janvier wari wagarutse mu muhanda nyuma y’umwaka ahagaritswe kubera kutumvikana na Ferwacy.

Mugisha wari wanatsinze agace k’iri rushanwa kaherukaga ubwo bavaga i Nyanza bajya i Rubavu, yatangaje ko amaze kwigirira icyizere n’inararibonye yakuye mu gukina i Burayi, bityo aricyo gihe ngo atere ikirenge mu cya Ndayisenga Valens, Nsengimana Jean Bosco na Areruya Joseph, abanyarwanda bamaze kwegukana Tour du Rwanda.

Yagize ati “Uyu munsi byari bikomeye cyane kuko abakinnyi bakomeye bose bari baryitabiriye, byansabaga gukoresha mu mutwe cyane, kumenya uko nzigama imbaraga ndetse no kumenya ahantu heza ho gusatira kuko nari naje nshaka kuritsinda. Icyo nakoze ni uko tugeze mu bilometero icyenda ndavuga nti reka ngende ndebe ko hari unkurikira mbona ntawe mpita mbasigira aho.”

Uyu musore w’imyaka 20 wigaragaje no muri Tour du Rwanda ya 2017 agafasha Areruya Joseph kuyegukana, yakomeje agira ati “Uyu mwaka narakoze cyane kandi wagenze neza. Ubu intego mfite umwaka utaha ni ukongera imbaraga cyane ku buryo nzegukana Tour du Rwanda, nicyo nifuza cyane.”

Muri aka gace Mugisha yakoresheje amasaha 2:38’57” akurikirwa na Bonaventure Uwizeyimana wa Benediction Club wakoresheje 2:39’28”, Dukuzumuremyi wa Fly Cycling Club aba uwa gatatu akoresheje 2:39’28” Ukiniwabo Rene Jean Paul wa Les Amis Sportifs akurikiraho akoresheje 2:39’28” naho Rugamba Janvier bakinana aba uwa gatanu akoresheje 2:39’28”.

Ku rutonde rusange rwa Rwanda Cycling Cup 2017, Byukusenge Patrick wa Benediction niwe wasoje ari uwa mbere afite amanota 137 akurikiwe na Uwizeyimana Bonaventure bakinana wagize 110, Twizerane Mathieu wa Cycling Club For All agira 97, Uwizeye Jean Claude agira 93 naho Munyaneza Didier agira 92 aba uwa gatanu n’uwa mbere mu batarengeje imyaka 23 mu gihe ikipe ya Benediction ariyo yabaye ikipe y’umwaka muri rusange.

Abakinnyi ba Benediction bishimira igikombe
Abakinnyi ba Les Amis Sportif iterwa inkunga na Cogebanque bishyushya mbere yo guhaguruka i Gicumbi
Byukusenge Patrick niwe wegukanye Rwanda Cycling Cup muri rusange
Benediction niyo yabaye ikipe y'umwaka
Mugisha arifuza kwegukana Tour du Rwanda
Ingabire Beatha wa Les Amis Sportif niwe wabaye uwa mbere mu cyiciro cy'abagore
Mu kwishimira intsinzi, Mugisha yateruye igare aritwara mu ntoki mbere yo kugera ku murongo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza