Brayan Sanchez azerekeza i Huye yambaye umwenda w’umuhondo wa Tour du Rwanda 2021 (Amafoto)

Yanditswe na Eric Tony Ukurikiyimfura
Kuya 2 Gicurasi 2021 saa 07:13
Yasuwe :
0 0

Umunya-Colombia Brayan Sanchez Vergara Stiven ni we uzaba wambaye umwenda w’umuhondo utangwa na Visit Rwanda ubwo hazaba hakinwa agace ka kabiri ka Tour du Rwanda 2021 kazasorezwa i Huye ku wa Mbere, ni nyuma y’uko yegukanye etape ya mbere yasorejwe i Rwamagana nyuma yo guhagurukira kuri Kigali Arena kuri iki Cyumweru, ku ntera y’ibikomeyero 115.6.

Brayan Sanchez ukinira Team Medellín yabigezeho nyuma yo gutanga abandi ku murongo abarushije kunyonga igare mu bizwi nka ‘sprint’, aho yakoresheje amasaha abiri, iminota 33 n’amasegonda 43, anganya n’igikundi cy’abandi 67 bari kumwe.

Isiganwa ry’uyu munsi ryari ryihariye kuko uretse kwambara udupufukamunwa, ahahagurukiye abakinnyi n’aho basoreje, hose abafana bari bakumiriwe n’inzego zishinzwe umutekano kugira ngo batagira aho bahurira n’abakinnyi.

Nyuma yo guhagurukira kuri Kigali Arena bakazamuka kuri KIE berekeza kwa Rwahama, ibihe abakinnyi bakoresheje byatangiye kubarwa ku kilometero cya gatandatu ubwo bari bageze ahateganye n’Icyanya cy’Inganda i Masoro.

Amanota yo kuzamuka umusozi wa Ntunga yatanzwe kuri iyi etape, yegukanwe na Mohd Zariff wa Terengganu yo muri Malaysia, aho yakurikiwe na Suaza Arango ukinira Team Medellín yo muri Colombia, we wegukanye amanota y’agace ka mbere mu gukora ‘sprint’ ahatambika.

Suaza, Teugels Lennert wa Tarteletto yo mu Bubiligi na Mohd Zariff wa Terengganu, bacomotse mu bandi mbere yo kwinjira mu gasantere ka Kabuga ndetse basesekaye muri Rwamagana barusha igikundi cyabakurikiye iminota ibiri.

Abanya-Colombia bakomeje gusiga abo bari bahanganye, dore ko ubwo bari basigaje kuzenguruka inshuro enye gusa barushaga igikundi kibakurikiye amasegonda 58.

Ubwo hari hasigaye ibilometero 20 ngo abakinnyi bagere aho basoreza, Teugels, Suaza na Sagiv bari basizeho igikundi kibakurikiye cyarimo abakinnyi b’ikipe ya Start-Up Nation yo muri Israel, amasegonda 14, ariko mu bilometero bya nyuma ikinyuranyo kiragabanuka, bagendera hamwe.

Umunya-Colombia Brayan Sanchez Vergara Stiven ukinira Team Medellín niwe wegukanye agace ka mbere atanze abandi ku murongo nyuma yo kunyonga igare n’imbaraga nyinshi, agakoza ipine bwa mbere ku murongo.

Hakizimana Sept ukinira SACA iterwa inkunga na SKOL, ni we Munyarwanda wasoje ku mwanya wa hafi, ari ku wa 14, aho yakoresheje ibihe bimwe n’uwa mbere, akaba ari nako byagenze ku bandi Banyarwanda basoreje muri batanu ba mbere.

Nsengimana Jean Bosco wa Team Rwanda, wakoze amateka yo kuba umukinnyi wa mbere ukinnye iri rushanwa inshuro nyinshi (10), yasoreje ku mwanya wa 66 anganya ibihe n’abandi bose.

Tour du Rwanda 2021 izakomeza ku wa Mbere tariki ya 3 Gicurasi 2021 hakinwa agace ka kabiri kazahagurukira i Kigali kuri MIC, kagasorezwa ku cyicaro cya Cogebanque kiri i Huye, ku ntera y’ibilometero 120.5.

Abakinnyi 10 ba mbere kuri etape ya Kigali- Rwamagana

  1. Sanchez Vergara Brayan Stiven (Team Medellin, Col), 2h33’43”
  2. Hoehen Alex (Wildlife Generation, USA), 2h33’43”
  3. Roldan Ortiz Weimar Alfonso (Team Medellin, Col), 2h33’43”
  4. Pacher Quentin (B&B Hotels, France), 2h33’43”
  5. Restrepo Jhonathan Valencia (Androni, Col) 2h33’43”
  6. Munoz Giraldo Daniel (Androni, Col), 2h33’43”
  7. Basson Gustav (Pro Touch, Afurika y’Epfo), 2h33’43”
  8. Umba Lopez Abner Santiago (Androni, Col), 2h33’43”
  9. De Decker Alfdan (Tarteletto, Belgique), 2h33’43”
  10. Vuillermoz Alexis (Total Direct Energie, France), 2h33’43”.

Abanyarwanda batanu ba mbere kuri iyi etape

  • 14 Hakizimana Seth (SACA) 2h33’43”
  • 15 Uhiriwe Byiza Renus (Team Rwanda), 2h33’43”
  • 33 Byukusenge Patrick (Benediction Ignite), 2h33’43”’
  • 39 Muhoza Eric (Team Rwanda) 2h33’43”
  • 44 Areruya Joseph (Benediction Ignite) 2h33’43”
Abafana ku muhanda bafata amafoto y'abakinnyi
Mu bafana bari ku muhanda harimo abanyamahanga bambaye umwambaro wa Team Rwanda
Tvetcov Seghei wa Wildlife Generation afata icupa ry'amazi yari ahawe n'uwari mu modoka y'ikipe
Abakinnyi benshi barimo aba Team Rwanda, bagenderaga hamwe mu gikundi
Ibilometero 60 bya nyuma byakiniwe mu Mujyi wa Rwamagana
Brayan Sanchez yari yakomeje kuyobora bagenzi be
Ikipe ya Eritrea ntiyahiriwe kuri aka gace ka mbere
Abakinnyi ba Benediction Ignite barimo Areruya Joseph na Manizabayo, bagenderaga hamwe
Brayan Sanchez yatsinze abandi kuri sprint yabereye ku murongo
Brayan Sanchez Vergara yambitswe umwenda w'umuhondo nyuma yo kwegukana agace ka mbere
Mohd Zariff wa Terengganu yahembwe nk'umukinnyi wahize abandi mu kurira umusozi wa Ntunga
Suaza Arango ukinira Team Medellín yatsinze abandi kuri sprint
Basson Gustav wa Protouch ni we Munyafurika witwaye neza
Umba Lopez Abner Santiago wa Androni Giocattoli-Sidermec yahembwe nk'umukinnyi ukiri muto witwaye neza
Ikipe ya Androni-Giocattoli yahembwe nk'iyitwaye neza kurusha izindi ku munsi wa mbere

Amafoto: Niyonzima Moses & Igiribuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .