Kwamamaza

Amagare: Batandatu bazahagararira u Rwanda muri Shampiyona y’Isi bamenyekanye

Yanditswe kuya 28-09-2016 saa 09:48' na Manzi Rema Jules


Ishyirahamwe ry’umukino wo gusiganwa ku magare mu Rwanda, Ferwacy, ryashyize ahagaragara urutonde rw’abakinnyi batandatu bazaserukira igihugu muri Shampiyona y’Isi “UCI World Championships 2016” izabera muri Qatar hagati ya tariki 10 - 16 Ukwakira 2016.

Mu bakinnyi batandatu batoranyijwe kuzakina iri rushanwa harimo Joseph Areruya, Valens Ndayisenga na Jean Claude Uwizeye bazasiganwa mu batarengeje imyaka 23, Bonaventure Uwizeyimana uzahatana mu bakuru, René Ukiniwabo umaze iminsi yitwara neza ndetse akaba yaregukanye agace ka North Circuit muri Rwanda Cycling Cup ahigitse ibihangange byose muri uyu mukino mu Rwanda, azasohokera igihugu mu batarengeje imyaka 18 ndetse Beatha Ingabire mu cyiciro cy’abakobwa.

Ku nshuro ya mbere u Rwanda rwohereje Beatha Ingabire, nyuma y’uko Jeanne d’Arc Girubuntu wagombaga kwitabira aya marushanwa yarwaye mu buryo butunguranye.

Ndayisenga Valens wegukanye Tour du Rwanda ya 2014, ubu akaba akinira ikipe ya Team Dimension Data niwe uzanahagararira u Rwanda mu gusiganwa umuntu ku giti cye (Individual Time Trial).

Umuyobozi ushinzwe Tekinike mu mukino w’amagare mu Rwanda, Jonathan Jock Boyer yatangaje ko ari amahirwe akomeye ku bakinnyi b’Abanyarwanda kwitabira Shampiyona y’Isi kuko bazahigira byinshi bitewe n’ubushyuhe, imiyaga n’imihanda bazaba banyuramo.

Ati “ Iyi shampiyona y’Isi izaba igipimo cyiza ku bakinnyi bacu kubera imirambi, ubushyuhe ndetse n’imiyaga myinshi bazanyuramo. Gusa niteze ko abakinnyi bacu bazahakura ubunararibonye.”

Iyi kipe izaba iri kumwe na Jock Boyer, umukanishi Jamie Bissell ndetse na Perezida wa Ferwacy, Bayingana Aimable.

Uretse shampiyona y’Isi kandi u Rwanda rugiye kohereza abandi bakinnyi mu isiganwa mpuzamahanga rizenguruka Cameroon, ryiswe Grand Prix Chantal Biya rizakinwa hagati ya tariki 13-16 Ukwakira.

Aha u Rwanda ruzahagararirwa na Ephrem Tuyishimire, Samuel Mugisha, Jérémie Karegeya, Kapiteni Nathan Byukusenge ndetse na Jean Bosco Nsengimana usanzwe akinira Bike Aid yo mu Budage ariko akaba yaratijwe Team Rwanda muri iki gihe, bazaba batozwa na Felix Sempoma.

Aba bakinnyi biyongeraho abandi batandatu bari gusiganwa muri Tour de Côte d’Ivoire, n’abari gukorera imyitozo mu kigo cy’i Musanze bari gutegurwa ngo bazitabire ‘ Tour du Rwanda 2016’ izakinwa kuva tariki ya 13 kugera tariki ya 20 Ugushyingo uyu mwaka.

Valens Ndayisenga uzasiganwa muri Shampiyona y'Isi haba mu muhanda n'umuntu ku giti cye ni umwe mu bitezweho ibitangaza
Uwizeyimana Bonaventure wa Dimension Data nawe azakinira u Rwanda muri Shampiyona y'Isi
René Ukiniwabo azahagararira igihugu mu batarengeje imyaka 18
Ingabire Beatha uzahagararira u Rwanda muri Shampiyona y'Isi, yasimbuye Girubuntu urwaye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved