Areruya yatandukanye na Dimension Data yerekeza muri Delko Marseille Provence KTM mu Bufaransa

Yanditswe na Manzi Rema Jules
Kuya 11 Werurwe 2018 saa 03:57
Yasuwe :
0 0

Umunyarwanda Areruya Joseph ukina umukino wo gusiganwa ku magare, yamaze gutandukana n’ikipe ya Dimension Data yo muri Afurika y’Epfo yari amaze umwaka akinira, yerekeza muri Delko Marseille Provence KTM yo mu Bufaransa yamushimye muri LaTropical Amissa Bongo.

Areruya yanditse amateka mu mezi atanu ashize aho yegukanyemo Tour du Rwanda 2017, agatwara La Tropical Amissa Bongo 2018, akegukana Tour de l’Espoir yabereye muri Cameroun akanatwara imidali ibiri ya zahabu muri shampiyona ya Afurika yabereye mu Rwanda byose bikaba byaringongeraga ku bihe bikomeye yagize umwaka ushize birimo no kwegukana agace muri Giro Italia y’abatarengeje imyaka 23.

Uyu musore ukomoka i Kayonza ariko wazamukiye mu ikipe ya Les Amis Sports y’i Rwamagana, yamaze kwerekeza mu ikipe y’ababigize umwuga ya Delko Marseille Provence KTM yo mu Bufaransa nyuma y’ibiganiro byari bimaze igihe kuko byatangiye muri Mutarama ubwo abayobozi bayo bahuriraga n’uyu mukinnyi muri La Tropical Amissa Bongo.

Ibicishije kuri twitter yayo, iyi kipe yamaze kwemeza ko Areruya yabaye umukinnyi wayo aho yagize iti “Twishimiye kubatangariza ukuza k’umukinnyi mushya, Areruya Joseph ukomoka mu Rwanda wegukanye La Tropical Amissa Bongo 2018.”

Muri iyi kipe yashinzwe mu 1974 ikaba yaranagize amateka menshi ndetse ikaba yaranatwaye shampiyona y’u Bufaransa mu 2007, Areruya yahawemo amasezerano y’umwaka ushobora kuzongera bitewe n’uko azaba yitwaye.

Umukinnyi wabaye uwa mbere kwishimira kuza kwa Areruya muri iyi kipe ni JONES Brenton ukomoka muri Australia, na we wakinnye La Tropical Amissa Bongo akanegukana agace kayo ka mbere ariko Araruya akaza kumugora cyane bikarangira ayimutwaye. We yabaye uwa gatanu muri rushange n’uwa mbere mu ikipe ye.

Areruya Joseph yabonye indi kipe yamuhaye amasezerano y'umwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza