Areruya Joseph ayoboye abazahagararira u Rwanda muri shampiyona y’Isi

Yanditswe na Manzi Rema Jules
Kuya 7 Nzeri 2018 saa 08:52
Yasuwe :
0 0

Abakinnyi batanu bayobowe na Areruya Joseph, bagiye guserukira u Rwanda muri shampiyona y’Isi yo gusiganwa ku magare mu batarengeje imyaka 23 izabera Innsbruck muri Austria.

Shampiyona y’Isi yo gusiganwa ku magare mu muhanda (UCI Road World Championships) kuri iyi nshuro izaba hagati ya tariki 22-30 Nzeri 2018.

Izaba igizwe n’ibyiciro bitandukanye mu bagabo n’abagore birimo abakuru bazasiganwa umuntu ku giti cye asiganwa n’ibihe (Time Trial), gusiganwa n’ibihe nk’ikipe (Team Time Trial) no gusiganwa mu muhanda bisanzwe (Road Race).

Muri ibi byiciro nta mukinnyi u Rwanda ruzohereza ahubwo rukazahagararirwa mu batarengeje imyaka 23 basiganwa n’ibihe umuntu ku giti cye (Men’s under-23 time trial ) no gusiganwa bisanzwe mu muhanda (Men’s under-23 road race).

Nk’uko Ishyirahamwe ry’umukino w’amagare mu Rwanda ryabitangaje, abakinnyi bazitabira iri siganwa ni Areruya Joseph, Munyaneza Didier, Ukiniwabo Rene Jean Paul, Mugisha Samuel na Hakiruwizeye Samuel.

Abandi bakinnyi babiri Habimana Jean Eric na Uhiriwe Byiza Renus bakazakina mu cyiciro cy’ingimbi.

Mugisha Samuel na Areruya Joseph bamaze iminsi bakorana imyitozo n’amakipe yabo i Burayi mu gihe Munyaneza na Ukiniwabo nabo bari kwitozanya n’ikipe ya Ndayisenga Valens na Uwizeye Jean Claude ya Pays Olonne Cycliste Côte de Lumière (POCCL).

Biteganyijwe ko abandi bari mu Rwanda bazagenda tariki 20 Nzeri bagahurira n’abari i Burayi muri Austria.

Umwaka ushize u Rwanda rwari rwahagarariwe na Ndayisenga mu cyiciro cy’abakuru ntiyabasha kurangiza ibilometero 276.5 banyongaga, Areruya na Mugisha bakinnye mu batarengeje imyaka 23 ntibarangiza ibilometero 191 basiganwaga.

Mugisha Samuel na Areruya Joseph ni bamwe mu bazaserukira u Rwanda muri shampiyona y'Isi uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza