Amakipe azitabira Tour du Rwanda 2016 yamenyekanye

Yanditswe na Ishimwe Israel
Kuya 30 Kanama 2016 saa 06:23
Yasuwe :
0 0

Ishyirahamwe ry’Umukino w’Amagare mu Rwanda, Ferwacy ryasohoye urutonde rw’amakipe azitabira irushanwa ryo gusiganwa ku magare rizenguruka igihugu ‘ Tour du Rwanda 2016’ izakinwa kuva tariki ya 13 kugera tariki ya 20 Ugushyingo uyu mwaka.

Ku nshuro ya mbere kuva Tour du Rwanda ibaye mpuzamahanga muri 2009, igiye kugaragaramo amakipe yo mu Rwanda abiri ya Benediction Club y’i Rubavu na COGEBANQUE Amis Sportifs y’i Rwamagana azaba ari kumwe n’ikipe y’igihugu mu gihe u Rwanda rwari rusanzwe ruhagararirwa na Team Kalisimbi, Team Muhabura na Team Akagera.

Umuyobozi wa Ferwacy, Aimable Bayingana yatangaje ko kuba amakipe y’u Rwanda atari ay’igihugu agiye kwitabira Tour du Rwanda ari indi ntambwe mu guteza imbere umukino w’amagare mu Rwanda hongererwa imbaraga amakipe yo kuri uru rwego.

Yagize ati “Uko umukino w’amagare mu Rwanda ugenda uzamuka niko n’amakipe agenda akomera. Uyu mwaka twahisemo amakipe nka Benediction na Amis Sportifs ko nayo yitabira Tour du Rwanda mu rwego rwo kuyongerera imbaraga no kuyamenyekanisha mu ruhando mpuzamahanga.”

Abayobozi b’aya makipe kandi nabo bishimiye kuba amakipe yabo agiye guhangana no kwigaragaza.

Umuyobozi w’ikipe ya Benediction, Felix Sempoma yagize ati “Ni amahirwe menshi cyane. Kuba tugiye gukina irushanwa rikomeye muri Afurika nka Tour du Rwanda, ni intambwe ikomeye ikipe yacu iteye.Kujya muri Tour du Rwanda bigiye gufungura imiryango myinshi cyane muri Benediction kandi bizadufasha no kubona abaterankunga bakomeye.Bizatwongerera n’amahirwe yo gutanga bakinnyi bacu mu yandi makipe akomeye bavuye muri club yacu.”

Umuyobozi w’ikipe ya COGEBANQUE Amis Sportifs, John Rugamba na we asanga ari ishema kuba ikipe ye igiye gukina Tour du Rwanda ku nshuro ya mbere.

Ati “Twumva ari intambwe Amis Sportifs imaze gutera, gutumirwa muri Tour du Rwanda ni uko Ferwacy ibona imbaraga n’abakinnyi dufite muri rusange. Nk’ikipe kuba tugiye guhangana n’andi makipe akomeye n’ibindi bihugu,niko gukura kw’ikipe.”

Irushanwa rya Tour du Rwanda rigiye kuba ku nshuro ya munani rikazatangirira i Kigali tariki ya 13 Ugushyingo ari naho rizasorezwa tariki ya 20 Ugushyingo nyuma yo kuzenguruka u Rwanda.

Mu makipe agera kuri 30 yari yasabye kwitabira iri rushanwa rimaze kwegukanwa n’u Rwanda inshuro ebyiri ziheruka, hemerewe 17 gusa harimo Dimension Data for Qhubeka yo muri Afurika y’Epfo ikinamo Abanyarwanda batatu, Adrien Niyonshuti, Bonaventure Uwizeye na Ndayisenga Valens na Stradalli Bike Aid mu Budage ikinamo Hadi Janvier na Nsengimana Jean Bosco wegukanye Tour du Rwanda iheruka.

Perezida wa Ferwacy avuga ko bahisemo amakipe bagendeye ku migabane akomokaho, bashakaga ko buri wose uhagararirwa ndetse bakaba baranarebye ku bushobozi bwa buri kipe.

Amakipe 17 azitabira Tour du Rwanda 2016

Amakipe atatu azahagararira u Rwanda

- Team Rwanda
- Club Benediction y’i Rubavu
- Les Amis Sportif y’i Rwamagana.

Amakipe atanu y’ibihugu byo muri Afurika:

- Ikipe y’igihugu ya Afurika y’Epfo
- Ikipe y’igihugu ya Ethiopia
- Ikipe y’igihugu ya Eritrea
- Ikipe y’igihugu ya Misiri
- Ikipe y’igihugu ya Algeria

Amakipe yabigize umwuga:

- Team Dimension Data for Qhubeka yo muri Afurika y’Epfo
- Kenyan Riders Downunder yo muri Kenya
- Sharjah Cycling Team yo muri Leta Zunze Ubumwe z’Abarabu
- Cycling Academy Team yo muri Israël
- Tirol Cycling Team yo muri Austria
- Stradalli Bike Aid yo mu Budage

Amakipe atarabigize umwuga

- Team Lowestrates.com yo muri Canada
- Team Haute-Savoie Rhône-Alpes yo mu Bufaransa
- Team Furniture Decarte yo mu Busuwisi

Ikipe ya Benediction izitabira Tour du Rwanda ku nshuro ya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244