U Bushinwa: Hakozwe imbwa izakorerwaho ubushakashatsi bw’indwara z’umutima

Yanditswe na Ferdinand Maniraguha
Kuya 26 Ukuboza 2017 saa 05:44
Yasuwe :
0 0

Ikigo kizobereye mu bushakashatsi bw’ibinyabuzima, Sinogene, giherereye i Beijing mu Bushinwa cyageze ku muhigo wo gukora imbwa izifashishwa mu bushakashatsi ku ndwara z’umutima.

Iyi mbwa yiswe Longlong yaremwe hifashishijwe uturemangingo twakuwe ku yindi yiswe Apple. Uturemangingo twakuwe muri Apple twaravuguruwe, haremwamo indwara yitwa atherosclerosis, itera ibibazo umutima n’ibice by’ubuhumekero.

Atherosclerosis yatewe mu turemangingo twakoze Longlong, abashakashatsi bizeye kuzayifashisha bashaka umuti w’izo ndwara.

Mu 2005, abashakashatsi bo muri Koreya y’Epfo nibo babashije kurema imbwa bifashishije uturemangingo duto. Icyakora, CNN dukesha iyi nkuru ivuga ko nyuma ya Longlong, Sinogene aribo ba mbere bayoboye mu ruhando rw’abashakashatsi ku kurema imbwa bifashishije uturemangingo, kuko bamaze kurema enye.

Umuyobozi ushinzwe tekinike mu kigo Sinogene, Feng Chong, yavuze ko imbwa zifite byinshi zihuriye n’umuntu ariyo mpamvu bifuje kuzikoreraho ubushakashatsi hashashakishwa umuti ku ndwara za muntu.

Atherosclerosis ni indwara izibya imijyana y’amaraso kubera utubumbe dutuma iba mito. Uretse kubura umwuka, inatera indwara zitandukanye z’umutima.

Ishami ry’Umuryango w’Abibumbye ryita ku buzima (OMS) mu 2015 ryatangaje ko abantu miliyoni 17.7 ku isi bishwe n’indwara z’umutima, zikaba iza mbere zihitana abantu benshi ku isi.

Umuyobozi Mukuru wa Sinogene, Mi Jidong, yavuze ko kugeza ubu nta kimenyetso cy’uburwayi Longlong iragaragaza, icyakora ngo bayikurikiranira hafi. Imiti y’indwara z’umutima kandi iri no kugeragerezwa ku zindi mbwa zavutse mu buryo busanzwe.

Icyakora Umuryango wo muri Amerika ushinzwe kwita ku matungo mu buryo buboneye (PETA) watangaje ko ibyo Sinogene ikora bihabanye n’ubunyamwuga.

PETA ivuga ko ubwo buryo bukoreshwa bwo kurema inyamaswa nshya buhenze kandi bubabaza inyamaswa zabuvutsemo.

Nta tegeko riba mu Bushinwa rijyanye n’uburyo amatungo akorerwaho ubushakashatsi afatwa, mu gihe muri icyo gihugu habarirwa miliyoni zisaga 20 za laboratwari z’amatungo.

PETA ivuga ko aho gushora za miliyoni mu kurema izindi nyamaswa, yakoreshwa hitabwa ku zihari zitagira uzitaho.

Iti “Akayabo k’amafaranga akoreshwa haremwa inyamaswa nshya, kakwifashishwa harengerwa injangwe nyinshi, imbwa n’izindi zipfa buri mwaka kubera ko ntaho kuba zifite.”

Sinogene yo ivuga ko ubushakashatsi bwayo ari ingirakamaro kuko buzafasha mu iterambere ryo gukora imiti. Inavuga ako izakomeza gukora izindi mbwa zimeze nka Longlong.

Longlong yavukanye Atherosclerosis izibya imijyana y'amaraso, bigatera indwara z'umutima no kubura umwuka mwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza