00:00:00 IGIHE NETWORK KN KINYARWANDA EN ENGLISH FR FRANCAIS

Menya ibidasanzwe kuri Cotam Unité, indege Perezida Macron agendamo

Yanditswe na Nkurunziza Jean Baptiste
Kuya 30 Gicurasi 2021 saa 03:25
Yasuwe :
0 0

Abakuru b’Ibihugu ni bamwe mu bantu bubahwa ku Isi kandi bagacungirwa umutekano mu buryo bwihariye, umwe mu mwihariko bagira ni uko usanga abenshi bafite indege zibatwara kandi ugasanga zifite ikoranabuhanga rihambaye ahanini hagamijwe kwirinda icyabahungabanya.

Cotam Unité cyangwa se COTAM 001 ni izina rihabwa indege itwaye Perezida w’u Bufaransa. Mu Ugushyingo 2010 ni bwo indege Airbus A330-200 yasimbuye indege zari zisanzwe zikoreshwa mu gutwara Perezida w’u Bufaransa.

Iyi ndege ni nayo iherutse kugeza Perezida Emmanuel Macron ku Kibuga cy’Indege Mpuzamahanga cya Kigali mu ruzinduko rw’iminsi ibiri yagiriye mu Rwanda.

Iyi ndege ifatwa nk’iya gisirikare cyane ko aricyo gishinzwe kuyigenzura umunsi ku munsi aha ni naho ikomora izina ryayo kuko mu busanzwe Cotam ni impine y’umutwe w’Igisirikare cy’u Bufaransa kirwanira mu kirere uzwi nka (Commandement du transport aérien militaire) gusa mu 1994 uyu mutwe waje guhindura izina ariko indege itwaye Perezida yose ikomeza kwitwa gutya.

Mu 2010 Nicolas Sarkozy wayoboraga u Bufaransa niwe watanze igitekerezo cy’uko hagurwa indege nshya izajya itwara Perezida w’iki gihugu. Iki gihe yasabaga ko hagurwa indege yagutse kandi ishobora gukora urugendo rurerure idahagaze kuko yavugaga ko ebyiri zakoreshwaga zo mu bwoko bwa Airbus A319CJ zifite ubushobozi buri hasi.

Iki gitekerezo cya Sarkozy cyakiriwe neza na Leta y’u Bufaransa ariko Minisiteri y’Ingabo igaragaza ko idafite amafaranga ahagije yatuma igura indege nshya, ahubwo ifata umwanzuro wo kugura iyakoreshejwe ariko ikavugururwa.

Aha niho Minisiteri y’Ingabo yarambagije indege nziza ikwiriye Perezida w’Igihugu maze iza guhitamo Airbus A330-200 yari isanzwe ari iy’ikigo gikora ubwikorezi bwo mu kirere cya Air Caraïbes. Amakuru avuga ko iyi ndege yaguzwe arenga miliyari 60Frw ariko ikaza kugenda yongerwamo ikoranabuhanga ritandukanye ari nako ikorerwa amavugurura atuma iva ku kuba indege y’abagenzi ikaba indege itwara Umukuru w’Igihugu.

Iyi ndege kugeza uyu munsi itwara Perezida Macron ikunze guhabwa akazina k’Inyoni n’abasirikare bamurinda.

Iyi ndege yihariye ikoreshwa na Perezida w’u Bufaransa, ifite icyumba cyihariye cya perezida kirimo ibitanda bibiri, urwambariro, ubwogero n’ubwiherero bubiri. Ifitemo ibiro bya Perezida ashobora gukoreramo akazi ke ka buri munsi akanatangiramo amabwiriza ku ngabo cyangwa abandi bose ashatse kugezaho ijambo.

Iyi Airbus A330-200 ya Perezida w’u Bufaransa kandi ifite aho Perezida ashobora kunywera ikawa, ikagira ibiro by’umunyamabanga we ndetse n’icyumba cy’inama cyayo gifite uburyo butuma amajwi adasohoka, iki cyumba cy’inama kandi kirimo ameza ashobora gukikizwa n’abantu 12 bicaye bari mu nama.

Itumanaho rikoreshwa muri iyi ndege rimufasha gukomeza inshingano nk’umukuru w’igihugu, afite gutanga ubutumwa ashaka aho ashaka amasaha 24 ku yandi. Indege ya Macron kandi mu gihe akiri ku mwanya w’umukuru w’Igihugu ifite gahunda z’ubuvuzi buteye imbere aho muri yo harimo icyumba gito kirimo serivisi z’ubuvuzi mu gihe cyose haba hari uzikeneye.

Cotam Unité kandi ifite igice gishobora kujyamo abantu 60 baherekeje Perezida barimo abanyamakuru, abakozi n’abandi b’ingenzi umukuru w’igihugu yakwifuza guherekezwa na bo.

Iyi ndege ya Macron ihuriye na Air Force One itwara perezida wa Leta Zunze Ubumwe za Amerika ku buryo bwo kwirinda ibisasu bikomeye nka misile, zikomora ku gisirikare cya Israel kiri mu bikomeye ku isi nk’uko byatangajwe n’urubuga rwa Mako rwo muri Israel aho ruvuga ko uburyo bw’ubwirinzi izi ndege zidasanzwe zikoresha bwakozwe n’Ikigo cy’Aba-Israel cyitwa Elbit Systems.

Mu zindi ndege zakoreshejwe mu gutwara abaperezida b’u Bufaransa harimo Falcon7X kuva mu 2009 kugeza 2010, iyi yo iracyanifashishwa mu gihe perezida agiye hafi cyangwa ahantu hadafite ubushobozi bwo kwakira indege nini nka Airbus A330-200, ikoreshwa kandi mu gutwara Minisitiri w’Intebe n’abandi bayobozi bakuru.

Iyi ndege itwara Perezida Macron ikunze guhabwa akazina k’Inyoni n’abasirikare baba hafi ya perezida
Mu ruzinduko Perezida Macron aherutse kugirira mu Rwanda yakoresheje Cotam Unité

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .