Inyubako zidasanzwe ziri kubakwa n’ibigo by’ikoranabuhanga nka Google na Facebook

Yanditswe na Ferdinand Maniraguha
Kuya 26 Nyakanga 2016 saa 02:18
Yasuwe :
0 0

Ibigo n’inganda bikora ibijyanye n’ikoranabuhanga bikomeje guhatana mu rugamba rwo guhanga udushya no gukora ibintu bidasanzwe,ndetse bamwe babanje gufata nk’ibidashoboka.

Ngaho imodoka zitwara, ngizo indege, telefoni zigwa mu mazi ntizangirike, utwuma dufasha ababyeyi kumenya niba abana babo nta kibazo bafite mu mubiri kandi batari kumwe n’ibindi.

Bimwe muri ibi bigo by’ikoranabuhanga ariko ntibyagarukiye ku gukora ibikoresho bituma ubuzima bwa muntu burushaho koroha no kuba bwiza gusa, ahubwo byagiye binatangira imishinga yo kubaka inzu zitangaje zavugishije benshi.

Dore zimwe mu nzu ziri kubakwa n’ibigo bikomeye mu ikoranabuhanga nka Facebook, Google n’ibindi.Muri izi nzu harimo izitaratangira kubakwa zikiri gukorerwa inyigo.

Ibiro bishya bya Amazon

Ikigo gikora ubucuruzi kuri Internet, Amazon cyatangiye kubaka ibiro bishya mu mujyi wa Seattle muri Leta ya Washington muri Amerika.

Iyi nyubako ifite ishusho y’umubumbe w’isi ugenda wisubiramo yubatswe ku buryo izajya irengera ibidukikije aho abazayikoreramo bazajya bakoresha ingufu zizajya ziba zaturutse mu bushyuhe bw’amazu byegeranye.

Iyi nyubako izuzura mu 2018 kandi izaba ifite igice kizaba kirimo ubwoko bw’ibimera bisaga 300 bugenda bucika ku isi.

Hotel y’ibyumba 200 ya Facebook

Nyuma yo kwimukira mu nyubako nshya mu 2015, urubuga nkoranyambaga rwa Facebook rurashaka kubaka hotel y’ibyumba 200, parking n’ikiraro cy’abanyamaguru n’amagare mu rwego rwo guhuza iyi nyubako n’abaturanye nayo.

Nubwo iyi nyubako itaratangira kubakwa, igishushanyo kigaragaza imitere y’iki kiraro ikomeje gutangaza benshi.

Google Canopy

Mu 2015 nibwo urubuga rwa Google rwashyize ahagaragara igishushanyo kigaragaza uburyo yashakaga gukikiza ibiro byayo ibirahure bibonerana ndetse hakiyongeramo n’inzira zo mu kirere zifasha abantu gutembera.

Nyuma yo kubona ko aho Google ikorera bigoye kuhashyira iyi nyubako, yaje kugirana amasezerano n’urubuga rwa LinkedIn ibaha ubutaka muri Leta ya California, bikaba biteganyijwe ko mu minsi mike izi nzozi zizaba zagezweho.

Bivugwa ko iyi nubako abantu bazayubaka bazaba ari bake, kuko hazifashishwa n’ama-robots.

Apple Spaceship

Uruganda rwa Apple rusanzwe ruzwiho gukora telefoni na mudasobwa nziza cyane narwo ntirwatanzwe mu ruhando rw’ibigo by’ikoranabuhanga byubaka inzu zitangaje maze yubaka ibiro byayo bya kabiri bifite ishusho nk’iyi mpeta.

Iyi nyubako yahawe izina rya Apple Spaceship izajya ituma abayikoreramo babasha kureba hanze, aho baba bari hose muri iyo nyubako.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza